ພາຍຫຼັງທີ່ລັດຖະບານໄດ້ມີການເຊັນສັນຍາອະນຸມັດພື້ນທີ່ດິນຈຳນວນ 4 ພັນກວ່າເຮັກຕາໃຫ້ກັບກຸ່ມບໍລິສັດພູສີຈຳກັດເມື່ອກາງເດືອນມັງກອນຜ່ານມາ ເພື່ອພັດທະນາຊານເມືອງເກົ່າຫຼວງພະ ບາງ ແລະເມືອງໃໝ່ຈອມເພັດຈຳນວນໜຶ່ງ ໃຫ້ກາຍເປັນເຂດເສດຖະກິດພິເສດຫຼວງພະບາງ ເພື່ອເຮັດໃຫ້ການພັດທະນາຫຼີກເວັ້ນບັນຫາລັດກໍຄືອຳນາດການປົກຄອງແຂວງ ໄດ້ອອກແຈ້ງການໃຫ້ປະຊາຊົນຢຸດຕິ, ການຊື້-ຂາຍກຳມະສິດທີ່ດິນລວມທັງການປຸກສ້າງສິ່ງຕ່າງໆ ໃສ່ເຂດດັ່ງກ່າວ.
ຕາມຂໍ້ມູນຈາກທີມຂ່າວໜັງສືພິມ ເສດຖະກິດ-ສັງຄົມ ປະຈຳແຂວງຫຼວງພະບາງໃຫ້ຮູ້ວ່າ: ວັນທີ 7 ມີນາ 2016 ອຳນາດການປົກຄອງແຂວງຫຼວງພະບາງ ໄດ້ອອກແຈ້ງການສະບັບເລກທີ 01/ຈຂ.ຫຼບ ເຖິງບັນດາພະແນກການ, ກົມກອງອ້ອມຂ້າງ, ອົງການປົກຄອງ ເມືອງຈອມເພັດ, ເມືອງຫຼວງພະບາງ ຕະຫຼອດຮອດພໍ່ແມ່ປະຊາຊົນພາຍໃນແຂວງ ໂດຍໃຫ້ຢຸດຕິການຈັບຈ່ອງຊື້-ຂາຍ ກຳມະສິດທີ່ດິນ ແລະປຸກສ້າງສິ່ງຕ່າງໆໃນພື້ນທີ່ຈຳນວນ 4.850 ເຮັກຕາເຂດຊານເມືອງເກົ່າຫຼວງພະບາງ ແລະເຂດບໍ່ມີການພັດທະນາເມືອງໃໝ່ຈອມເພັດ ເນື່ອງຈາກວ່າເຂດດັ່ງກ່າວທາງລັດຖະບານຈະໄດ້ພັດທະນາໃຫ້ເປັນເຂດເສດຖະກິດພິເສດຂອງແຂວງ, ຖ້າມີການລະເມີດຈະຖືກປະຕິບັດຕາມ ລະບຽບກົດໝາຍ.
ທັງນີ້ ສະພາບໍລິຫານເຂດເສດຖະກິດຫຼວງພະບາງແມ່ນຈະໄດ້ແຕ່ງຕັ້ງຄະນະກຳມະການຮັບຜິດຊອບໃນການສຳຫຼວດ-ວັດແທກ, ຊົດເຊີຍ, ປັກຫຼັກໝາຍຂອບເຂດ ແລະອອກໃບສິດນຳ ໃຊ້ທີ່ດິນລັດຂອງເຂດເສດຖະກິດພິເສດແຂວງ ທີ່ປະກອບດ້ວຍຂະແໜງການທີ່ກ່ຽວຂ້ອງຈາກສູນກາງ ແລະອົງການປົກຄອງທ້ອງຖິ່ນ ເພື່ອປະເມີນລາຄາ, ໄກ່ເກ່ຍ, ຊົດເຊີຍໃຫ້ແກ່ປະຊາຊົນ ທີ່ດຳລົງຊີວິດ ໃນຂົງເຂດດັ່ງກ່າວ.
