ເຈົ້າພາບ ມະຫາວິທະຍາໄລແຫ່ງຊາດລາວ ຍັງແຮງຕໍ່ເນື່ອງ
ໂດຍສະເພາະກີລາກະຕໍ້ເກັບເພີ່ມອີກ 1 ຫຼຽນຄໍາຈາກປະເພດທີມຊຸດຄູ່ຍິງ ຫຼັງເອົາຊະນະ ວິທະຍາໄລພາກລັດ ໄປດ້ວຍຄະແນນ 2-1 ຄູ່ໃນຮອບຊີງຫຼຽນຄໍາ ເມື່ອວັນທີ 14 ມີນາທີ່ຜ່ານມາ ພ້ອມທັງເປັນຄອງແຊັມກີລາກະຕໍ້ ເກັບໄດ້ 3 ຈາກການຊີງໄຊທັງໝົດ 6 ຫຼຽນຄໍາ
ການແຂ່ງຂັນກະຕໍ້ທີມຊຸດຄູ່ຍິງມີ 4 ພາກສ່ວນເຂົ້າຮ່ວມແຂ່ງຂັນກັນທັງໝົດ 3 ຄູ່ ເຊິ່ງໃນຮອບຊີງຊະນະເລີດປະກົດວ່າ: ຄູ່ທໍາອິດເຈົ້າພາບ ມຊ ພາດທ່າເສຍໃຫ້ກັບ ວິທະຍາໄລພາກລັດ 2-0 ເຊັດ 21-12 ແລະ 21-14 ກ່ອນທີ່ຄູ່ທີ 2 ມຊ ຈະແກ້ຕົວໄດ້ດ້ວຍການເອົາຊະນະໄປ 2-0 ເຊັດເຊັ່ນກັນ ເຮັດໃຫ້ຕ້ອງໄປຕັດສິ້ນທີ່ຄູ່ທີ 2 ແລະ ກໍ່ເປັນເຈົ້າພາບ ມະຫາວິທະຍາໄລແຫ່ງຊາດ ທີ່ຄູ່ສຸດທ້າຍຈັດຊຸດເກັ່ງນໍາໂດຍ ນາງ ກ້ອຍ ໄຊຍາວົງ ແລະ ນາງ ນໍຄໍາ ວົງໄຊ ແລະ ກໍ່ເອົາຊະນະ ວິທະຍາໄລພາກລັດ ທີ່ນໍາໂດຍ ນາງ ປະທຸມພອນ ພົມມະຈັນ ແລະ ນາງ ສາຍຊົນ ໄຊຊະວົງສາ ໄປດ້ວຍຄະແນນ 2-0 ເຊັດ 21-8 ແລະ 21-12 ຄວ້າຫຼຽນຄໍາປະເພດທີມຊຸດຍິງຄູ່ ພ້ອມທັງສົ່ງຜົນໃຫ້ ມຊ ເກັບຫຼຽນຄໍາຫຼຽນທີ 3 ຈາກກີລາກະຕໍ້ຕໍ່ຈາກ ທີມດ່ຽວຍິງ ແລະ ທີມຄູ່ຍິງ ເປັນເຈົ້າຫຼຽນຄໍາກະຕໍ້ໃນງານມະຫາກໍາກີລາ ກມລ 1 ສ່ວນຫຼຽນທອງ ແລະ ຫຼຽນທອງຮ່ວມຕົກເປັນຂອງ ມະຫາວິທະຍາໄລຈໍາປາສັກ ແລະ ມະຫາວິທະຍາໄລສະຫວັນນະເຂດ.
ຂະນະທີ່ ປະເພດທີມຊຸດຊາຍມີ 7 ພາກສ່ວນເຂົ້າຮ່ວມ ເຊິ່ງຫຼຽນຄໍາປະເພດທີມຊຸດຊາຍຕົກເປັນຂອງ ມະຫາວິທະຍາໄລສະຫວັນນະເຂດ ທີ່ສາມາດເອົາຊະນະ ວິທະຍາຄານປ້ອງກັນຄວາມສະຫງົບ ໃນຮອບຊີງຊະນະເລີດ ສ່ວນຫຼຽນທອງ ແລະ ຫຼຽນທອງຮ່ວມຕົກເປັນຂອງ ມຊ ແລະ ວິທະຍາໄລຈໍາປາສັກ ສໍາລັບການແຂ່ງຂັນກີລາກະຕໍ້ໃນງານມະຫາກໍາກີລາ ມະຫາວິທະຍາໄລລາວ ຄັ້ງທີ 1 ມີການຊີງໄຊ 6 ຫຼຽນຄໍາປະກົດວ່າ ເຈົ້າພາບ ມະຫາວິທະຍາໄລແຫ່ງຊາດ ກວາດໄປ 3 ຫຼຽນຄໍາ (ຄູ່ຍິງ, ດ່ຽວຍິງ ແລະ ທີມຊຸດຄູ່ຍິງ), 2 ຫຼຽນເງິນ ແລະ 1 ຫຼຽນທອງ ຄອງແຊັມກະຕໍ້ໃນ ກມລ 1 ຂະນະທີ່ ອັນດັບ 2 ເປັນຂອງ ວິທະຍາຄານປ້ອງກັນຄວາມສະຫງົບ ກວາດໄປ 2 ຫຼຽນຄໍາ (ກະຕໍ້ຄູ່ຊາຍ ແລະ ດ່ຽວຊາຍ) ແລະ 1 ຫຼຽນເງິນ ສ່ວນອັນດັບ 3 ເປັນຂອງ ມະຫາວິທະຍາໄລສະຫວັນນະເຂດ 1 ຫຼຽນຄໍາ (ທີມຊຸດຊາຍ) ແລະ 4 ຫຼຽນເງິນ.
ຂ່າວຈາກ: ຫຼ້າເອັມເຄພີ
ຮູບຈາກ: ຈອນນີ ໄນໂຕ.
ແຫລ່ງຂ່າວຈາກເຟສບຸກ: ຄວາມເຄື່ອນໄຫວ+ເຈາະເລິກ ຂ່າວສານກີລາລາວ-ສາກົນ