ວັນທີ 18 ມີນາຜ່ານມາ ລັດວິສາຫະກິດນ້ຳປະປານະຄອນຫຼວງຮ່ວມກັບສະມາຄົມສາກົນເຈົ້າຄອງນະຄອນຫຼວງທີ່ໃຊ້ພາສາຝຣັ່ງ (AIMF) ແລະ ອົງການນ້ຳແຣັງເມີໄດ້ລົງຢ້ຽມຢາມ ໂຄງການຊ່ວຍເຫຼືອການກໍ່ສ້າງລະບົບນ້ຳປະປາ ບ້ານແກ້ງໝໍ້ ແລະສຳພັນນາ ເມືອງສັງທອງ ນະຄອນຫຼວງວຽງຈັນ, ນຳໂດຍ ທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການລັດວິສາຫະກິດນ້ຳປະປາ ນະຄອນຫຼວງວຽງຈັນ, ທ່ານ SZACOWNY Chistian ຫົວໜ້າອົງການ AIMF ພ້ອມຄະນະ, ທ່ານ ຄຳໝູນ ຕຽງທະລາດ ເຈົ້າເມືອງໆສັງທອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ວຽງທວາຍ ວັນນະລາດ ຮອງອຳນວຍການລັດວິສາຫະກິດນ້ຳປະປາ ນະຄອນຫຼວງວຽງຈັນ ກ່າວວ່າ: ສະມາຄົມຝຣັ່ງ AIMF ແລະອົງການນ້ຳແຣັງ ເມີ ໄດ້ໃຫ້ການຊ່ວຍເຫຼືອໂຄງການກໍ່ສ້າງ ລະບົບນ້ຳປະປາຈຳນວນ 5 ໂຄງການຄື: ໂຄງການກໍ່ສ້າງລະບົບນ້ຳປະປາ ບ້ານຫ້ວຍຄຳ ແລະບ້ານຄົກເພີງທີ່ມີມູນຄ່າການກໍ່ສ້າງ 4,12 ແສນໂດລາ, ມີກຳລັງການຜະລິດ 400 ແມັດກ້ອນຕໍ່ວັນ, ໂຄງການກໍ່ສ້າງລະບົບນ້ຳປະປາບ້ານແກ້ງໝໍ້ ແລະສຳພັນນາ ເມືອງສັງທອງ ໃນມູນຄ່າກໍ່ສ້າງ 2,54 ແສນເອີໂຣ, ກຳລັງການຜະລິດ 500 ແມັດກ້ອນຕໍ່ວັນ, ສ່ວນໂຄງການກໍ່ສ້າງລະບົບນ້ຳປະປາບ້ານນາທາມ ມູນຄ່າກໍ່ສ້າງ 1,64 ແສນ ໂດລາ ມີກຳລັງການຜະລິດ 270 ແມັດ ກ້ອນຕໍ່ວັນ, ໂຄງການກໍ່ສ້າງລະບົບນ້ຳປະປາບ້ານນາຊອນ ເມືອງປາກງື່ມ ມູນຄ່າ 1,51 ຕື້ກີບ ໂດຍກຳລັງການຜະລິດ 300 ແມັດກ້ອນຕໍ່ວັນ ແລະໂຄງການກໍ່ສ້າງລະບົບນ້ຳປະປາບ້ານບໍ່ເຫຼັກກິໂລ ແມັດ 36 ກຸ່ມບ້ານຫົວຊຽງ ເມືອງໄຊທາ ນີ ນະຄອນຫຼວງວຽງຈັນ ມູນຄ່າ 2,27 ແສນໂດລາ ກຳລັງການຜະລິດ 500 ແມັດກ້ອນຕໍ່ວັນ, ຮອດປະຈຸບັນ ປະຊາ ຊົນທົ່ວເມືອງສັງທອງມີນ້ຳປະປາໃຊ້ ພຽງແຕ່ 23% ແລະຍັງເຫຼືອອີກ 77% ແມ່ນບໍ່ທັນມີນ້ຳປະປາໃຊ້ເທື່ອ.
ທ່ານ ວິໄຊ ສີຫຼວງລາດ ນາຍບ້ານໆ ແກ້ງໝໍ້ກ່າວວ່າ: ພາຍຫຼັງທີ່ມີໂຄງການ ກໍ່ສ້າງນ້ຳປະປາຂຶ້ນປະຊາຊົນພວກເຮົາສຸດທີ່ດີໃຈ, ເພາະຜ່ານມາພໍ່ແມ່ປະຊາຊົນພົບຄວາມຫຍຸ້ງຍາກຫຼາຍດ້ານເປັນຕົ້ນແມ່ນການຂາດນ້ຳດື່ມ ນ້ຳໃຊ້ຊຶ່ງພາໃຫ້ຕ້ອງໄດ້ຫາບເອົານ້ຳຈາກແມ່ນ້ຳຂອງຂຶ້ນມາ ຫຼື ໃຊ້ນ້ຳສ້າງ, ດັ່ງນັ້ນ ຈິ່ງເຮັດໃຫ້ການດຳລົງຊີວິດຂອງເຂົາເຈົ້າພົບຄວາມຫຍຸ້ງຍາກ, ແຕ່ປະຈຸບັນ ຫຼັງຈາກໂຄງການກໍ່ສ້າງລະບົບນ້ຳປະປານີ້ສຳເລັດແມ່ນໄດ້ຊ່ວຍໃຫ້ຊີວິດການເປັນຢູ່ຂອງປະຊາຊົນບ້ານແກ້ງໝໍ້ ແລະ ສຳພັນນາໄດ້ຮັບການພັດທະນາດີຂຶ້ນ ແລະປະຊາຊົນ ກໍໄດ້ຊົມໃຊ້ນ້ຳປະປາແລ້ວຫຼາຍກວ່າ 80%, ພ້ອມນັ້ນຍັງມີຄອບຄົວຈຳນວນໜຶ່ງ ທີ່ຍັງບໍ່ທັນໄດ້ໃຊ້ ເນື່ອງຈາກເງື່ອນໄຂເສດຖະກິດຄອບຄົວ ແລະປັດໄຈຫຼາຍຢ່າງທີ່ພາໃຫ້ຍັງບໍ່ທັນໄດ້ຊົມໃຊ້ນ້ຳປະປາເທື່ອ.
ທ່ານ SZACOWNY CHISTIAN ກ່າວວ່າ: ຂ້າພະເຈົ້າມີຄວາມດີໃຈທີ່ໄດ້ໃຫ້ການຮ່ວມມືໃນການສ້າງລະບົບນ້ຳປະປາໃນຈຳນວນ 5 ໂຄງການນີ້, ຊຶ່ງມັນໄດ້ຕິດພັນກັບການຂະຫຍາຍທໍ່ສົ່ງນ້ຳປະປາ ແລະການຕິດຕັ້ງກົງເຕີນ້ຳ ໂດຍແນໃສ່ການຕອບສະໜອງນ້ຳສະອາດ ເພື່ອເຮັດໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນ ແລະເຊື່ອແນ່ວ່າໃນຕໍ່ໜ້າພວກເຮົາກໍຍັງຈະສຶບຕໍ່ໃຫ້ການຊ່ວຍເຫຼືອຕໍ່ໄປຕື່ມ, ສຳລັບການສ້າງໂຄງການກໍ່ສ້າງນ້ຳປະປາໃຫ້ບ້ານທີ່ຍັງບໍ່ທັນມີນ້ຳປະປາໃຊ້ເທື່ອນັ້ນຈະນຳໄປປຶກສາຫາລືກັບພາກສ່ວນກ່ຽວຂ້ອງອີກຄັ້ງໜຶ່ງ.
ທີ່ມາ: