ລັດຖະບານຍີ່ປຸ່ນ ສະໜອງເງິນກູ້ຢືມແກ່ລາວໃນໂຄງການຂະຫຽາຍນໍ້າປະປານະຄອນຫຼວງວຽງຈັນ ມູນຄ່າ 90 ລ້ານໂດລາ
ພິທີລົງນາມເອກະສານແລກປ່ຽນໃນການສະໜອງເງິນກູ້ຢືມດອກເບ້ຍຕໍ່າໃຫ້ແກ່ໂຄງການຂະຫຽາຍນໍ້າປະປານະຄອນຫຼວງວຽງຈັນ ສປປ.ລາວ ມູນຄ່າ 90 ລ້ານໂດລາສະຫະລັດ ຫຼືປະມານ 10,3 ຕື້ເຢັນ (ສະກຸນເງິນຍີ່ປຸ່ນ) ແນໃສ່ຕອບສະໜອງນໍ້າສະອາດໃຫ້ພຽງພໍກັບຄວາມຕ້ອງການພາຍໃນນະຄອນຫຼວງວຽງຈັນ ໄດ້ຈັດຂຶ້ນໃນຕອນບ່າຍວັນທີ 17 ມີນາ 2016 ທີ່ກະຊວງການຕ່າງປະເທດ ລະຫວ່າງ ທ່ານນາງ ຄໍາເຜົາ ເອິນທະວັນ ຮອງລັດຖະມົນຕີກະຊວງການຕ່າງປະເທດ ຕາງໜ້າໃຫ້ລັດຖະບານ ສປປ.ລາວ ແລະ ຕາງໜ້າໃຫ້ລັດຖະບານຍີ່ປຸ່ນ ລົງນາມໂດຍທ່ານ ທາເຄຊິ ຮິກິຮະຣະ ເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງປະເທດຍີ່ປຸ່ນ ປະຈໍາ ສປປ.ລາວ ມີທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ທ່ານ ມະຊະຣິໂກະ ຊິບະຢະມະ ທີ່ປຶກສາພິເສດ ນາຍົກລັດຖະມົນຕີແຫ່ງປະເທດຍີ່ປຸ່ນ ມີບັນດາພະນັກງານວິຊາການ ແລະ ພາກສ່ວນທີ່ກ່ຽວຂ້ອງສອງຝ່າຍເຂົ້າຮ່ວມເປັນສັກຂີພະຍານ.
ທ່ານ ມະຊະຣິໂກະ ຊິບະຢະມະ ໄດ້ກ່າວວ່າ ໂດຍເຫັນໄດ້ວ່າ ປະຊາກອນຢູ່ນະຄອນຫຼວງວຽງຈັນ ຂອງ ສປປ.ລາວ ແມ່ນມີຈໍານວນເພີ່ມຂຶ້ນເລື້ອຍໆ ແລະ ຄາດວ່າຈະເພີ່ມຂຶ້ນຫຼາຍກວ່າ 1 ລ້ານຄົນໃນປີ 2020 ເຊິ່ງການພັດທະນາຂອງໂຕເມືອງ ແລະ ການຈະເລີນເຕີບໃຫຍ່ຂອງເສດຖະກິດ ກໍຈະມີຄວາມຈະເລີນກ້າວໜ້າ ດັ່ງນັ້ນ ການຍົກລະດັບຄວາມສາມາດໃນການສະໜອງນໍ້າຂອງໂຮງງານນໍ້າປະປາ ເພື່ອຕອບສະໜອງຄວາມຕ້ອງການທີ່ເພີ່ມຂຶ້ນແມ່ນເປັນສິ່ງຈໍາເປັນ ແລະ ຮີບດ່ວນ ເນື່ອງຈາກເຄື່ອງຜະລິດນໍ້າປະປາບາງພາກສ່ວນໃນນະຄອນຫຼວງວຽງຈັນ ກໍເຫັນວ່າເກົ່າແກ່ ແລະ ຊຸດໂຊມລົງ ເພື່ອຕອບສະໜອງຄວາມຕ້ອງການນໍ້າດັ່ງກ່າວ ລັດຖະບານຍີ່ປຸ່ນ ຈິ່ງໄດ້ສະໜອງເງິນກູ້ໃຫ້ແກ່ລາວໃນໂຄງການຂະຫຽາຍນໍ້າປະປານະຄອນຫຼວງວຽງຈັນ ມູນຄ່າ 90 ລ້ານໂດລາສະຫະລັດ ເຊິ່ງຂະແໜງນໍ້າປະປາ ແມ່ນຂະແໜງບຸລິມະສິດຂອງການຮ່ວມມືລະຫວ່າງ ຍີ່ປຸ່ນ-ລາວ ລາວ-ຍີ່ປຸ່ນ ມາຮອດປັດຈຸບັນ ຍີ່ປຸ່ນ ໄດ້ໃຫ້ການຊ່ອຍເຫຼືອໃນການກໍ່ສ້າງໂຮງງານຜະລິດນໍ້າປະປາ ທັງຢູ່ໃນພື້ນທີ່ນະຄອນຫຼວງວຽງຈັນ ແລະ ໂຕເມືອງຕ່າງໆຢູ່ບັນດາແຂວງຂອງ ສປປ.ລາວ ທັງໃຫ້ຄວາມຮ່ວມມືໃນຂະແໜງການເຕັກນິກວິຊາການ ໂດຍນັກຊ່ຽວຊານ ແລະ ພະນັກງານຈາກອົງກອນທ້ອງຖິ່ນຍີ່ປຸ່ນ ເພື່ອປັບປຸງສິ່ງແວດລ້ອມ ສຸຂະອະນາໄມຂອງປະຊາຊົນ ແລະ ເພື່ອສົ່ງເສີມການພັດທະນາອຸດສາຫະກໍາໃນນະຄອນຫຼວງວຽງຈັນ.
ຂ່າວ/ພາບ: ເທບພະວົງ
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