ເພື່ອສະເຫຼີມສະຫຼອງການສ້າງສາຍພົວພັນທາງການທູດລະຫວ່າງ ລາວ-ຈີນ ຄົບຮອບ 55 ປີ ແລະ ເສີມຂະຫຽາຍສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ ລາວ-ຈີນ ຊຸກຍູ້ໃຫ້ໄມຕີຈິດມິດຕະພາບລະຫວ່າງປະຊາຊົນສອງຊາດ ໃຫ້ມີຄວາມແໜ້ນແຟ້ນຍິ່ງຂຶ້ນ ທັງເປັນການໄຂໂອກາດໃຫ້ປະຊາຊົນລາວ ແລະ ຈີນ ສາມາດສະແດງອອກເຊິ່ງຄວາມສາມາດທາງດ້ານການຮ້ອງເພງພາສາຈີນ ດັ່ງນັ້ນ ວິທະຍຸສາກົນແຫ່ງປະເທດຈີນ (CRI) ປະຈໍາ ສປປ.ລາວ ແລະ ສະຖາບັນຂົງຈື້ ມະຫາວິທະຍາໄລແຫ່ງຊາດ ຈະຈັດງານແຂ່ງຂັນຮ້ອງເພງພາສາຈີນ ເຊິ່ງເລີ່ມຮັບສະໝັກນັບຈາກນີ້ເປັນຕົ້ນໄປ ແລະ ຈະຢຸດຮັບສະໝັກໃນວັນທີ 29 ມີນາ 2016.
ທ່ານ ດວງພະຈັນ ຫຼື ເມີງຫຼົງ ຫົວໜ້າວິທະຍຸ CRI ປະຈໍາ ສປປ.ລາວ ໄດ້ຖະແຫຼງວ່າ ການແຂ່ງຂັນຮ້ອງເພງພາສາຈີນໃນຄັ້ງນີ້ ເປັນຄັ້ງທີ 2 ທີ່ຈັດຂຶ້ນຢູ່ ສປປ.ລາວ ເປັນການເປີດກວ້າງໃຫ້ປະຊາຊົນທຸກຊັ້ນຄົນສາມາດເຂົ້າຮ່ວມສະໝັກຮ້ອງເພງໄດ້ ໂດຍຈະແບ່ງອອກເປັນ 2 ສາຍຄື ສາຍຄົນຈີນ ແລະ ສາຍຄົນລາວ ຮ້ອງເພງຈີນ ສໍາລັບລາງວັນມີອັນດັບທີ 1-3 ຂອງແຕ່ລະສາຍ ແລະ ລາງວັນທີ 1 ແມ່ນຈະໄດ້ຮັບເງິນສົດ 1.000 ໂດລາສະຫະລັດ ຫຼື ປະມານ 8 ລ້ານກີບ ນອກນີ້ ຍັງມີລາງວັນພິເສດຄື ຜູ້ຊະນະເລີດໃນສາຍຄົນລາວຮ້ອງເພງຈີນ ຈະມີໂອກາດໄປທັດສະນະສຶກສາ ແລະ ສະແດງການຮ້ອງເພງຢູ່ປະເທດຈີນ ທີ່ສະໜັບສະໜູນໂດຍສູນວັດທະນະທໍາຈີນ ປະຈໍາລາວ ລາງວັັນທີ 2 ຈະໄດ້ໄປທ່ອງທ່ຽວທີ່ປະເທດຈີນທີ່ສະໜັບສະໜູນໂດຍສະຖາບັນຂົງຈື້.
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