ໂດຍ: ໂອຫຼົດ
ໃນໄລຍະ 1 ປີຜ່ານມາການຈັດຕັ້ງປະຕິບັດວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ຖືວ່າມີຫຼາຍດ້ານພົ້ນເດັ່ນບໍ່ວ່າຈະເປັນທາງດ້ານຂົງເຂດຖະແຫຼງຂ່າວ, ວັດທະນະທຳ ແລະ ຂົງເຂດທ່ອງທ່ຽວ, ຂະນະທີ່ທິດທາງແຜນການຕໍ່ໜ້າທາງພະແນກໄດ້ເນັ້ນຫຼາຍບັນຫາຈັດຕັ້ງປະຕິບັດໃຫ້ບັນລຸ.
ທ່ານ ນາງ ວັນເພັງ ແກ້ວນະຄອນ ຫົວໜ້າພະແນກ ຖວທ ນະຄອນຫຼວງວຽງຈັນ ກ່າວໃນກອງປະຊຸມວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ທົ່ວປະເທດສົກປີ 2013-2014 ຮູ້ວ່າ: ຕະຫຼອດໄລຍະ 1 ປີຜ່ານມາກໍຄືສົກປີ 2012-2013 ການເຄື່ອນໄຫວຈັດຕັ້ງປະຕິບັດວຽກງານຂອງພະແນກ ຖວທ ນະຄອນຫຼວງຕາມທິດຊີ້ນຳຂອງຂັ້ນເທິງເຫັນວ່າມີລັກສະນະພົ້ນເດັ່ນພໍສົມຄວນເປັນຕົ້ນ: ໃນຂົງເຂດຖະແຫຼງຂ່າວ ແມ່ນໄດ້ເກັບກຳສະຖິຕິວຽກງານ ຖວທ ທົ່ວນະຄອນຫຼວງວຽງຈັນຄືນໃໝ່ຊຶ່ງປະກອບມີບັນດາບ້ານທີ່ມີຫ້ອງຂ່າວ, ກະດານຂ່າວຊົມໃຊ້, ວາລະສານຕ່າງໆມີ 185 ບ້ານ ໃນຈຳນວນ 481 ບ້ານ, ມີຮ້ານຖ່າຍຮູບ, ຖ່າຍວີດິໂອຈຳນວນ 28 ຮ້ານ, ໄດ້ຍົກລະດັບທາງດ້ານປະລິມານ ແລະ ຄຸນນະພາບຂອງໜັງສືພິມວຽງຈັນໃໝ່, ວຽງຈັນທຸລະກິດສັງຄົມ ໂດຍໃນ 1 ປີຜ່ານມາສາມາດຜະລິດໜັງສືພິມວຽງຈັນໃໝ່ລາຍວັນໄດ້ 1,4 ພັນກວ່າສະບັບ, ໜັງສືພິມວຽງຈັນທຸລະກິດສັງຄົມໄດ້ 17 ພັນກວ່າສະບັບ, ພິເສດພະແນກ ຖວທ ນະຄອນຫຼວງໄດ້ຂໍການລົງທຶນຂອງລັດເຂົ້າໃນການກໍ່ສ້າງສະຖານີໂທລະພາບນະຄອນຫຼວງວຽງຈັນ 1 ແຫ່ງ ຊຶ່ງປະຈຸບັນກຳລັງສ້າງໄດ້ປະມານ 40% ຄາດທ້າຍປີ 2015 ຈະສຳເລັດ.
ສ່ວນດ້ານວັດທະນະທຳວຽກງານ ການກໍ່ສ້າງຄອບຄົວ ແລະ ບາງບ້ານວັດທະນະທຳເປັນບ້ານບຸລິມະສິດໂດຍສາມາດມອບໃບຢັ້ງຢືນໃຫ້ຄອບຄົວວັດທະນະທຳໄດ້ 8 ພັນກວ່າຄອບຄົວ, ທຽບໃສ່ແຜນການປີເທົ່າກັບ 65,02%, ປະກາດຮັບຮອງບ້ານວັດທະນະທຳໄດ້ 78 ບ້ານ ທຽບໃສ່ແຜນການປີ 48,11%, ປະກາດກຸ່ມບ້ານວັດທະນະທຳ 11 ກຸ່ມ ທຽບໃສ່ແຜນການປີ 11,81% ມາຮອດປະຈຸບັນນະຄອນຫຼວງວຽງຈັນມີຄອບຄົວວັດທະນະທຳ 1,6 ແສນກວ່າຄອບຄົວ, ມີບ້ານວັດທະນະທຳ 367 ບ້ານ.
