ໂຄງການກໍ່ສ້າງອາຄານເຝິກແອບ ແລະ ຫໍພັກນັກຮຽນກາຍະສິນແຫ່ງຊາດ ມູນຄ່າການກໍ່ສ້າງ 32 ຕື້ກວ່າກີບ ເປັນທຶນຂອງລັດຖະບານ 100% ຈັດຕັ້ງປະຕິບັດໂດຍກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ເຈົ້າຂອງໂຄງການ ແລະ ບໍລິສັດໄຊພັດທະນາຈໍາກັດ ເປັນຜູ້ຮັບເໝົາກໍ່ສ້າງ ເຊິ່ງຄາດວ່າຈະໃຫ້ສໍາເລັດພາຍໃນ 18 ເດືອນຕາມສັນຍາ ຈິ່ງນໍາສູ່ພິທີວາງສີລາລືກໂຄງການກໍ່ສ້າງອາຄານເຝິກແອບ ແລະ ຫໍພັກນັກຮຽນກາຍະສິນແຫ່ງຊາດ ຢ່າງເປັນທາງການໃນຕອນເຊົ້າວັນທີ 11 ມີນາ 2016 ທີ່ບ້ານສະຫວ່າງ ເມືອງຈັນທະບູລີ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ບົວເງິນ ຊາພູວົງ ລັດຖະມົນຕີຊ່ອຍວ່າການກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ທ່ານ ຄໍາເຫຼັກ ສຸກຈັນທາລາວົງ ອໍານວຍການກອງກາຍະສິນແຫ່ງຊາດ ທ່ານ ກັນຍາ ຍາດວງຈິດ ຮອງປະທານບໍລິສັດໄຊພັດທະນາຈໍາກັດ ມີຫົວໜ້າ ຮອງຫົວໜ້າກົມ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ທ່ານອໍານວຍການກອງກາຍະສິນແຫ່ງຊາດ ໄດ້ໃຫ້ຮູ້ວ່າ ໂຄງການກໍ່ສ້າງອາຄານເຝິກແອບ ແລະ ຫໍພັກນັກຮຽນກາຍະສິນແຫ່ງຊາດ ເປັນອາຄານ 2 ຫຼັງ ມີເນື້ອທີ່ກໍ່ສ້າງທັງໝົດ 35×75 ຕາແມັດ ເຊິ່ງແຕ່ລະຫຼັງປະກອບມີ 3 ຊັ້ນ ສໍາລັບຊັ້ນ 1 ສ້າງເປັນຫ້ອງເຝິກແອບຂອງນັກຮຽນ ໃນນັ້ນມີ ໂຕະ ຕັ່ງ ແລະ ອຸປະກອນຮັບໃຊ້ໃນຫ້ອງຮຽນ ຫ້ອງນໍ້າ ລະ ບົບໄຟຟ້າ ນໍ້າປະປາ ຄົບຊຸດ ສ່ວນດ້ານນອກອາຄານສ້າງໃຫ້ມີສະຖານທີ່ຈອດລົດ ສວນຫຽ້າ ເສົາຫຼັກທຸງ ມີກໍາແພງກໍ່ດວ້ຍດິນຈີ່ອ້ອມຮອບ ແລະ ປະຕູທາງເຂົ້າ-ອອກ ໂດຍຈະໃຊ້ເວລາໃນການກໍ່ສ້າງໃຫ້ສໍາເລັດຕາມແຜນການ ພາຍໃນ 18 ເດືອນນັບຈາກນີ້ເປັນຕົ້ນໄປ.