ກອງປະຊຸມລັດຖະບານໄດ້ເຫັນດີຕາມການສະເໜີຂອງກະຊວງກະສິກຳ ແລະ ປ່າໄມ້ກ່ຽວກັບໂກຕ້າໄມ້ສຳລັບສົກປີໜ້າ ແຕ່ໃຫ້ຂຸດຄົ້ນສະເພາະເຂດກໍ່ສ້າງພື້ນຖານໂຄງລ່າງ ແລະ ເຂດພັດທະນາຕ່າງໆສ່ວນເຂດປ່າຜະລິດແມ່ນ ໃຫ້ຢຸດຕິ.
ເມື່ອອາທິດຜ່ານມາ ທ່ານ ວິໄລວັນ ພົມເຂ ລັດຖະມົນຕີວ່າການກະຊວງກະສິກຳ ແລະ ປ່າໄມ້ ໄດ້ສະເໜີຕໍ່ກອງປະຊຸມລັດຖະບານກາງສົກປີ 20132014 ກ່ຽວກັບຄວາມຕ້ອງການໃນການຂຸດຄົ້ນໄມ້ ສົກປີ 20142015 ໃຫ້ລັດຖະບານອະນຸມັດໂກຕ້າໄມ້ຈາກເຂດກໍ່ສ້າງພື້ນຖານໂຄງລ່າງ, ເຂດບຸກເບີກເນື້ອທີ່ປູກໄມ້, ພືດກະສິກຳ ແລະ ເຂດເນື້ອທີ່ທຳການຜະລິດຂອງປະຊາຊົນຢູ່ພາຍໃນ 7 ແຂວງຈຳນວນ 105.942 ແມັດກ້ອນ, ໃນນັ້ນຫຼາຍກວ່າໝູ່ແມ່ນແຂວງຫຼວງພະບາງມີ 50,23 ພັນແມັດກ້ອນ, ຮອງມາແມ່ນຈຳປາສັກ 31,90 ພັນ ແມັດກ້ອນ, ຫົວພັນມີ 20 ພັນແມັດກ້ອນ, ບໍ່ແກ້ວ 1.231 ແມັດກ້ອນ, ໄຊຍະບູລີ 1.106 ແມັດກ້ອນ, ວຽງຈັນ 1.066 ແມັດກ້ອນ ແລະ ຜົ້ງສາລີ ຈຳນວນ 400 ແມັດກ້ອນ.
ຜ່ານການສະເໜີດັ່ງກ່າວກອງປະຊຸມລັດຖະບານກໍໄດ້ເຫັນດີຕາມຄຳສະເໜີ ແຕ່ໃຫ້ມີການຂຸດຄົ້ນໄມ້ໃນສະເພາະເຂດທີ່ຈະກໍ່ສ້າງພື້ນຖານໂຄງລ່າງ ແລະ ເຂດພັດທະນາຕ່າງໆ, ສ່ວນເຂດປ່າຜະລິດແມ່ນໃຫ້ຢຸດຕິ ແລະ ຈຳນວນໄມ້ທີ່ຂຸດຄົ້ນດັ່ງກ່າວແມ່ນໃຫ້ແບ່ງປັນໃຫ້ບັນດາໂຮງງານປຸງແຕ່ງໄມ້ທີ່ໄດ້ມາດຖານ ເພື່ອປຸງແຕ່ງເປັນໄມ້ສຳເລັດຮູບແລ້ວຈິ່ງສົ່ງອອກ.
ພ້ອມດຽວກັນນັ້ນ ກອງປະຊຸມຍັງໄດ້ເນັ້ນໃຫ້ພາກສ່ວນກ່ຽວຂ້ອງເອົາໃຈໃສ່ຕົ້ນຕໍແມ່ນໃຫ້ເຂັ້ມງວດຕໍ່ການກວດກາ ແລະ ຄຸ້ມຄອງປ່າສະຫງວນ, ປ່າປ້ອງກັນ, ປ່າຍອດນ້ຳ ແລະ ມີແຜນລະອຽດໃນການຟື້ນຟູ ແລະ ປູກໄມ້ຕາມແຜນທີ່ໄດ້ກຳນົດຮອດປີ 2015 ແລະ 2020, ພ້ອມນັ້ນ ຍັງໃຫ້ບັນດາກະຊວງອົງການ ແລະ ທ້ອງຖິ່ນເພີ່ມທະວີຄວາມຮັບຜິດຊອບໃນການຕິດຕາມ, ກວດກາ ແລະ ຄຸ້ມຄອງການຂຸດຄົ້ນໄມ້ໃຫ້ເຂັ້ມງວດຕາມຄຳສັ່ງເລກທີ 17/ນຍ ແລະ ກ້າວໄປເຖິງຢຸດຕິການຂຸດຄົ້ນໄມ້ ເພື່ອຊຳລະ ໂຄງການກໍຄືເປັນລາຍຮັບຕົ້ນຕໍໃຫ້ງົບປະມານ; ກະຊວງອຸດສາຫະກຳ ແລະ ການຄ້າຖືກເນັ້ນໃຫ້ສົມທົບກັບຂະແໜງການທີ່ກ່ຽວຂ້ອງ ແລະ ທ້ອງຖິ່ນຕ່າງໆກວດກາ ແລະ ປັບປຸງຄືນບັນດາໂຮງງານປຸງແຕ່ງໄມ້ໃຫ້ໄດ້ມາດຕະຖານ ເພື່ອສົ່ງເສີມການປຸງແຕ່ງ ແລະ ສົ່ງອອກຜະລິດຕະພັນໄມ້ສຳເລັດຮູບ.
ສຳລັບໃນສົກປີ 20132014 ໄດ້ ອະນຸມັດໃຫ້ມີການຂຸດຄົ້ນໄມ້ທັງໝົດ 580.072 ແມັດກ້ອນ, ມາຮອດກາງເດືອນເມສາ 2014 ສາມາດປະຕິບັດໄດ້ພຽງແຕ່ 69.888 ແມັດກ້ອນ ເທົ່າກັບ 12% ຂອງແຜນການ, ໃນນັ້ນ ບ້ວງລັດຖະບານອະນຸມັດ 133.289 ແມັດກ້ອນ ຊຶ່ງກວມເອົາ 10 ແຂວງ, ມີ 45 ໂຄງ ການ ທີ່ນອນໃນເຂດກໍ່ສ້າງພື້ນຖານໂຄງລ່າງ ແລະ ເຂດປູກພືດກະສິກຳ ແລະ ຊຳລະໜີ້ 2 ໂຄງການກໍ່ສ້າງພື້ນຖານ ໂຄງລ່າງຂອງ 2 ແຂວງແມ່ນປະຕິບັດ ໄດ້ 11.745 ແມັດກ້ອນ ເທົ່າກັບ 9% ຂອງແຜນການ.
ນອກນັ້ນ ຍັງມີບ້ວງທີ່ຍົກມາຈາກສົກປີ 20122013 ຈໍານວນທັງໝົດ 446.783 ແມັດກ້ອນ ຊຶ່ງເປັນໄມ້ໃນເຂດກໍ່ສ້າງພື້ນຖານໂຄງລ່າງຕ່າງໆຈຳນວນ 23 ໂຄງການ ຢູ່ 8 ແຂວງ, ໃນນີ້ ລວມມີເຂດກໍ່ສ້າງເຂື່ອນໄຟຟ້າ, ແລວທາງ, ແລວໄຟຟ້າ, ເຂດບໍ່ແຮ່, ເຂດບ້ານຈັດສັນ ແລະ ຊຳລະໂຄງການແມ່ນປະຕິ ບັດໄດ້ 58.142 ແມັດກ້ອນ ເທົ່າກັບ 13% ຂອງແຜນການ.
ທີ່ມາ ເສດຖະກິດ-ສິງຄົມ