ດ້ານວຽກງານການທ່ອງທ່ຽວແມ່ນໄດ້ຮັບການພັດທະນາຫຼາຍ ໂດຍໄດ້ອະນຸຍາດໃຫ້ນັກທ່ອງທ່ຽວທີ່ນຳໃຊ້ບັດຜ່ານແດນເຂົ້າມາທ່ຽວຢູ່ນະຄອນຫຼວງວຽງຈັນໄດ້ 1,4 ແສນກວ່າເທື່ອຄົນ ສ້າງລາຍ ຮັບຈາກການທ່ອງທ່ຽວໄດ້ 1,765 ລ້ານກວ່າກີບ, ປະຈຸບັນ ມີໂຮງແຮມ 200 ກວ່າແຫ່ງ, ເຮືອນພັກ-ຣີລອດ 217 ແຫ່ງ, ພັດຕາຄານ ແລະ ຮ້ານອາຫານ 85 ແຫ່ງ, ສະຖານທີ່ທ່ອງທ່ຽວທາງວັດທະນະທຳມີ 12 ແຫ່ງ, ທຳມະຊາດ 14 ແຫ່ງ ແລະ ທາງປະຫວັດສາດມີ 10 ແຫ່ງ, ມີເຮືອນຳທ່ຽວ 3 ລຳ ແລະ ບໍລິສັດທ່ອງທ່ຽວ 165 ບໍລິສັດ.
ສຳລັບທິດທາງແຜນການໃນຕໍ່ໜ້າກໍຄືສົກປີ 2013-2014 ພະແນກ ຖວທ ນະຄອນຫຼວງໄດ້ເນັ້ນຫຼາຍບັນຫາຄື: ດ້ານ ຖະແຫຼງຂ່າວ ຈະສືບຕໍ່ຕິດຕາມກວດກາເນື້ອໃນຂ່າວໃນໜ້າໜັງສືພິມວຽງຈັນໃໝ່, ວຽງຈັນທຸລະກິດສັງຄົມ, ລາຍການວິທະຍຸ ແລະ ລາຍການໂທລະພາບ, ສືບຕໍ່ປະສານງານກັບພາກສ່ວນທີ່ກ່ຽວຂ້ອງເພື່ອສູ້ຊົນປະຕິບັດໂຄງການກໍ່ສ້າງສະຖານີໂທລະພາບນະຄອນຫຼວງວຽງຈັນໃຫ້ສຳເລັດຕາມແຜນການ, ສູ້ຊົນສ້ອມແປງເຄື່ອງສົ່ງວິທະຍຸ 105,5 ແລະ ອື່ນໆ; ດ້ານວັດທະນະທຳສືບຕໍ່ຊຸກຍູ້ເອື້ອອຳນວຍຄວາມສະດວກໃນການປະຕິບັດວຽກງານໂຄງການການກໍ່ສ້າງຄອບຄົວວັດທະນະທຳຢູ່ທຸກໆເມືອງໃຫ້ມີຄວາມເປັນເອກະພາບໃນການຈັດຕັ້ງປະຕິບັດຕາມຕົວເລກຄາດໝາຍສູ້ຊົນຮັບປະກັນໄດ້ທາງດ້ານປະລິມານ ແລະ ຄຸນນະພາບ, ສູ້ຊົນມອບໃບຢັ້ງຢືນຄອບຄົວວັດທະນະທຳໃຫ້ໄດ້ 1 ພັນຄອບຄົວ, ປະ ກາດບ້ານວັດທະນະທຳໃຫ້ໄດ້ 65 ບ້ານ ແລະ ກຸມບ້ານວັດທະນະທຳໃຫ້ໄດ້ 3 ກຸ່ມ.
ສ່ວນດ້ານການທ່ອງທ່ຽວ ກະກຽມຈັດກອງປະຊຸມອົບຮົມພະນັກງານບໍລິການທ່ຽວທ່ຽວປະຈຳສົກປີ 2013-2014 ໃຫ້ໄດ້ຢ່າງໜ້ອຍ 2 ຄັ້ງ, ສືບຕໍ່ ອະນຸຍາດການດຳເນີນທຸລະກິດປະຈຳ ປີ 2014 ໃຫ້ແກ່ຂົງເຂດທຸລະກິດທ່ອງທ່ຽວ, ເອົາໃຈໃສ່ໂຄສະນາການທ່ອງ ທ່ຽວຂອງນະຄອນຫຼວງໃຫ້ມີຄວາມ ຫຼາກຫຼາຍສີສັນຂຶ້ນຕື່ມ ແລະ ຈະພັດທະນາແຫຼ່ງທ່ອງທ່ຽວຕ່າງໆໃນທົ່ວນະຄອນ ຫຼວງ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ເດີນທາງເຂົ້າມາທ່ຽວຊົມນະຄອນຫຼວງວຽງຈັນກໍຄື ສປປ ລາວ ນັບມື້ນັບຫຼາຍຂຶ້ນເລື້ອຍໆ.
ທີ່ມາ ເສດຖະກິດ-ສິງຄົມ