ວັນທີ 11 ມີນາ 2016 ເວລາ 10:00 ໂມງ ຕຳຫຼວດຈັງຫວັດມະຫາສາລະຄາມ ປະເທດໄທ ໄດ້ຖະແຫຼງຂ່າວຈັບກຸມຜູ້ຕ້ອງຫາຄ້າຢາເສບຕິດ ຄື ທ້າວ ສົມເພັດ ຫຼື ສົມບັດ ເພັດສະລາດ ອາຍຸ 48 ປີ ພ້ອມຂອງກາງ ຢາບ້າ ຈຳນວນ 16,000 ເມັດ ໂທລະສັບມືຖື 1 ໜ່ວຍ ໜັງສືເດິນທາງ(ພາສປອດ)ລາວ 1 ຫົວ ກະເປົາລາຍແຊກ 1 ໜ່ວຍ ໂດຍກ່າວຫາວ່າ ມີຢາເສບຕິດໃຫ້ໂທດປະເພດ 1 (ຢາບ້າ) ໄວ້ໃນຄອບຄອງເພື່ອຈຳໜ່າຍໂດຍຜິດກົດໝາຍ.
ໂດຍສືບເນື່ອງຈາກເມື່ອວັນທີ 22 ກຸມພາ 2016 ຕຳຫຼວດ ຈັງຫວັດມະຫາສາລະຄາມ ໄດ້ຈັບກຸມຜູ້ຕ້ອງຫາ 1 ຄົນ ໄດ້ຂອງກາງເປັນຢາບ້າ 600 ເມັດ ທີ່ອຳເພີ(ເມືອງ)ນາເຊືອກ, ຈັງຫວັດ(ແຂວງ)ມະຫາສາລະຄາມ ຈາກການສືບສວນຂະຫຍາຍຜົນເພິ່ມເຕີມຈຶ່ງຮູ້ວ່າ ເຄືອຂ່າຍກຸ່ມຜູ້ຄ້າຢາບ້ານດັ່ງກ່າວເປັນຜູ້ຍິງຊຶ່ງມີສັນຍາດຊາວ ຮູ້ພຽງຊື່ເອີ້ນວ່າ ເຈ້ ຈະເປັນຜູ້ຄອຍສັ່ງໃຫ້ລັກລອບເອົາຢາບ້າໄປແຈກຢາຍໃຫ້ກັບລູກຄ້າໃນປະເທດໄທ ເຈົ້າໜ້າທີ່ຕຳຫຼວດຈຶ່ງໄດ້ເຝົ້າຕິດຕາມຄວາມເຄື່ອນໄຫວຢ່າງຕໍ່ເນື່ອງ.
ຈົນຮອດວັນທີ 10 ມີນາ 2016 ເຈົ້າໜ້າທີ່ຕຳຫຼວດສາຍລັບໄດ້ຫຼອກຊື້ຢາບ້າ ໂດຍຕິດຕໍ່ຜ່ານທາງຜູ້ຍິງສັນຊາດລາວທີ່ຊື່ ເຈ້ ແລະມີການນັດສົ່ງຢາບ້າໃນເຂດເທສະບານອຳເພີເມືອງມະຫາສາລະຄາມ ໂດຍໃຊ້ລົດໂດຍສານສາທາລະນະໃນການເດິນທາງ ເຈົ້າໜ້າທີ່ຕຳຫຼວດຈຶ່ງໄດ້ວາງແຜນເພື່ອຈັບກຸມ ຈຶ່ງໄດ້ເອົາກຳລັງໄປຈອບຢູ່ບໍລິເວນສະຖານີລົດເມມະຫາສາລະຄາມ.
ພໍເຖິງເວລາສາຍລັບກໍໄດ້ຮັບໂທລະສັບປະສານມາໃຫ້ໄປຮັບຢາບ້າຢູ່ບໍລິເວນຂ້າງຕູ້ເອທີເອັມ ທາງເຂົ້າຕະຫຼາດ ເອັກຊ໌ໂປ ຖະໜົນຣິມຄອງສົມຖະຫວິນ ເມື່ອເຈົ້າໜ້າທີ່ຕຳຫຼວດໄປຮອດຈຶ່ງພົບເຫັນຊາຍຜູ້ຕ້ອງສົງໄສຢືນຢູ່ບໍລິເວນຂ້າງຕູ້ເອທີເອັມ ໂດຍຊາຍດັ່ງກ່າວພາຍຖົງລາຍແຊກຂະໜາດໃຫຍ່ ມີທ່າທາງພິລຸດໜ້າສົງໄສ ເຈົ້າໜ້າທີ່ຕຳຫຼວດຈຶ່ງເຂົ້າສະແດງໂຕເປັນເຈົ້າໜ້າທີ່ຕຳຫຼວດ ພ້ອມທັງກວດຄົ້ນ.
ຈາກການກວດຄົ້ນພົບຂອງກາງເປັນຢາບ້າດັ່ງກ່າວ ເຈົ້າໜ້າທີ່ຕຳຫຼວດຈຶ່ງໄດ້ກວດຢຶດໄວ້ເປັນຂອງກາງ ຜູ້ຕ້ອງຫາໃຫ້ການຍອມຮັບວ່າ ຢາບ້າຈຳນວນ 16,000 ເມັດ ທີ່ເຈົ້າໜ້າທີ່ກວດຄົ້ນໄດ້ຈາກຄວາມຄອບຄອງຂອງຕົນນັ້ນ ເປັນຂອງຜູ້ຕ້ອງຫາທີ່ໄດ້ລັກລອບເອົາມາເພື່ອສົ່ງມອບໃຫ້ກັບລູກຄ້າໃນເຂດເທສະບານເມືອງມະຫາສາລະຄາມ.
ແລະຜູ້ຕ້ອງຫາໃຫ້ການເພິ່ມເຕີມວ່າ ເມື່ອວັນທີ 10 ມີນາ 2016 ໃນເວລາປະມານ 5:00 ໂມງ ຜູ້ຕ້ອງຫາໄດ້ໄປເກັບເອົາຢາບ້າທີ່ເອົາມາຖິ້ມໄວ້ໃນເຂດພື້ນທີ່ ອຳເພີທາດພະນົມ ຈັງຫວັດນະຄອນພະນົມ ໂດຍໄດ້ຮັບຄ່າຈ້າງຈາກຍິງຊາວລາວທີ່ຊື່ ເຈ້ ວ່າຈ້າງໃຫ້ເອົາຢາບ້າຈຳນວນດັ່ງກ່າວ ນຳມາສົ່ງມອບໃຫ້ແກ່ລູກຄ້າໃນເຂດ ຈັງຫວັດມະຫາສາລະຄາມ ໂດຍຈະໄດ້ຮັບຄ່າຈ້າງເປັນເງິນ ຈຳນວນ 50,000 ບາດ (ສະກຸນເງິນໄທ) ຫຼັງຈາກທີ່ສົ່ງມອບຢາບ້າແລ້ວຮຽບຮ້ອຍ.