ຂປລ. ພິທີປະກາດ ເມືອງວິລະບູລີ ແຂວງສະຫວັນນະເຂດ ເປັນເມືອງຈົບຊັ້ນ ມັດທະຍົມຕອນຕົ້ນບໍາລຸງ ອັນດັບທີ 6 ຂອງແຂວງ ແລະ ເປັນເມືອງທີ 67 ໃນທົ່ວປະເທດ ໄດ້ຈັດຂຶ້ນ ໃນທ້າຍອາທິດຜ່ານມາ. ໂດຍເປັນກຽດເຂົ້າຮ່ວມ ຂອງທ່ານ ລີຕູ້ ບົວປາວ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກິລາ.
ໃນພິທີ, ທ່ານ ສາຍສະໝອນ ວົງສຳເພົາ ຫົວໜ້າຫ້ອງການ ສຶກສາທິການ ແລະ ກິລາ ເມືອງວິລະບູລີ ໄດ້ໃຫ້ຮູ້ວ່າ: ເມືອງວິລະບູລີ ມີພົນລະເມືອງທັງໝົດ 37.238 ຄົນ, ຍິງ 18.519 ຄົນ, ໃນທົ່ວເມືອງມີ 7 ບ້ານທຸກຍາກ ແລະ 810 ຄອບຄົວທີ່ທຸກຍາກ. ນັບແຕ່ມື້ປະກາດຄວາມບໍ່ຮູ້ໜັງສື ແລະ ຈົບປະຖົມສຶກສາ ໃນທົ່ວເມືອງ ໃນຄັ້ງວັນທີ 24 ພຶດສະພາ 2009 ເປັນຕົ້ນມາ ວຽກງານການສຶກສາຢູ່ເມືອງ ກໍໄດ້ຮັບການຈັດຕັ້ງປະຕິບັດ ໄປຕາມແຜນຍຸດທະສາດ ການສຶກສາແຫ່ງຊາດ ແລະ ແຜນພັດທະນາ ຢ່າງທົ່ວເຖິງ ເຊິ່ງນັບແຕ່ສົກຮຽນ 2012 ເປັນຕົ້ນມາ ຈຳນວນປະຊາກອນ ໃນອາຍຸ 15-30 ປີ ທີ່ບໍ່ຈົບຊັ້ນມັດທະຍົມສຶກສາຕອນຕົ້ນໃນທົ່ວເມືອງ ໄດ້ຈັດຕັ້ງ ການຮຽນ-ການສອນ ມີທັງໝົດ 4.689 ຄົນ, ຍິງ 2.294 ຄົນ ເທົ່າກັບ 32,06% ຂອງຈຳນວນປະຊາກອນ ໃນກຸ່ມເປົ້າໝາຍ.
ຜ່ານການຈັດຕັ້ງປະຕິບັດ ນັບແຕ່ ສົກຮຽນ 2013-2015 ມາຮອດປັດຈຸບັນ ຈຳນວນກຸ່ມເປົ້າໝາຍ ໃນເກນອາຍຸ 15-30 ປີ ທີ່ບໍ່ຈົບຊັ້ນ ມັດທະຍົມຕອນຕົ້ນບຳລຸງ ທັງໝົດ 4.689 ຄົນ, ຍິງ 2.294 ຄົນ ສາ ມາດຮຽນຈົບຊັ້ນ ມັດທະຍົມຕອນຕົ້ນບຳລຸງ ໄດ້ທັງໝົດ 4.562 ຄົນ, ຍິງ 2.198 ຄົນ ເທົ່າກັບ 97,29% ຂອງຈຳນວນ ກຸ່ມເປົ້າໝາຍທັງໝົດ ແລະ ສາມາດປ່ຽນພຶດຕິກຳ ຂອງຕົນເອງໄດ້ ເຊິ່ງສະແດງອອກຄື: ເຂົາເຈົ້າຮູ້ອ່ານ, ຮູ້ຂຽນ, ຄິດໄລ່ດ້ວຍຕົນເອງ ສາມາດນຳເອົາບົດຮຽນດັ່ງກ່າວ ເຂົ້າໄປປັບໃຊ້ເຂົ້າໃນ ຊີວິດປະຈຳວັນ, ນອກຈາກນັ້ນ ຍັງມີຈຳນວນຫລາຍ ໄດ້ຮຽນຕໍ່ວິຊາຊີບ ໃນວິຊາຕ່າງໆອີກດ້ວຍ.
ແຫລ່ງຂ່າວ:
