ເມື່ອວັນທີ 21 ມີ ນາຜ່ານມາທີ່ວິສາຫະກິດສ່ວນບຸກຄົນໂຕະລາວໄດ້ມີການຖະແຫຼ່ງຂ່າວກ່ຽວກັບການຈັດງານລະດັບພາກພື້ນທີ່ເອີ້ນວ່າ “ໂຄງການຊີ້ຊ່ອງທາງ ຜູ້ປະກອບການໃໝ່” ໂດຍມີທ່ານ ນາງ ສຸພາພອນສວນນະວົງຜູ້ອຳນວຍການວິສາຫະກິດສ່ວນບຸກຄົນໂຕະລາວ, ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.
ທ່ານ ນາງ ສຸພາພອນ ສວນນະວົງ ໃຫ້ຮູ້ວ່າ: ໂຄງການນີ້ແມ່ນເປັນໂຄງການລະດັບພາກພື້ນ ແລະເປັນໂອກາດຄັ້ງທຳອິດທີ່ຈະຈັດຂຶ້ນໃນ ສປປ ລາວ ເປັນເວລາ 3 ວັນ, ນັບແຕ່ວັນທີ 1- 3 ເມສາ 2016, ໂດຍມີຈຸດປະສົງເພື່ອແນະນຳແລະສິດສອນຊີ້ຊ່ອງທາງໃຫ້ບັນດາຜູ້ປະກອບການໃໝ່ຈາກ 5 ປະເທດ ( ລາວ,ຫວຽດນາມ, ກຳປູເຈຍ,ໄທ ແລະມຽນມາ),ນອກນີ້ຍັງມີການຈັດສຳມະນາ ແລະນຳສະເໜີຄວາມຄິດທາງທຸລະກິດໃຫ້ແກ່ບັນດານັກລົງທຶນທັງພາຍໃນແລະຕ່າງປະເທດຊຶ່ງຈະຈັດຂື້ນທີສູນອາເມລິກາ-ສະຖານທູດອາເມລິກາເກົ່າ (ທາດດຳ).
ໂຄງການນີ້ແມ່ນລິເລີ່ມຂຶ້ນພາຍໃຕ້ວຽກງານ Tigers Mekong ຊຶ່ິ່ງເປັນສ່ວນໜຶ່ງຂອງທຶນຊ່ວຍເຫຼືອຂອງສະຫະລັດອາເມລິການຈຸດປະສົງຫຼັກຂອງໂຄງການແມ່ນເພື່ອເປັນການແນະນຳແລະສິດສອນໃຫ້ບັນດາຜູ້ປະກອບການໃໝ່ສາມາດນຳເອົາຄວາມຮູ້, ຄວາມສາມາດໄປສິດສອນໃຫ້ຜູ້ປະກອບການອື່ນຕໍ່ໄປໄດ້ເພື່ອເປັນການສ້າງແນວຄວາມຄິດ, ການດຳເນີນທຸລະກິດທີ່ຖືກຕ້ອງແລະເພື່ອສ້າງຄວາມເຂັ້ມແຂງໃຫ້ແກ່ເຄືອຂ່າຍຜູ້ປະກອບການໃນພາກພື້ນແລະເພື່ອເປັນເວທີໃຫ້ຜູ້ປະກອບການສາມາດນຳສະເໜີແນວຄວາມຄິດຕໍ່ນັກ ລົງທຶນເພື່ອຊຸກຍູ້ໃຫ້ຜູ້ປະກອບການ, ປະກອບສ່ວນເຂົ້າໃນໂຄງການຕໍ່ໄປແລະເພື່ອໃຫ້ພວກເຂົາເຈົ້າໄດ້ຮັບຂໍ້ມູນກ່ຽວກັບຕະຫຼາດໃນພາກພື້ນ.
ສຳລັບການສິດສອນຈະມີຜູ້ປະກອບການໃໝ່ 25 ບໍລິສັດຈາກ 5 ປະເທດຄື:ລາວ, ຫວຽດນາມ, ໄທ, ກຳປູເຈຍ ແລະ ມຽນມາເຂົ້າຮ່ວມໂຄງການພ້ອມກັບຜູ້ສອນ 5 ທ່ານຈາກ 5 ປະເທດເຊັ່ນດຽວກັນຜູ້ສອນຈະແນະນຳກ່ຽວກັບຂໍ້ມູນ ແລະ ປະສົບການຕົວຈິງກ່ຽວກັບການສ້າງແນວຄິດທາງທຸລະກິດ, ແກ້ໄຂບັນຫາການກຳນົດຄູ່ແຂ່ງໃນຂະແໜງທຸລະກິດ, ການເຂົ້າເຖິງລູກຄ້າ, ການດຳເນີນທຸລະກິດກັບຕ່າງປະເທດ, ຮັກສາ ຖານລູກຄ້າ ແລະກໍລະນີສຶກສາຈາກປະ ສົບການຕົວຈິງ.
ສ່ວນຜູ້ສະໜັບສະໜູນຫຼັກຂອງໂຄງການຊີ້ຊ່ອງທາງຂອງຜູ້ປະການໃໝ່ໃນລຸ່ມແມ່ນ້ຳຂອງແມ່ນບໍລິສັດເບຍລາວໂກນ, ເນື່ອງຈາກບໍລິສັດດັ່ງກ່າວເຫັນໄດ້ເຖິງຄວາມສຳຄັນຂອງການສ້າງຜູ້ປະກອບການໃໝ່ໃນລາວ ແລະໃນລະດັບພາກພື້ນດັ່ງນັ້ນບໍລິສັດຈິ່ງໄດ້ກ້າວເຂົ້າມາສະໜັບສະໜູນ ແລະເລີ່ມປະກອບສ່ວນຢ່າງເຕັມທີ່ເຂົ້າໃນຂົງເຂດການພັດທະນາຜູ້ປະກອບການໃຫ້ມີຄວາມເຂັ້ມແຂງ ແລະເພື່ອໃຫ້ພວກເຂົາເຈົ້າສາມາດປະກອບສ່ວນເຂົ້າໃນການພັດທະນາເສດຖະກິດໄດ້ຢ່າງແທ້ຈິງ, ຢ່າງໃດກໍຕາມຖ້າຫາກວ່າທ່ານໃດສົນໃຈເຂົ້າຮ່ວມໃນໂຄງການດັ່ງກ່າວກໍສາມາດ ສະໝັກ ແລະລົງທະບຽນໄດ້ທີ www. mekongsnexttop.org ຫຼືສອບຖາມ Info@tohlao.comໂທ 030 532 9008 ແລະ 020 7701 0655 ຊຶ່ງບໍ່ໄດ້ເສຍຄ່າໃດໆ.
ທີ່ມາ: