ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຕາມຊາຍ ແດນລາວ-ໄທ ລະຫວ່າງແຂວງສະຫວັນນະເຂດ (ສປປ ລາວ) ແລະຈັງຫວັດ ນະຄອນພະນົມ (ລາຊະອານາຈັກໄທ) ໄດ້ຈັດຂຶ້ນໃນລະຫວ່າງວັນທີ 7-8 ມີນາ 2016 ທີ່ສາລາກາງຈັງຫວັດນະຄອນພະນົມ ໂດຍແມ່ນຈັງຫວັດນະຄອນພະນົມເປັນເຈົ້າພາບ ຊຶ່ງຄັ້ງນີ້ເປັນຄັ້ງທຳອິດ, ຝ່າຍຈັງຫວັດນະຄອນພະນົມນຳໂດຍທ່ານ ສົມຊາຍ ວິດດຳລົງ ຜູ້ວ່າຣາຊະການຈັງຫວັດນະຄອນພະນົມ ພ້ອມຄະນະ, ຝ່າຍແຂວງສະຫວັນນະເຂດ ນຳໂດຍ ທ່ານ ດຣ. ສຸພັນ ແກ້ວມີໄຊ ເຈົ້າແຂວງສະຫວັນນະເຂດ ພ້ອມຄະນະ, ຈາກນັ້ນ ກໍມີທ່ານກົງສຸນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ, ທ່ານ ກົງສຸນໃຫຍ່ແຫ່ງ ສປປ ລາວ ປະຈຳຈັງຫວັດຂອນແກ່ນ ກໍໄດ້ເປັນກຽດເຂົ້າຮ່ວມເປັນສັກຂີພະຍານໃນຄັ້ງນີ້ດ້ວຍ.
ແຂວງສະຫວັນນະເຂດ ແລະຈັງຫວັດນະຄອນພະນົມ ມີຊາຍແດນຮ່ວມກັນປະມານ 15 ກິໂລແມັດ ຢູ່ລະ
ຫວ່າງເມືອງໄຊບູລີ ແລະອຳເພີທາດພະນົມ, ປະຊາຊົນທັງສອງຝັ່ງ ໄດ້ໄປ-ມາຫາສູ່ກັນ ໂດຍສະເພາະໃນງານປະເພນີຕ່າງໆເປັນຕົ້ນ: ງານກຸດສົງການ, ງານທາດພະນົມ. ດັ່ງນັ້ນ ເພື່ອເຮັດໃຫ້ຂອບການຮ່ວມມືລະຫວ່າງ 2 ແຂວງມີການຂະຫຍາຍການຮ່ວມມືໃຫ້ໄດ້ຫຼາຍຂຶ້ນ ທາງສອງຝ່າຍ ຈິ່ງໄດ້ແຕ່ງຕັ້ງຄະນະກຳມະການຮ່ວມມືຕາມຊາຍແດນ ໂດຍມີທ່ານເຈົ້າແຂວງຂອງສອງແຂວງເປັນປະທານ ແລະມີບັນດາພະແນກການຕ່າງໆກໍໄດ້ເຂົ້າຮ່ວມເປັນຄະນະກຳມະການ ທັງນີ້ກໍເພື່ອຄວາມສະຫງົບ ແລະຄວາມເປັນລະບຽບຮຽບຮ້ອຍຕາມຊາຍແດນໄທ-ລາວ ເວົ້າລວມ, ເວົ້າສະເພາະສະຫວັນນະເຂດ-ນະຄອນພະນົມ.
ເພື່ອເຮັດໃຫ້ການຮ່ວມມືເປັນໄປຕາມລະບຽບ, ຄະນະກຳມະການທັງສອງຝ່າຍ ຈິ່ງໄດ້ເຮັດບົດບັນທຶກໂດຍມີລາຍລະອຽດດັ່ງນີ້: ການຮ່ວມມືຮັກສາຄວາມສະຫງົບຕາມຊາຍແດນ ແຂວງສະຫວັນນະເຂດ-ຈັງຫວັດນະຄອນພະນົມ ທັງສອງຝ່າຍຮ່ວມມືກັນປ້ອງກັນ ແລະປາບປາມອາດຊະຍາກຳ, ການລັກລອບຍານພາຫະນະ ແລະວັດຖຸບູຮານທີ່ມີຄ່າ, ການລັກລອບຂົນສົ່ງສິນຄ້າຜິດກົດໝາຍ, ການລັກລອບຄ້າຂາຍສັດ, ການຄ້າຂາຍອາວຸດສົງຄາມ ແລະທາດລະເບີດ, ການລັກລອບຂຸດຄົ້ນຊັບພະຍາກອນທຳມະຊາດ, ການຫຼອກລວງເດັກ ແລະແມ່ຍິງເພື່ອຄ້າປະເວນີ, ການຄ້າແຮງງານຜິດກົດໝາຍ ແລະອື່ນໆ. ໃນກໍລະນີທີ່ຝ່າຍໃດຝ່າຍໜື່ງຮູ້ ແລະພົບເຫັນການກະທຳ ຜິດດັ່ງກ່າວຕ້ອງແຈ້ງໃຫ້ອີກຝ່າຍໜຶ່ງຊາບໂດຍດ່ວນ ເພື່ອສະກັດກັ້ນ ແລະ ປາບປາມໃຫ້ທັນເວລາ ຈາກນັ້ນ ກໍແມ່ນການຮ່ວມມືໃນການອຳນວຍຄວາມສະດວກ ແລະຄວາມປອດໄພໃນການເຂົ້າ-ອອກເມືອງຕາມຈຸດຜ່ານແດນ, ການຮ່ວມມືປາບປາມຢາເສບຕິດ, ການຮ່ວມມືໃນການປົກປັກຮັກສາ, ປ້ອງກັນຕະຝັ່ງເຈື່ອນ ແລະການແກ້ໄຂບັນຫາການຂຸດຄົ້ນແຮ່, ຊາຍໃນແມ່ນ້ຳຂອງ, ການຮ່ວມມືໃນກໍລະນີບຸກຄົນຂອງແຕ່ລະຝ່າຍຖືກຈັບກຸມຄຸມຂັງ, ການຮ່ວມມືແກ້ໄຂບຸກຄົນສອງສັນຊາດການຮ່ວມມືດ້ານ ແຮງງານ, ການຮ່ວມມືດ້ານການຕ້ານ ການຄ້າມະນຸດ, ການຮ່ວມມືດ້ານເສດ ຖະກິດລະຫວ່າງ ແຂວງສະຫວັນນະເຂດ-ຈັງຫວັດນະຄອນພະນົມ, ການຮ່ວມມືລະຫວ່າງແຂວງ-ຈັງຫວັດ ແລະເມືອງ-ອຳເພີ, ການຮ່ວມມືດ້ານສາທາລະນະ ສຸກ ແລະການຮ່ວມມືໃນເລື່ອງອື່ນໆ. ໃນ ກອງປະຊຸມຍັງໄດ້ກຳນົດວັນ, ເວລາ, ສະຖານທີ່ຂອງການຈັດກອງປະຊຸມຄັ້ງຕໍ່ໄປ ໂດຍແມ່ນແຂວງສະຫວັນນະເຂດ ຈະເປັນເຈົ້າພາບໃນກອງປະຊຸມຄະນະກຳມະການຮ່ວມມືຮັກສາຄວາມສະຫງົບຕາມຊາຍແດນລາວ-ໄທຄັ້ງທີ II.
ຈາກນັ້ນ ທ່ານເຈົ້າແຂວງສະຫວັນ ນະເຂດ ດຣ. ສຸພັນ ແກ້ວມີໄຊ ແລະ ທ່ານ ສົມຊາຍ ວິດດຳລົງ ຜູ້ວ່າຣາຊະການຈັງ ຫວັດນະຄອນພະນົມ ກໍໄດ້ຮ່ວມກັນເຊັນບົດບັນທຶກສະບັບນີ້ ຊຶ່ງເປັນສະບັບທຳອິດຂອງແຂວງສະຫວັນນະເຂດ ແລະ ຈັງຫວັດນະຄອນພະນົມ ໃນການຮ່ວມມືຮັກສາຄວາມສະຫງົບຕາມຊາຍແດນ ໂດຍຊ້ອງໜ້າຂອງຄະນະກຳມະການທັງສອງຝ່າຍ ເພື່ອຈະໄດ້ພ້ອມກັນຈັດຕັ້ງປະຕິບັດໃຫ້ເກີດດອກອອກຜົນຕໍ່ໄປ.
ທີ່ມາ: