ມ.ປາຍ ໂພນສະຫວັນ ແຂວງ ຊຽງຂວາງ ຈັດພິທີໄຂການແຂ່ງຂັນກີລາ-ສິລະປະ ທົ່ວໂຮງຮຽນ ຄັ້ງທີ VII
ພິທີໄຂການແຂ່ງຂັນກີລາ – ສີລະປະ ທົ່ວໂຮງຮຽນ ຄັ້ງທີ VII ຂອງໂຮງຮຽນມັດທະຍົມຕອນປາຍໂພນສະຫວັນ ແຂວງຊຽງຂວາງ ໄດ້ຈັດຂຶ້ນໃນຕອນເຊົ້າຂອງວັນທີ 10 ມີນາ 2016 ຜ່ານມາ ທີ່ເດີ່ນໂຮງຮຽນດັ່ງກ່າວ ພາຍໃຕ້ການເປັນປະທານຂອງທ່ານອາຈານ ຄຳສິງ ເພັດສີຄຳ ຮອງອຳນວຍການໂຮງຮຽນມັດທະຍົມຕອນປາຍໂພນສະຫວັນ ໂດຍການໃຫ້ກຽດເຂົ້າຮ່ວມຂອງທ່ານ ສູນເດືອນ ສິມສະໄໝ ຫົວໜ້າຂະແໜງພະລະ – ສິລະປະ ພະແນກສຶກສາ ທິການ ແລະ ກີລາແຂວງຊຽງຂວາງ ມີຄະນະອຳນວຍການໂຮງຮຽນ ຮອງປະທານສະມາຄົມຜູ້ປົກຄອງນັກຮຽນ ຄູ-ອາຈານສອນພາຍໃນໂຮງຮຽນ ພ້ອມດ້ວຍນ້ອງນັກຮຽນ ແລະ ແຂກທີ່ຖືກເຊີນເຂົ້າຮ່ວມເກືອບນຶ່ງພັນຄົນ.
ທ່ານນາງ ພຸດທະສອນ ວິລະນົນ ຫົວໜ້າໜ່ວຍງານກິດຈະກຳນັກຮຽນຂອງໂຮງຮຽນມັດທະຍົມຕອນປາຍໂພນສະຫວັນ ໄດ້ຂຶ້ນກ່າວລາຍງານແຜນກິດຈະກຳການຈັດການແຂ່ງຂັນກີລາ – ສິລະປະ ທົ່ວໂຮງຮຽນ ຄັ້ງທີ VII ປະຈຳສົກຮຽນ 2015 – 2016 ຕໍ່ພິທີກ່ຽວກັບຈຸດປະສົງຂອງການຈັດງານວ່າ ນອກຈາກປະຕິບັດຕາມແຜນການຂອງໂຮງຮຽນແລ້ວ ຍັງເປັນການປະຕິບັດຕາມ 5 ຫຼັກມູນການສຶກສາ ທີ່ທາງກະຊວງສຶກສາທິການ ແລະ ກີລາ ວາງອອກ ພ້ອມນັ້ນ ຍັງເປັນການໄຂໂອກາດໃຫ້ນັກຮຽນໄດ້ສະແດງອອກທາງດ້ານຄວາມຮູ້ ຄວາມສາມາດ ແລະ ພອນສະຫວັນ ສ້າງໃຫ້ນັກຮຽນຮູ້ຈັກໃຊ້ເວລາວ່າງໃຫ້ເກີດປະໂຫຽດ ຫັນມາຫຼີ້ນກີລາ-ສິລະປະ ເພື່ອຫ່າງໄກຈາກຢາເສບຕິດ ສ້າງໃຫ້ເດັກນັກຮຽນມີຄວາມສາມັກຄີຮັກແພງຊ່ອຍເຫຼືອເຊີ່ງກັນແລະກັນ ແລະ ມີໂອກາດແລກປ່ຽນຄຳຄິດຄຳເຫັນໃນການເຄື່ອນໄຫວກິດຈະກຳຕ່າງໆພາຍໃນໂຮງຮຽນດ້ວຍຄວາມຮັບຜິດຊອບສູງ ພ້ອມນັ້ນຍັງເປັນການສ້າງຂະບວນການຕ້ອນຮັບວັນສຳຄັນຕ່າງໆຂອງຊາດ ໃຫ້ມີບັນຍາກາດຟົດຟື້ນມ່ວນຊື່ນ ເປັນຕົ້ນແມ່ນວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 61 ປີ ແລະ ບຸນສົງການປີໃໝ່ລາວ ພສ 2559.
