ໃນວັນທີ 18 ມີນາຜ່ານມານີ້, ກະຊວງແຮງງານ ແລະ ສະຫວັດດີການສັງຄົມ, ໄດ້ຈັດກອງປະຊຸມພົບປະກັບກະຊວງແຮງງງານ ແຫ່ງປະເທດໄທ ຂຶ້ນທີ່ໂຮງແຮມລາວ ພລາຊາ, ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ດຣ. ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ພົນເອກ ສີຣິໄຊ ດິດຖະກຸນ ລັດຖະມົນຕີວ່າການກະຊວງແຮງງານ ຂອງປະເທດໄທ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ ໄດ້ກ່າວສະແດງຄວາມຍິນດີຕ້ອນຮັບລັດຖະມົນຕີວ່າການກະຊວງແຮງງານ ຂອງໄທ ທີ່ໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຮ່ວມ, ຖືໄດ້ວ່າເປັນການປະກອບສ່ວນສຳຄັນເຂົ້າໃນການຮັດແໜ້ນຄວາມສາມັກຄີ
ມິດຕະພາບ ແລະ ການເສີມຂະຫຍາຍການພົວພັນຮ່ວມມືລະຫວ່າງສອງປະເທດ ລາວ-ໄທ ເພື່ອເຮັດໃຫ້ການຮ່ວມມືມີຄວາມແໜ້ນແຟ້ນຂຶ້ນຕື່ມ. ໃນກອງປະຊຸມລັດຖະມົນຕີ ຍັງໄດ້ລາຍງານສະພາບການພັດທະນາເສດຖະກິດ-ສັງຄົມ, ວຽກງານແຮງງານ ແລະ ສະຫວັດດີການສັງຄົມຂອງລາວ ແລະ ການຮ່ວມມື 2 ກະຊວງ ຕໍ່ລັດຖະມົນຕີແຮງງານຂອງໄທ, ພ້ອມນັ້ນ ການລົງນາມໃນສັນຍາ MOU ກ່ຽວກັບການຮ່ວມມືດ້ານການຈ້າງງານລາວ-ໄທ ແລະ ໄທ-ລາວ ທີ່ 2 ລັດຖະບານໄດ້ລົງນາມໃນປີ 2002 ຜ່ານມາ, ມັນໄດ້ເຮັດໃຫ້ການສົ່ງ ແລະ ການຮັບແຮງງານທັງສອງປະເທດ ນັບມື້ໄດ້ຮັບການສົ່ງເສີມຫລາຍຂຶ້ນໃນແຕ່ລະປີ, ແຕ່ເມື່ອທຽບໃສ່ກັບຄວາມຮຽກຮ້ອງຕ້ອງການແລ້ວ ເຫັນວ່າຍັງບໍ່ທັນສາມາດຕອບສະໜອງໄດ້ເທື່ອ,ຍ້ອນການລົງນາມດັ່ງກ່າວ ບໍ່ໄດ້ກວມເອົາການຮ່ວມມືດ້ານການພັດທະນາສີມືແຮງງານ ແລະ ການຝຶກວິຊາອາຊີບ,ການຄຸ້ມຄອງ, ການປົກປ້ອງສິດທິ ແລະ ຜົນປະໂຫຍດຂອງຜູ້ອອກແຮງງານ, ຜູ້ໃຊ້ແຮງງານ. ດັ່ງນັ້ນ ຈຶ່ງມີຄວາມຈຳເປັນໃຫ້ປັບປຸງສັນຍາຄືນໃໝ່ໃຫ້ມີຄວາມສອດຄ່ອງກັບສະພາບປັດຈຸບັນຫລາຍກວ່າເກົ່າ.
ແຫລ່ງຂ່າວຈາກ: ໜັງສືພິມລາວພັດທະນາ