ຟິລິບປິນຖືເປັນໜຶ່ງໃນປະເທດທີ່ມີວິໄນໃນການໃຊ້ຈ່າຍເງິນ ໂດຍສະເພາະໃນເລື່ອງການທ້ອນເງິນ ແລະການຈັດສັນການລົງທຶນ.
ຢ່າງໃດກໍຕາມ ສະຖິຕິທີ່ເປີດເຜີຍພົບວ່າ ນັກລົງທຶນຊາວຟິລິບປິນ 4 ຈາກ 10 ຄົນ ສ່ຽງເປັນໜີ້ ແລະກຸ່ມທີ່ມີຄວາມສ່ຽງຫຼາຍທີ່ສຸດມັກເປັນກຸ່ມທີ່ມີອາຍຸຕໍ່າກວ່າ 35 ປີ, ຜົນການສຳຫຼວດອິນເວສເຕີ ເຊນຕິເມນອິນເດັກຂອງມາລູໄລລະບຸວ່າ 41% ຂອງນັກລົງທຶນຊາວຟິລິບປິນເປັນໜີ້ຈາກການບໍລິຫານຄ່າໃຊ້ຈ່າຍສ່ວນຕົວບໍ່ເໝາະສົມ ແລະ ວາງແຜນການເງິນທີ່ບໍ່ສຳເລັດ ໂດຍສ່ວນໃຫຍ່ເປັນໜີ້ໃນເລື່ອງການລົງທຶນເພື່ອການສຶກສາລູກ, ການໃຊ້ຈ່າຍເພື່ອສຸຂະພາບ ລວມທັງນິຍົມໃຊ້ຈ່າຍຜ່ານບັດເຄຣດິດ ໂດຍກຸ່ມຕົວຢ່າງ 41% ເປັນໜີ້ໃລະດັບສູງຫຼາຍ 5-25 ພັນເປໂຊ ແລະ ມີພຽງ 7% ເທົ່ານັ້ນທີ່ເປັນໜີ້ສູງກວ່າ 5 ແສນເປໂຊ, ຊຶ່ງກຸ່ມຕົວຢ່າງສ່ວນໃຫຍ່ມີວິໄນທາງການເງິນດີຫຼາຍ ໂດຍສະເພາະໃນເລື່ອງຂອງການຈົດບັນທຶກຄ່າໃຊ້ຈ່າຍ ແລະ ການທ້ອນເງິນ ໂດຍກຸ່ມຕົວຢ່າງ 99%ມີການບັນທຶກຄ່າໃຊ້ຈ່າຍສະໜໍ່າສະເໝີ ແລະ ມີເງິນທ້ອນໄວ້ເປັນປະຈຳທຸກເດືອນ ຂະນະທີ່ 46% ມີເປົ້າໝາຍໃນການເກັບເງິນ ແລະ ເລີ່ມທ້ອນເງິນຕັ້ງແຕ່ອາຍຸຕໍ່າກວ່າ 30 ປີ ຊຶ່ງກຸ່ມທີ່ຕັ້ງເປົ້າໝາຍໃນການໃຊ້ເງິນ 74% ສາມາດບັນລຸເປົ້າໝາຍການເກັບເງິນໄດ້ພາຍໃນ 4 ປີ.
ຢ່າງໃດກໍຕາມ ເຖິງແມ່ນວ່າຈະມີວິໄນໃນການທ້ອນເງິນ ແຕ່ສ່ວນໃຫຍ່ຍັງລົ້ມເຫຼວໃນການກະຈາຍຄວາມສ່ຽງ ເພາະຫຼາຍຄົນເລືອກທ້ອນເງິນເປັນເງິນເກັບ ແທນທີ່ຈະນຳໄປລົງທຶນເພື່ອສ້າງຜົນຕອບແທນໃນໄລຍະຍາວ, ກຸ່ມຕົວຢ່າງຊາວຟິລິບປິນກວ່າ 80% ເສຍໃຈທີ່ບໍ່ໄດ້ວາງແຜນການລົງທຶນໃຫ້ດີກວ່ານີ້ ແລະ ມຸ່ງລົງທຶນໃນໄລຍະຍາວໜ້ອຍເກີນໄປ ໂດຍ 26% ເສຍໃຈທີ່ເລືອກທ້ອນເງິນເປັນເງິນຝາກ ຫຼືລົງທຶນທີ່ບໍ່ມີເປົ້າໝາຍ ໂດຍກວ່າ 1 ໃນ 4 ລະບຸວ່າ ຄວນສຶກສາເລື່ອງການລົງທຶນໃຫ້ຫຼາຍຂຶ້ນ ຫຼື ຂໍຄວາມເຫັນຈາກທີ່ປຶກສາດ້ານການລົງທຶນ.