ສຳນັກຂ່າວຕ່າງປະເທດ ລາຍງານໃນວັນທີ 13 ມີນາຜ່ານມານີ້ວ່າ ໃນວັນເສົາທີ 12 ມີນາ 2016 ມຽນມາໄດ້ເປີດນຳໃຊ້ ອາຄານຜູ້ໂດຍສານຫລັງໃໝ່ ຂອງສະໜາມບິນສາກົນຢາງກຸ້ງ ພາຍໃຕ້ການເຂົ້າຮ່ວມຂອງ ທ່ານ ເທັນເຊັນ ປະທານາທິບໍດີມຽນມາ ພ້ອມດ້ວຍບັນດາຄະນະລັດຖະມົນຕີ ແລະ ທ່ານເອກອັກຄະລັດຖະທູດຈີນ ປະຈຳມຽນມາ.
ອາຄານຜູ້ໂດຍສານຫລັງໃໝ່ດັ່ງກ່າວ ສູງທັງໝົດ 3 ຊັ້ນ ປະກອບດ້ວຍຫ້ອງໂຖງຜູ້ໂດຍສານຂາເຂົ້າ ແລະ ຜູ້ໂດຍສານຂາອອກ ລວມທັງປະກອບມີສູນການຄ້າ ຊຶ່ງສາມາດຮອງຮັບຜູ້ໂດຍສານໄດ້ ປະມານ 6 ລ້ານຄົນຕໍ່ປີ.
ທັງນີ້ ປັດຈຸບັນສະໜາມບິນສາກົນຢາງກຸ້ງ ສາມາດຮອງຮັບຖ້ຽວບິນຂອງສາຍການບິນທ້ອງຖິ່ນ 30 ສາຍ ແລະ ສາຍການບິນລະຫວ່າງປະເທດອີກ 10 ສາຍ ດ້ວຍການໃຫ້ບໍລິການຜູ້ໂດຍສານ ຫລາຍກວ່າ 4 ລ້ານຄົນ ໃນປີ 2015 ຜ່ານມາ.
