ເພື່ອເປັນການສ້າງຂະບວນການ ຄໍານັບຮັບຕ້ອນວັນສໍາຄັນຂອງຊາດ ຂອງພັກ ໂດຍສະເພາະແມ່ນການກະກຽມຄວາມພ້ອມໃຫ້ແກ່ຂະບວນການປ່ອນບັດເລືອກຕັ້ງຂອງສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກສະພາປະຊາຊົນຂັ້ນແຂວງ ນະຄອນຫຼວງ ທີ່ຈະມີຂຶ້ນໃນວັນທີ 20 ມີນາ 2016 ໃຫ້ມີຜົນສໍາເລັດດ້ວຍດີ ພ້ອມດຽວກັນ ກໍເພື່ອເປັນການປະກອບສ່ວນເຂົ້າໃນການຊ່ອຍເຫຼືອກອບກູ້ເອົາຊີວິດຄົນເຈັບປ່ວຍທີ່ຕ້ອງການເລືອດ ເຊິ່ງພວມນອນປິ່ນປົວຢູ່ຕາມໂຮງໝໍແຫ່ງຕ່າງໆໃນຂອບເຂດທົ່ວປະເທດ ເຊິ່ງມີຄວາມຈໍາເປັນ ແລະ ຕ້ອງການເລືອດນັບວັນມີຈໍານວນເພີ່ມຂຶ້ນ.

ສູນເລືອດແຫ່ງຊາດ ອົງການກາແດງລາວ ຮ່ວມກັບບັນດາກະຊວງ ອົງການຈັດຕັ້ງທາງສັງຄົມຕ່າງໆ ໄດ້ຈັດກິດຈະກໍາບໍລິຈາກເລືອດຂຶ້ນໃນຕອນເຊົ້າວັນທີ 16 ມີນາ 2016 ທີ່ໂຮງຮຽນ ມສ. ມິດຕະພາບ ນະຄອນຫຼວງວຽງຈັນ-ໂຮ່ຈິມິນ ເມືອງສີໂຄດຕະບອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ດຣ. ແພງທອງບານ ຈັນທະວົງ ຮອງຫົວໜ້າສູນເລືອດແຫ່ງຊາດ ອົງການກາແດງລາວ ມີບັນດາພະນັກງານ ລັດຖະກອນ ຈາກອົງການຈັດຕັ້ງຕ່າງໆທັງພາກລັດ-ເອກະຊົນ ບັນດານັກຮຽນ ນັກສຶກສາ ຈາກໂຮງຮຽນມັດທະຍົມສົມບູນ ແລະ ສະຖາບັນການສຶກສາຫຼາຍແຫ່ງ ພ້ອມດ້ວຍ ວິຊາການແພດໝໍ ທີ່ກ່ຽວຂ້ອງເຂົ້າຮ່ວມເປັນຈໍານວນຫຼວງຫຼາຍ.