ການຫຼິ້ນບຸນປີໃໝ່ລາວຂອງພໍ່ແມ່ປະຊາຊົນບັນດາເຜົ່າແຕ່ລະປີໃນຂອບເຂດທົ່ວປະເທດແຕ່ເໜືອຮອດໃຕ້ໂດຍສະເພາະຢູ່ແຂວງຫຼວງພະບາງແມ່ນມີຄວາມຄຶກຄື້ນພໍສົມຄວນທ່າມກາງຄວາມສົນໃຈນັກທ່ອງທ່ຽວທີ່ມາຈາກທົ່ວສາລະທິດຂອງໂລກເຂົ້າມາຮ່ວມມ່ວນຊື່ນນຳຊາວຫຼວງພະບາງນັບຫຼາຍພັນຄົນຄຽງຄູ່ກັນນັ້ນທາງການນຳຂອງແຂວງກໍຄືອຳນາດການປົກຄອງແຂວງຫຼວງພະບາງໄດ້ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງຈົ່ງເປັນເຈົ້າການນຳກັນໃນການຫຼິ້ນບຸນປີໃໝ່ລາວ 2016 ນີ້ທຸກຄົນໃຫ້ມີສະຕິ, ປະຢັດ, ຮັກວັດທະນະທຳອັນດີງາມຂອງຊາວຫຼວງພະບາງໄວ້ໃຫ້ຍືນຍົງໂດຍປີນີ້ທີ່ແຂວງດັ່ງກ່າວມີຫຼາຍກິດຈະກຳດຶງດູດນັກທ່ອງທ່ຽວ.
ທ່ານດຣ. ຄຳໝັ້ນຈັນທະລົງສີຮອງເຈົ້າແຂວງໆຫຼວງພະບາງ, ຜູ້ຊີ້ນຳວຽກງານວັດທະນະທຳ-ສັງຄົມໄດ້ໃຫ້ຮູ້ຫວ່າງບໍ່ດົນມານີ້ວ່າ: ເພື່ອເຮັດໃຫ້ງານບຸນປີໃໝ່ລາວ 2016 ນີ້ໄດ້ມີບັນຍາກາດຄຶກຄື້ນມ່ວນຊື່ນທ່າມກາງຄວາມສະຫງົບປອດໄພທາງພາກສ່ວນທີ່ກ່ຽວຂ້ອງໄດ້ແຕ່ງຕັ້ງຄະນະກຳມະການແລະອະນຸກຳມະການຮັບຜິດຊອບຈັດງານບຸນກຸດສົງການປີໃໝ່ລາວພສ 2559 ຄສ 2016 ພ້ອມທັງມອບໜ້າທີ່ຮັບຜິດຊອບໃຫ້ແຕ່ລະພະແນກການ, ກົມກອງຂະແໜງການແລະສົມທົບກັບທຸກໆອະນຸກຳມະການເພື່ອຕິດຕາມປະເມີນຜົນສະພາບການເຄື່ອນໄຫວການຈັດຕັ້ງປະຕິດບັດວຽກງານ, ຮັບປະກັນດ້ານຄວາມປອດໄພຮັກສາໄດ້ຄວາມສະຫງົບ, ຄວາມເປັນລະບຽບໃນງານບຸນແລະການໂຄສະນາຜ່ານສື່ຕ່າງໆເພື່ອດຶງດູດນັກທ່ອງທ່ຽວເຂົ້າມາທ່ຽວຊົມພ້ອມນັ້ນຍັງໄດ້ເນັ້ນໃຫ້ແຕ່ລະພາກສ່ວນພ້ອມກັນຈັດຕັ້ງປະຕິບັດໃຫ້ສອດຄ່ອງກັບປະເພນີອັນດີງາມຂອງຊາວເມືອງຫຼວງພະບາງ, ເປັນເຈົ້າການນຳກັນໃນການຫຼິ້ນບຸນປີໃຫມ່ລາວ 2016 ນີ້, ທຸກຄົນໃຫ້ມີສະຕິແລະຫຼິ້ນແບບປະຢັດ, ຮັກສາວັດທະນະທຳອັນດີງາມໄວ້ໃຫ້ຄຽງຄູ່ຢູ່ກັບເມືອງມໍລະດົກໂລກຫຼວງພະບາງ.