ທ່ານນາງ ພຸດທະສອນ ວິລະນົນ ຍັງໃຫ້ຮູ້ຕື່ມອີກວ່າ ສຳລັບປະເພດກີລາທີ່ນຳມາແຂ່ງຂັນປະກອບມີ ບານເຕະ (ຍິງ-ຊາຍ) ບານສົ່ງ (ຍິງ-ຊາຍ) ກະຕໍ້ (ຍິງ-ຊາຍ) ແລະ ເຕັ້ນຍາວ ໃນນັ້ນ ບານເຕະຊາຍມີທັງໝົດ 40 ທີມ ບານເຕະຍິງ 16 ທີມ ບານສົ່ງຊາຍ 36 ທີມ ບານສົ່ງຍິງ 30 ທີມ ກະຕໍ້ຊາຍ 39 ທີມ ກະຕໍ້ຍິງ 29 ທີມ ແລະ ເຕັ້ນຍາວ 80 ຄະນະເຂົ້າຮ່ວມແຂ່ງຂັນ ສ່ວນປະເພດສິລະປະ-ວັນນະຄະດີປະກອບມີ ບົດຟ້ອນ 35 ຄະນະ ບົດເພງ 30 ຄະນະ ແລະ ຂັບ-ລໍາ ທ້ອງຖິ່ນ 16 ຄະນະ ການແຂ່ງຂັນຈະດຳເນີນໄປຮອດວັນທີ 25 ເດືອນນີ້ຈິ່ງຈະສຳເລັດ
ໂອກາດດຽວກັນ ທ່ານ ອຈ. ຄຳສິງ ເພັດສີຄຳ ຮອງຜູ້ອຳນວຍການໂຮງຮຽນມັດທະຍົມຕອນປາຍໂພນສະຫວັນ ໃນນາມປະທານການຈັດງານແຂ່ງຂັນກີລາ-ສິລະປະ ທົ່ວໂຮງຮຽນ ຄັ້ງທີ VII ໄດ້ໃຫ້ກຽດຂຶ້ນໂອ້ລົມປະກອບຄຳຄິດຄຳເຫັນ ເຊິ່ງກ່ອນອື່ນ ທ່ານໄດ້ຍົກໃຫ້ເຫັນຄວາມສຳຄັນຂອງແຜນປະຕິຮູບການສຶກສາແຫ່ງຊາດ ຄັ້ງທີ III (2016 – 2020) ໂດຍພາຍໃຕ້ການຊີ້ນຳຂອງພະແນກສຶກສາທິການ ແລະ ກີລາແຂວງຊຽງຂວາງ ໃນການນຳເອົາເນື້ອໃນເອກະສານຕາມ 3 ລັກສະນະ 5 ຫຼັກມູນຂອງການສຶກສາແຫ່ງຊາດ ເພື່ອຈັດຕັ້ງຜັນຂະຫຽາຍ ແນໃສ່ບຸກທະລຸທາງດ້ານຊັບພະຍາກອນມະນຸດໃຫ້ມີຄວາມຮູ້ ຄວາມສາມາດ ມີຄຸນສົມບັດ ເພື່ອປະກອບສ່ວນຮັບໃຊ້ປະເທດຊາດ ຮັບໃຊ້ສັງຄົມ ຢາກເຮັດໄດ້ຄືແນວນັ້ນ ກ່ອນອື່ນຕ້ອງພັດທະນາຄົນ ໂດຍເລັ່ງໃສ່ຄຸນະພາບເປັນຕົ້ນຕໍ ການແຂ່ງຂັນກີລາ – ສິລະປະ ທົ່ວໂຮງຮຽນຄັ້ງນີ້ ຍັງເປັນການປະກອບສ່ວນສ້າງນັກກີລາຮຸ່ນສືບທອດໃຫ້ແກ່ຊາດ ແກ່ແຂວງນຳອີກ ເພື່ອໄວ້ຮອງຮັບການເຂົ້າຮ່ວມແຂ່ງຂັນກີລາລະດັບຕ່າງໆທັງພາກພື້ນ ແລະ ສາກົນ ພິເສດກໍແມ່ນງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ແລະ ງານແຂ່ງຂັນກີລາສາຍນັກຮຽນມັດທະຍົມທົ່ວປະເທດ ຄັ້ງທີ VI ທີ່ແຂວງບໍລິຄຳໄຊ ເປັນເຈົ້າພາບໃນຕົ້ນປີໜ້າ ຮຽກຮ້ອງມາຍັງຄະນະຮັບຜິດຊອບການຈັດການແຂ່ງຂັນ ນັກກີລາ ແລະ ນັກສິລະປະ ພ້ອມດ້ວຍທຸກພາກສ່ວນ ຈົ່ງພ້ອມກັນຮ່ວມແຮງຮ່ວມໃຈໃນການປະຕິບັດໜ້າທີ່ດ້ວຍຄວາມຮັບຜິດຊອບສູງ ເພື່ອເຮັດແນວໃດໃຫ້ງານຄັ້ງນີ້ ມີບັນຍາກາດເບີກບານມ່ວນຊື່ນ ແລະ ມີຜົນສຳເລັດຢ່າງຈົບງາມ.
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ.
