ຫຼັງຈາກທີ່ມີຂ່າວຫຼຸດກັນອອກມາຢ່າງຫຼວງຫຼາຍວ່າ ບໍລິສັດອັນດັບໜຶ່ງຂອງໂລກແບບ Apple ຈະເປີດໂຕສະມາດໂຟນລຸ້ນໃໝ່ມາພ້ອມກັບຈໍຂະໜາດ 4 ນິ້ວ ແລະເປັນການເປີດໂຕເພື່ອມາແທນທີ່ລຸ້ນ iPhone 5s ໃນຕະຫຼາດຕອນນີ້. ເຊິ່ງຂ່າວລືທັງໝົດນີ້ກໍເປັນຄວາມຈິງເມື່ອມື້ຄືນນີ້ທາງບໍລິສັດ Apple ໄດ້ມີການຈັດງານເປີດໂຕສະມາດລຸ້ນໃໝ່ນັ້ນກໍຄື iPhone SE
Apple iPhone SE
iPhone SE ມາພ້ອມກັບໜ້າຈໍ IPS LCD ຂະໜາດ 4 ນິ້ວ ຄວາມລະອຽດ 640 x 1136 ພິກເຊວ ແລະ 326 ppi. ໃຊ້ງານຊິບປະມວນຜົນ Apple A9 APL0898 Dual-core, ຄວາມໄວທີ່ 1840 MHz, Twister, 64-bit ແລະຊິບປະມວນຜົນກຣາບຟິກ PowerVR GT7600 ແບບ 6 ຄໍ, RAM ຍັງບໍ່ທັນມີຂໍ້ມູນ (ແຕ່ຄາດວ່າຈະແມ່ນ 1GB) RAM 2GB, ROM 16/64GB. ຂະໜາດໂຕເຄື່ອງ 4.87 x 2.31 x 0.30 ນິ້ວ (123.8 x 58.6 x 7.6 ມມ) ແລະໜັກປະມານ 113 ກຣາມ
ສຳລັບໃນດ້ານຂອງກ້ອງຫຼັງແມ່ນມີຄວາມລະອຽດ 12 ລ້ານພິກເຊວ (ຮູຮັບແສງ F2.2) ພ້ອມກັບແຟລັດຄູ່ LED ສ່ວນຄຸນສົມບັດໂຟກັດອັດຕະໂນມັັດແລະອື່ນໆແມ່ນມີຄົບ ແລະ ກ້ອງໜ້າຄວາມລະອຽດ 1.2 ລ້ານພິກເຊວ ຮອງຮັບການຈັບພາບວີດີໂອໃນຄວາມລະອຽດ 1280×720 (720p HD)
ສຳລັບໂຕເຄື່ອງຂອງ iPhone SE ນັ້ນແມ່ນເຮັດມາຈາກວັດສະດຸອະລູມີນຽມຄືກັບລຸ້ນອື່ນໆໃນຊີຣີ ຍົກເວັ້ນ iPhone 5c, ມາພ້ອມກັບລະບົບ iOS 9.0, ມີລະບົບສະແກນລາຍນິ້ວມືທີ່ດ້ານໜ້າໂຕເຄື່ອງ (ປຸ່ມ Home) ເຊິ່ງເປັນລຸ້ນເກົ່າຄືກັນກັບ iPhone 6, ຈາກທີ່ຂຽນໄວ້ດ້ານເທິງຄື iPhone SE ເປັນລຸ້ນທີ່ຈະມາແທນທີ່ໃນຕະຫຼາດຂອງ iPhone 5s ເພາະວ່າຖ້າທຽບກັນແລ້ວ SE ມີສະເປັກທີ່ດີກວ່າຫຼາຍແລະຄຸນສົມບັດອື່ນໆກໍດີກວ່າອີກ ສາມາດເບິ່ງຕາຕະລາງປຽບທຽບໄດ້ທີ່ລິ້ງຂ່າວຕົ້ນທາງ
ໃນເລຶ່ອງຂອງລາຄາມີດັ່ງນີ້:
– iPhone SE 16GB $399 (3.240.000 ກີບ) ມີ 4 ສີຄື: Silver, Gold, Space Gray, Rose Gold
– iPhone SE 64GB $499 (4.050.000 ກີບ) ມີ 4 ສີຄື: Silver, Gold, Space Gray, Rose Gold
ເຊິ່ງທັງ 2 ລຸ້ນຈະເປີດໃຫ້ສັ່ງຈອງໃນວັນທີ 24 ມີນານີ້ ແລະຈະປ່ອຍ (ຈັດສົ່ງ) ໃນວັນທີ 31 ມີນາ ສຳລັບກຸ່ມປະເທດທຳອິດມີ: ອອສເຕເລຍ, ແຄນນາດາ, ຈີນ, ຝຣັ່ງ, ເຢຍລະມັນ, ຮ່ອງກົງ, ຍີ່ປຸ່ນ, ນິວ ຊີແລນ, ເປີໂຕ ຣິໂກ, ສິງກະໂປ, ອັງກິດ ແລະ ອາເມຣິກາ
ທີ່ມາ:phonearena