ສຳລັບກິດຈະກຳງານບຸນກຸດສົງການປີໃໝ່ລາວຄສ 2016 ນີ້ແມ່ນຈະໄດ້ເລີ່ມຈັດລະຫວ່າງວັນທີ 9-20 ເມສາຈະມາເຖິງນີ້ໃນນັ້ນມີການເປີດຕະຫຼາດນັດວາງສະແດງສິນຄ້າຢູ່ເດີ່ນທາດຫຼວງ, ມີການຈັດການແຂ່ງຂັນກິລາພື້ນເມືອງຂອງຊາວຫຼວງພະບາງ,ຊົມການສະແດງສິລະປະ-ວັນນະຄະດີ, ປະກວດນາງສັງຂານ, ແຫ່ຊ້າງຮຽງເກີຍເຮັດພິທີຢູ່ຂ້າງຫໍພິພິທະພັນແລະແຫ່ໄປຮຽງເກີຍທີ່ໜ້າວັດຊຽງທອງ,ໂລະລາດຫຼືລົງຕະຫຼາດນັດແບບມວນຊົນຢູ່ເສັ້ນທາງໃຈກາງເມືອງ, ຊົມການວາງສະແດງຜະລິດຕະພັນແບບພື້ນເມືອງແລະສິນຄ້າທັງພາຍໃນແລະຕ່າງປະເທດ, ລົງຕົບພະທາດຊາຍທີ່ດອນຊາຍມຸງຄຸນຟາກເມືອງຈອມເພັດໃນນັ້ນຈະມີພິທີຕາມປະເພນີ
ເຊັ່ນ: ການບູຊາພະທາດຊາຍ, ສະແດງສິລະປະ-ວັນນະຄະດີ, ຊົມກີລາພື້ນເມືອງ, ຈູດບັ້ງໄຟຫາງຍາວ, ທ່ຽວຊົມສະຖານທີ່ທ່ອງທ່ຽວຂອງເມືອງ. ຈາກນັ້ນໃນຕອນເຊົ້າຂອງວັນທີ 14 ເມສາບັນດາການນຳເຂົ້າຮ່ວມງານບຸນກໍຈະໄດ້ໄປບາສີສູ່ຂວັນແລະທ່ຽວຊົມບ້ານວັດທະນະທຳບ້ານລື້ຜານົມ, ຕອນບ່າຍວັນດຽວກັນຈະໄດ້ຊົມຂະບວນແຫ່ວໍ້ຢູ່ເສັ້ນທາງສີສະຫວ່າງວົງແຕ່ວັດທາດນ້ອຍຫາວັດຊຽງທອງ, ທັງແຫ່ໄປແລະແຫ່ກັບຊຶ່ງໃນປີນີ້ຂະບວນແຫ່ມີທັງໝົດ 43 ຂະບວນ, ນອກຈາກນີ້ຍັງມີກິດຈະກຳທາງພະພຸດທະສາສະໜາເປັນຕົ້ນແມ່ນການຫົດສົງອົງພະເຈົ້າຕາມວັດແຫ່ງຕ່າງໆໂດຍສະເພາະແມ່ນການແຫ່ເອົາອົງພະບາງພະມິ່ງບ້ານຂວັນເມືອງຂອງຊາວເມືອງຫຼວງພະບາງລົງຫົດສົງຢູ່ວັດໃໝ່ສຸວັນນະພູມມາລາມຂ້າງຫໍພິພິທະພັນ, ປະເພນີໃສ່ບາດຕາມວັດແຫ່ງຕ່າງໆ, ຂຶ້ນບູຊາພະທາດຈອມສີ, ຕອນຄ່ຳຊົມແຫ່ນາກໂຄມໄຟພ້ອມທັງຊົມການສະແດງການຟ້ອນສິລະປະວັນນະຄະດີຈາກໂຮງລະຄອນພະລັກພະລາມຕື່ມອີກ.
ພ້ອມດຽວກັນນັ້ນທ່ານຮອງເຈົ້າແຂວງໆຫຼວງພະບາງຍັງໄດ້ຖືໂອກາດອວຍພອນໃຫ້ບັນດາການນຳທຸກຂັ້ນລວມເຖິງພໍ່ແມ່ພີ່ນ້ອງຊາວລາວໃນຂອບເຂດທົ່ວປະເທດໂດຍສະເພາະແມ່ນຊາວຫຼວງພະບາງຈົ່ງມີແຕ່ຄວາມສຸກກາຍສະບາຍໃຈຕະຫຼອດປີໃໝ່ລາວ, ຄວາມເຈັບຢ່າໄດ້ຄວາມໄຂ້ຢ່າມີປະຕິບັດໜ້າທີ່ວຽກງານໃຫ້ປະສົບຜົນສຳເລັດຍິ່ງໆຂຶ້ນພ້ອມກັນຫຼິ້ນບຸນໃຫ້ມ່ວນຊື່ນ, ມີສະຕິຮັກສາໄດ້ຄວາມສະຫງົບປອດໄພຮອບດ້ານ, ຄຽງຄູ່ໄປກັບການຮັກສາວັດທະນະທຳອັນດີງາມຂອງຊາດລາວເຮົາໄວ້ໃຫ້ຍືນຍົງຕະຫຼອດໄປຈົນຮອດຊົ່ວລູກຊົ່ວຫຼານ.
ທີ່ມາ: