ເມື່ອ ນຶກເຖິງຍິງໄວອາຍຸ 72 ປີ ທີ່ຍ່າງຫິ້ວເຄື່ອງຂາຍຫຼາຍຄົນອາດຈະຄິດເຫັນພາບຄົນໆໜຶ່ງທີ່ແກ່ຊະລາຫຼາຍສົມຄວນບໍ່ວ່າດ້ານຜີວໜັງ, ຮ່າງກາຍ, ການຍ່າງລວມເຖິງການນຸ່ງຖື, ຍີ້ມຫົວ ແລະ ການປາກເວົ້າ ອາດຈະມີການຫຼົງໆ ລືມໄປເລັກໜ້ອຍແຕ່ແມ່ເຖົ້າ ຈັນ ຢູ່ບ້ານໂພນສະອາດ ເມືອງ ແລະແຂວງຫຼວງພະບາງ ເຖິງອາຍຸສັງ ຂານຈະລ່ວງເລີຍມາຮອດ 72 ປີ ແລ້ວ ກໍບໍ່ເຄີຍທໍ້ຖ້ອຍຕໍ່ກັບຊີວິດ, ເຮັດທຸກສິ່ງທຸກຢ່າງເພື່ອແລກກັບ ເງິນລ້ຽງຊີບຕົນເອງເຖິງລາຍຮັບ ບໍ່ສູງກໍຕາມແຕ່ຕ້ອງຍີ້ມທົນສູ້ ເພື່ອ ຄວາມສຸກຂອງຊີວິດບັ້ນປາຍ.
ແມ່ເຖົ້າ ຈັນ ນັກສູ້ຊີວິດບັ້ນປາຍທີ່ຮ່າງກາຍຍັງເຕັມໄປດ້ວຍຄວາມແຂງແຮງຫິ້ວເຄື່ອງຂາຍ ໄດ້ເລົ່າສູ່ຜູ້ຂຽນຟັງວ່າ: ຕົນເອງ ໄດ້ເລີ່ມຫິ້ວເຄື່ອງຂາຍແບບນີ້ມາ ເປັນເວລາພໍດີ 42 ປີ ທຸກວັນໃນ ຕອນເຊົ້າຕ້ອງໄດ້ໄປຊື້ເອົາເຂົ້າ ຕົ້ມ, ຂົ້ວມີ່, ຂົ້ວເຝີ ນຳບັນດາແມ່ຄ້າມາຍ່າງຂາຍໃຫ້ພະນັກງານ ບັນດາຫ້ອງການຕ່າງໆຢູ່ພາຍໃນເທສະບານເມືອງຫຼວງພະບາງອີງ ຕາມຄວາມສາມາດຍ່າງໄປໄດ້, ມີລາຍຮັບມື້ໜຶ່ງປະມານ 50-60 ພັນກີບຕໍ່ວັນເມື່ອຫັກຕົ້ນທຶນອອກ. ເງິນທີ່ໄດ້ກຳໄລກໍພໍແຕ່ໄດ້ຊື້ຢູ່ຊື້ກິນລ້ຽງລູກຫຼານໄປວັນໆ. ຕະ ຫຼອດໄລຍະ 42 ປີແມ່ເຖົ້າ ຈັນຜູ້ເຂັ້ມແຂງທາງດ້ານຮ່າງກາຍ ແລະ ຈິດໃຈຢາດເຫື່ອເພື່ອຫາເງິນລ້ຽງຊີບຫີ້ວເຄື່ອງຂາຍໃນເມື່ອ ກ່ອນເວົ້າເຖິງເຫື່ອແຮງອາດຈະມີຫຼາຍ ແຕ່ປະຈຸບັນອາຍຸໄດ້ 72 ປີແຕ່ຍັງຫິ້ວເຄື່ອງຂາຍທີ່ມີນ້ຳໜັກບໍ່ຕ່ຳກວ່າ 15-20 ກິໂລກຣາມ, ມີທັງກະຕ່າຫິ້ວ, ໃສ່ຖົງຢາງບາງທີໄລຍະທາງໄກແດ່ກໍຕ້ອງໄດ້ປະໄວ້ແລ້ວຄ່ອຍຂົນໄປເທື່ອລະໜ້ອຍ ຕາມແຮງຕົນເອງຮັບໄດ້.
ເມື່ອໄປຂາຍຢູ່ບັນດາໂຮງຮຽນ, ພະແນກການອ້ອມຂ້າງພະນັກງານກໍໄດ້ພາກັນອອກມາຊື້ຊ່ວຍແມ່ເຖົ້າ ຈັນ ເພາະໃນຕອນເຊົ້າບາງຄົນໄປການກະບໍ່ທັນໄດ້ ກິນເຂົ້າເຊົ້າຕ້ອງໄດ້ຊື້ຂົ້ວມີ່, ຂົ້ວເຝີ, ເຂົ້າຕົ້ມ. ຍ້ອນວ່າຫິ້ວເຂົ້າບໍ່ທັນ ມີຫຍັງກິນ ກິນແກ້ໄຂໃຫ້ກະເພາະໃນຕອນເຊົ້າຈົນເຮັດໃຫ້ແມ່ເຖົ້າ ຈັນ ໄດ້ສັນຍານາມຈາກບັນດາພະນັກງານຫຼາຍຄົນວ່າເປັນແມ່ເຖົ້າ ແກ້ໄຂຈົນຕິດຫູ.
ຂໍ້ມູນຈາກ: ໜັງສືພິມເສດຖະກິດ-ສັງຄົມ.