ໄອໂອຊີ ໄຟຂຽວອະນຸຍາດໃຫ້ນັກມວຍຊາຍບໍ່ໃສ່ໝວກປ້ອງກັນຫົວ ຄັ້ງທໍາອິດຮອບ 32 ປີ

ຄະນະກໍາມະການໂອແລັມປິກ (ໄອໂອຊີ) ອະນຸຍາດໃຫ້ມວຍສາກົນສະໝັກຫຼິ້ນຊາຍ ໃນໂອແລັມປິກເກມ 2016 ບໍ່ຕ້ອງໃສ່ໝວກປ້ອງກັນຫົວຂຶ້ນເວທີ ຫຼັງ ສະຫະພັນມວຍສາກົນນາໆຊາດ (ເອໄອບີເອ) ນໍາສະເໜີຜົນການວິໄຈອ້າງອິງ ການຊົກມວຍໂດຍບໍ່ໃສ່ໝວກ ສ້າງຜົນກະທົບຕໍ່ນັກກີລາໃນລະດັບຕໍ່າ ແລະ ບໍ່ເປັນອັນຕະລາຍໃດໆ.

ເອໄອບີເອ ໄດ້ມີການປ່ຽນແປງກົດລະບຽບການແຂ່ງຂັນໄປເມື່ອປະມານ 3 ປີທີ່ຜ່ານມາ ໂດຍໃຫ້ນັກມວຍຊາຍ ບໍ່ຕ້ອງສວມໃສ່ໝວກປ້ອງກັນຫົວຂຶ້ນເວທີ ເຊິ່ງມີການບັງຄັບໃຊ້ໄປແລ້ວໃນຫຼາຍລາຍການ ບໍ່ວ່າຈະເປັນມວຍສາກົນສະໝັກຫຼິ້ນຊີງແຊັມໂລກ ຫຼື ແມ່ນແຕ່ ງານມະຫາກໍາກີລາ ເອຊຽນເກມ.

ຫຼ້າສຸດ ເມື່ອທ້າຍອາທິດທີ່ຜ່ານມາ ໄອໂອຊີ ໄດ້ອະນຸຍາດຄໍາຮ້ອງຂອງ ເອໄອບີເອ ໃຫ້ການແຂ່ງຂັນໃນງານມະຫາກໍາກີລາ ໂອແລັມປິກ ທີ່ນະຄອນຫຼວງຣິໂອ ເດິ ຈາເນໂຣ ປະເທດບຣາຊິນ ເຊິ່ງນັກກີລາມວຍສາກົນສະໝັກຫຼິ້ນຊາຍ ບໍ່ຕ້ອງໃສ່ໝວກປ້ອງກັນຂຶ້ນເວທີເປັນຄັ້ງທໍາອິດໃນຮອບ 32 ປີ ຫຼັງມີການອ້າງອິງຜົນງານການວິໄຈດ້ານການແພດເພີ່ມເຕີມວ່າ ບໍ່ເປັນອັນຕະລາຍຕໍ່ນັກກີລາ.

ທ່ານ ມາກ ອະດໍາ ໂຄສົກ ໄອໂອຊີ ກ່າວວ່າ: ເອໄອບີເອ ໄດ້ນໍາສະເໜີຂໍ້ມູນທາງການແພດກ່ຽວກັບຜົນກະທົບຂອງນັກກີລາທີ່ບໍ່ສວມໃສ່ໝວກຂຶ້ນເວທີແຂ່ງຂັນ ເຊິ່ງໄດ້ຮັບຜົນກະທົບຢູ່ໃນລະດັບທີ່ຕໍ່າຫຼາຍ ແລະ ບໍ່ເປັນອັນຕະລາຍໃດໆ ເຊິ່ງພວກເຂົາໄດ້ທໍາການວິໃຈຢ່າງຫຼວງຫຼາຍຕະຫຼອດ 3 ປີທີ່ຜ່ານມາ ແລະ ພວກເຮົາຈະນໍາໄປປ່ຽນແປງກົດໃໝ່ໃນ ຣິໂອເກມ 2016 ທີ່ກໍາລັງມາເຖິງ.

ສໍາລັບການແຂ່ງຂັນ ໂອແລັມປິກ ເມື່ອປີ 1980 ທີ່ນະຄອນຫຼວງມົດສະກູ່ ປະເທດຣັດເຊຍ ເປັນຄັ້ງຫຼ້າສຸດທີ່ມວຍສາກົນສະໝັກຫຼິ້ນ ມີການແຂ່ງຂັນໂດຍບໍ່ໃສ່ໝວກ ກ່ອນທີ່ໃນອີກ 4 ປີຖັດມາທີ່ເມືອງ ລອສ ແອນເຈລິສ ສະຫະລັດອາເມຣິກາ ຈະມີການເລີ່ມນໍາໝວກປ້ອງກັນເຂົ້າມາໃຊ້ເປັນຄັ້ງທໍາອິດໃນປະຫວັດສາດ ຂະນະທີ່ ມວຍສາກົນສະໝັກຫຼິ້ນຍິງ ເຊິ່ງເລີ່ມຕົ້ນຊີງຫຼຽນໃນ ໂອແລັມປິກເກມ ຄັ້ງທໍາອິດເມື່ອປີ 2012 ຈະຍັງບັງຄັບໃຫ້ນັກກີລາສວມໃສ່ໝວກປ້ອງກັນຂຶ້ນເວທີເຊັ່ນເດີມ.