ໂດຍການສະໜັບສະໜູນຈາກແຜນງານທູດວິທະຍາສາດຂອງສະຫະລັດອາເມຣິກາ ບັນດາຊ່ຽວຊານໃນຂະແໜງໂພຊະນາການກ່ຽວກັບເດັກນ້ອຍຈາກປະເທດລາວ ຫວຽດນາມ ກຳປູເຈຍ ມຽນມາ ແລະ ອົສຕຣາລີ ພ້ອມກັນເຮັດວຽກເພື່ອແກ້ໄຂບັນຫາສິ່ງທ້າທາຍທາງດ້ານໂພຊະນາການເດັກ ແລະ ລິເລີ່ມຂະບວນການສ້າງຄວາມກ້າວໜ້າທາງວິທະຍາສາດໃນອາຊີຕາເວັນອອກສະຫຼຽງໃຕ້ ທູດວິທະຍາສາດ ສະຫະລັດອາເມຣິກາ ທ່ານ ດຣ. ເຈີຣາດີນຣິກເມີນ ໃຫ້ການສະໜັບສະໜູນ ຈັດກອງປະຊຸມລະດັບຂົງເຂດເປັນຄັ້ງທຳອິດພາຍໃຕ້ຫົວຂໍ້ ພັດທະນາການວິທະຍາສາດທາງມັນສະໜອງ ແລະ ການຂາດໂພຊະນາການເຮັດໃຫ້ຈະເລີນເຕີບໃຫຍ່ຊ້າ ກໍລະນີສຶກສາທີ່ສຳຄັນເພື່ອປະຕິບັດໃນໄລຍະ 1.000 ວັນທຳອິດ ຈັດຂຶ້ນທີ່ຫຼວງພະບາງ ໃນວັນທີ 16-18 ມີນາ 2016.
ກອງປະຊຸມນີ້ ແມ່ນຄັ້ງທຳອິດຂອງສາມກອງປະຊຸມລະດັບຂົງເຂດທີ່ຈະຈັດຂຶ້ນໃນບັນດາປະເທດທີ່ມີສ່ວນຮ່ວມ ເຊິ່ງຈຸດປະສົງກໍເພື່ອສ້າງຄວາມຮັບຮູ້ໃຫ້ແກ່ບັນດານັກສັງຄົມວິທະຍາສາດກ່ຽວກັບຄວາມກ້າວໜ້າຂອງບັນຫາໂພຊະນາການທີ່ແກ່ຍາວ ການກຳນົດຍຸດທະສາດການແກ້ໄຂ ແລະ ການສ້າງແຜນການເພື່ອເຮັດໃຫ້ບັນຫາໂພຊະນາການຫຼຸດລົງໃນຂົງເຂດ ຮອດປີ 2020 ໃນວາລະດໍາເນີນກອງປະຊຸມ ຍັງຈະຊ່ອຍສ້າງເຄື່ອຂ່າຍບັນດານັກຄົ້ນຄວ້າມືອາຊີບໃນລະດັບຂົງເຂດທີ່ມີຄວາມສົນໃຈໃນການປະສານງານກັນຕໍ່ກັບຂະແໜງໂພຊະນາການຕ່ຳ ແລະ ການພັດທະນາທາງມັນສະໝອງ ເຊິ່ງເຄື່ອຂ່າຍຂອງບັນດາຜູ້ປະສານງານນີ້ ຈະຊ່ອຍວາງແນວທາງຄົ້ນຄວ້າໃນຂົງເຂດອາຊີຕາເວັນອອກສະຫຼຽງໃຕ້ ແລະ ຍັງຈະມີສ່ວນຮ່ວມໃນການພັດທະນາຍຸດທະສາດ ເພື່ອສ້າງຄວາມຮູ້ໃຫ້ສັງຄົມຂອງບັນດານັກສ້າງນະໂຍບາຍ ແລະ ຜູ້ນຳກ່ຽວກັບປັດໄຈທີ່ຈະປະກອບສ່ວນຊ່ອຍແກ້ໄຊບັນຫາພັດທະນາການຈະເລີນເຕີບໃຫຍ່ຊ້າຂອງເດັກໃນໄລຍະ 1.000 ວັນທຳອິດຂອງຊີວິດເດັກນ້ອຍ.
ຂ່າວ/ພາບ: ຈະເລີນສຸກ ສໍປະເສີດ
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