ສຳລັບເຂດພັດທະນາເຂດເສດຖະກິດພິເສດຫຼວງພະບາງແມ່ນໄດ້ມີການເຊັນສັນຍາອະນຸມັດ ລະຫວ່າງຄະນະກຳມະການແຫ່ງຊາດເພື່ອການຄຸ້ມຄອງເຂດເສດຖະກິດພິເສດ ແລະເຂດເສດຖະກິດສະເພາະ (ຄຂພສ) ກັບກຸ່ມບໍລິສັດພູສີ ຈຳກັດ ໃນວັນທີ 17 ມັງກອນ 2016 ທີ່ນະຄອນຫຼວງວຽງຈັນ ໂດຍມີອາຍຸການສຳປະທານທັງໝົດ 99 ປີ ຊຶ່ງບໍລິສັດຈະພັດທະນາເຂດໃຫ້ຕິດພັນກັບການ ອະນຸຮັກວັດທະນະທຳ ແລະປົກປັກຮັກ ສາສະພາບແວດລ້ອມເພື່ອຮອງຮັບການ ຂະຫຍາຍຕົວເສດຖະກິດ-ສັງຄົມ ຂອງ ແຂວງໃຫ້ຄຽງຄູ່ກັບການອະນຸຮັກເມືອງມໍລະດົກໂລກແບບຍືນຍົງ, ເປັນສູນກາງບໍລິການທີ່ທັນສະໄໝ, ສະດວກ ແລະ ວ່ອງໄວ.
ພ້ອມດຽວກັນນັ້ນກໍເປັນການດຶງດູດນັກລົງທຶນທັງພາຍໃນ ແລະຕ່າງປະເທດໃຫ້ເຂົ້າມາພັດທະນາພື້ນຖານໂຄງລ່າງ, ສ້າງລະບົບສາທາລະນູປະໂພກຄົບວົງ ຈອນເຊັ່ນ: ພື້ນຖານໂຄງລາງເສັ້ນທາງ, ລະບົບໄຟຟ້າ, ນໍ້າປະປາ, ໂຮງຮຽນ, ໂຮງໝໍ, ໂຮງແຮມ, ສູນການຄ້າ, ທະນາຄານ, ອາຄານທຸລະກິດສູງ 23 ຊັ້ນ, ເຮືອນພັກສຳລັບຄົນອາຍຸສູງ, ຈັດສັນ ເຂດກະສິກຳອິນຊີປອດສານພິດ, ຈັດສັນເຂດອຸດສາຫະກຳຂະໜາດກາງ, ຂະໜາດໃຫຍ່, ຈັດສັນແຫຼ່ງບຳບັດນໍ້າເສຍ ໂດຍຄາດວ່າຈະໃຊ້ທຶນເຂົ້າໃນການພັດທະນາ ໂຄງການປະມານ 1,2 ຕື້ໂດລາສະຫະລັດ.
ແນວໃດກໍດີ ຖ້າການພັດທະນາໂຄງການດັ່ງກ່າວສຳເລັດ ຄາດວ່າຈະສາມາດສ້າງວຽກເຮັດງານທຳທີ່ໝັ້ນຄົງໃຫ້ປະຊາຊົນພາຍໃນທ້ອງຖິ່ນເຂດອ້ອມຂ້າງໂຄງການໄດ້ເປັນຈຳນວນຫຼາຍ, ນອກຈາກນີ້ ກຸ່ມບໍລິສັດດັ່ງກ່າວຍັງຈະສ້າງຂົວຂ້າມນ້ຳຂອງເພື່ອເຊື່ອມຈອດລະຫວ່າງເຂດຊານເມືອງຫຼວງພະບາງຫາເມືອງຈອມເພັດຕື່ມອີກແນໃສ່ອຳນວຍຄວາມສະດວກໃຫ້ແກ່ການໄປ-ມາຫາສູ່ຕະຫຼອດຮອດການຂົນສົ່ງສິນຄ້າຂອງປະຊາຊົນ.
ທີ່ມາ: