ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໄດ້ຈັດກອງປະຊຸມປຶກສາຫາລືຂອງຄະນະກໍາມະການດ້ານວິຊາການສັກຢາກັນພະຍາດຂຶ້ນໃນຕອນເຊົ້າວັນທີ 18 ມີນາ 2016 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ດຣ. ພັດ ເກິ່ງຊາເນດ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ມີບັນດາຄະນະກໍາມະການດ້ານວິຊາການສັກຢາກັນພະຍາດແຂວງ ນະຄອນຫຼວງວຽງຈັນ ບັນດາຜູ້ອໍານວຍການໂຮງໝໍຂັ້ນສູນກາງ ໂຮງໝໍເມືອງ ສຸກສາລາ ແລະ ຊ່ຽວຊານ ພະນັກງານແພດໝໍທີ່ກ່ຽວຂ້ອງເຂົ້າຮ່ວມ.

ທ່ານຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໄດ້ໃຫ້ຮູ້ວ່າ ການຈັດກອງປະຊຸມໃນຄັ້ງນີ້ແມ່ນເພື່ອທົບທວນຄືນຜົນສໍາເລັດໃນການຈັດຕັ້ງປະຕິບັດວຽກງານສັກຢາ ຢອດຢາກັນພະຍາດທີ່ໄດ້ປະຕິບັດໃນໄລຍະທີ່ຜ່ານມາ ໂດຍສະເພາະແມ່ນການປະຕິບັດການຕອບໂຕ້ພະຍາດໂປລິໂອ ທີ່ເລີ່ມຈັດຕັ້ງປະຕິບັດແຕ່ເດືອນຕຸລາ 2015 ຫາເດືອນກຸມພາ 2016 ທີ່ຜ່ານມາ ຮວມທັງການນໍາສະເໜີບັນດາຄວາມສ່ຽງທີ່ອາດເປັນປັດໄຈໃຫ້ການລະບາດຂອງພະຍາດໂປລິໂອຍັງສືບຕໍ່ ບັນດາມາດຕະການທີ່ຈະຕ້ອງປະຕິບັດເພື່ອສະກັດກັ້ນບໍ່ໃຫ້ມີການລະບາດໃນຕໍ່ໜ້າ ແລະ ທິດທາງແຜນການທີ່ຈະປະຕິບັດວຽກງານສັກຢາ ຢອດຢາກັນພະຍາດໃນຮອບທີ 4-5 ໃຫ້ເດັກແຕ່ອາຍຸລຸ່ມ 1-15 ປີທີ່ບາງແຂວງຍັງປະຕິບັດບໍ່ທັນສໍາເລັດ ແລະ ຊອກຫາວິທີແກ້ໄຂ ທັງນີ້ ເພື່ອຊອກຫາວິທີແກ້ໄຂ ແລະ ມາດຕະການໃນການຈັດຕັ້ງປະຕິບັດຮ່ວມກັນຂອງຫຼາຍພາກສ່ວນ ແນໃສ່ເພື່ອຮັບປະກັນເຮັດໃຫ້ວຽກງານສັກຢາ ຢອດຢາກັນພະຍາດໃນເດັກທຸກກຸ່ມອາຍຸເປົ້າໝາຍ ໃຫ້ບັນລຸຕາມແຜນການທີ່ວາງໄວ້.

ແຫລ່ງຂ່າວຈາກ: ວິທະຍຸ-ໂທທະພາບນະຄອນຫຼວງ