ໃນພິທີຖະແຫຼງຂ່າວເມື່ອບໍ່ດົນມານີ້, ທ່ານຮອງເຈົ້າຄອງນະຄອນຫຼວງວຽງຈັນ ສາຍທອງ ແກ້ວດວງດີ ເປີດເຜີຍວ່າ: ບຸນປີໃໝ່ລາວປີນີ້ນອກຈາກຈະຈັດໃຫ້ຟົດຟື້ນກວ່າທຸກປີຜ່ານມາ, ເພື່ອສະຫຼອງຜົນສຳເລັດຂອງບັ້ນເລືອກຕັ້ງສະມາຊິກສະພາແຫ່ງຊາດ ແລະ ສະພາແຂວງ-ນະຄອນຫຼວງ ເພື່ອປັບປຸງເຂົ້າໃນໂຄງປະກອບລັດຖະບານຢ່າງມີຄຸນນະພາບ, ແຕ່ຕ້ອງຮັບປະກັນໃຫ້ໄດ້ 3ລະດັບຄາດໝາຍຄື: (1) ປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທຳ ແລະ ຮີດຄອງປະເພນີອັນດີງາມຂອງລາວເຮົາທີ່ສືບທອດກັນມາແຕ່ບູຮານນະການ, ໃຫ້ຢູ່ຄຽງຄູ່ກັນຄົນລາວຕະຫຼອດໄປ, (2) ຕ້ອງຮັບປະກັນການສົ່ງເສີມ ແລະ ປົກປັກຮັກສາຮີດຄອງປະເພນີອັນດີງາມຂອງຊາດ, ຕິດພັນກັບການຜະລິດສິນຄ້າ ແລະ ການ
ທ່ອງທ່ຽວ, (3) ຮັບປະກັນສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພຮອບດ້ານ, ຮັບປະກັນໄດ້ຄວາມເບີກບານມ່ວນຊື່ນ, ສະອາດຈົບງາມເພື່ອຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ເຂົ້າມາທ່ຽວນະຄອນຫຼວງວຽງຈັນໃນໂອກາດວັນບຸນໃຫຍ່ຂອງຊາດດັ່ງກ່າວ, ໂດຍຈະຈັດຂຶ້ນເປັນເວລາ 4 ວັນຕາມຮອບວຽນຂອງຮີດຄອງປະເພນີ້ຄື: ວັນທີ 13 – 16 ເມສາທີ່ຈະມາເຖິງ.
ທ່ານຮອງເຈົ້າຄອງໃຫ້ຮູ້ອີກວ່າ: ສຳລັບກິດຈະກຳຕ່າງໆແມ່ນຈະເລີ່ມຈັດຂື້ນໃນວັນທີ 13 ເມສາເປັນຕົ້ນໄປຄື:ຢູ່ບໍລິເວນຫາດດອນຈັນ ແລະ ເສັ້ນທາງແຄມຂອງ, ຖະໜົນເສດຖາທິລາດ, ຈະມີການເປີດຕະຫຼາດນັດວາງສະແດງ ແລະ ຂາຍສິນຄ້າ, ແຂ່ງຂັນກິລາ, ຕົບພະທາດຊາຍ, ແຫ່ນາງສັງຂານ ແລະ ຫົດສົ່ງພະພຸດທະຮູບຕາມປະເພນີ ແລະວັນທີ 16 ຈະມີພິທີໃສ່ບາດ, ຖວາຍສັງຄະທານ, ບາສີສູ່ຂວັນດັ່ງແຕ່ລະຄອບຄົວເຄີຍປະຕິບັດມາ, ເພື່ອສະແດງຄວາມກະຕັນຍູຮູ້ບຸນຄຸນຂອງຜູ້ຫຼັກຜູ້ໃຫຍ່, ດັ່ງນັ້ນຈຶ່ງຮຽກຮ້ອງໃຫ້ພະນັກງານ,ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ຈົ່ງເປັນເຈົ້າການບອກສອນລູກຫຼານຂອງຕົນໃນການຫຼິ້ນບຸນປີໃໝ່ໃຫ້ມີບັນຍາກາດເບີກບານມ່ວນຊື່ນຮັບປະກັນຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພ, ໂດຍສະເພາະແມ່ນການຫົດສົງກັນຕ້ອງໃຊ້ນ້ຳທີ່ສະອາດ, ຫ້າມບໍ່ໃຫ້ເອົານ້ຳໃສ່ຖົງຢາງດຶກ-ແກ່ວງໃສ່ກັນ ແລະ ກ່ອນຈະຫົດສົງແຂກຕ້ອງຂໍອະນຸຍາດຈາກເພິ່ນກ່ອນແລະ ຫ້າມບໍ່ໃຫ້ຫຼິ້ນສິ່ງເປິະເປື້ອນ, ນຸ່ງຖືຕ້ອງໃຫ້ສຸພາບ, ບໍ່ໃຫ້ໂປ້ເປືອຍຈົນເກີນໄປ, ການໄປມາຕ້ອງມີສະຕິ ເພື່ອປ້ອງກັນບໍ່ໃຫ້ມີອຸປະຕິເຫດເກີດຂື້ນ ແລະ ຫ້າມຂັບລົດຢ່າງເດັດຂາດໃນເວລາມີອາການມືນເມົາ
ແຫລ່ງຂ່ວຈາກ: ໜັງສືພິມລາວພັດທະນາ.