ພິທີມອບ-ຮັບດາວທຽມລາວ ແລະ ເປີດໂຕບໍລິສັດດາວທຽມລາວ ເອເຊຍ-ປາຊີຟິກ ຈຳກັດ ໄດ້ຈັດຂຶ້ນວັນທີ 9 ມີນາ 2016 ຢູ່ສະຖານີດາວທຽມພາກພື້ນດິນ (ຫຼັກ 14) ເມືອງຫາດຊາຍຟອງ ນະຄອນຫຼວງວຽງຈັນ ລະຫວ່າງທ່ານ ດຣ. ພູຫຼວງ ການໍລາດ ຫົວໜ້າໂຄງການດາວທຽມລາວ ແລະ ທ່ານ Han Qingping ປະທານຂອງບໍລິສັດໂທລະຄົມມະນາຄົມເຄື່ອນທີ່ດາວທຽມອາຊີ-ປາຊີຟິກ (APMT) ໂດຍມີບັນດາທ່ານລັດຖະມົນຕີວ່າການ ລັດຖະມົນຕີຊ່ວຍວ່າການ ຜູ້ຕາງໜ້າສະຖານທູດ ສປ ຈີນ ປະຈຳ ສປປ ລາວ ບັນດາບໍລິສັດຜູ້ຮ່ວມທຶນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຫຽມ ພົມມະຈັນ ລັດຖະມົນຕີວ່າການກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໄດ້ກ່າວວ່າ: ການສື່ສານຜ່ານດາວທຽມ ແມ່ນເຕັກໂນໂລຊີອັນໜຶ່ງຂອງຍຸກສະໄໝນີ້ ໃນຖານະມີທີ່ຕັ້ງທາງພູມສາດຂອງລາວຢູ່ລະຫວ່າງຫຼາຍປະເທດ ແລະ ເພື່ອປະຕິບັດນະໂຍບາຍເຊື່ອມໂຍງສາກົນ ກໍ່ຄືການຫັນເປັນທັນສະໄໝ ລັດຖະບານລາວ ຈຶ່ງດຳເນີນຂັ້ນຕອນເພື່ອສາມາດມີດາວທຽມເປັນຂອງຕົນເອງ ວັນທີ 12 ທັນວາ 2012 ກະຊວງ ປທສ ຕາງໜ້າໃຫ້ລັດຖະບານລາວ ໄດ້ເຊັນສັນຍາກັບບໍລິສັດ APMT ແລະ ບໍລິສັດ Greatwall ສປ ຈີນ ເພື່ອປະຕິບັດໂຄງການສ້າງ-ສົ່ງດາວທຽມ ແລະ ກໍ່ສ້າງສູນບັນຊາພາກພື້ນດິນ ພ້ອມດ້ວຍການສ້າງນັກວິຊາການບັນຊາດາວທຽມ ວັນທີ 21 ພະຈິກ 2015 ດາວທຽມລາວດວງທຳອິດ “LAOSAT-1” ໄດ້ຖືກສົ່ງໄປອາວະກາດໃນຕຳແໜ່ງເສັ້ນໂຄຈອນ 128.5 ອົງສາ ດ້ວຍຜົນສຳເລັດທຸກປະການ.
ແຫລ່ງຂ່າວ:
