ຕະຫຼາດການທ່ອງທ່ຽວແລະການເດີນທາງໃນມຽນມາເຕີບໃຫຍ່ຂະຫຍາຍຕົວຕາມການພັດທະນາຕົວເມືອງ ແລະ ເສດຖະກິດ ເຮັດໃຫ້ຢ່າງກຸ້ງ ມີອາຄານຜູ້ໂດຍສານແຫ່ງໃໝ່ທີ່ພ້ອມໃຫ້ບໍລິການໃນວັນທີ 12 ມີນານີ້ ແລະ ຍັງມີອີກສະໜາມບິນທີ່ກຳລັງຈະກໍ່ສ້າງໃນເມືອງພະໂຄ ເພື່ອຮອງຮັບຊາວຕ່າງຊາດທີ່ເດີນທາງມາຢ້ຽມຢາມມຽນມາ 12,5 ລ້ານຄົນ.
ມຽນມາ ທາມ ເປີດເຜີຍວ່າ ອາຄານຜູ້ໂດຍສານສາກົນແຫ່ງໃໝ່ຢູ່ສະໜາມບິນຢ່າງກຸ້ງກໍ່ສ້າງສຳເລັດສົມບູນແລ້ວ ມີກຳນົດເປີດໃຫ້ບໍລິການໃນວັນທີ 12 ມີນານີ້ ໂດຍອາຄານຫຼັງໃໝ່ເພີ່ມສິ່ງອຳນວຍຄວາມສະດວກຕ່າງໆທີ່ຈະຊ່ວຍບັນເທົາຄວາມແອອັດໃຫ້ກັບສະໜາມບິນຫຼັກຂອງນະຄອນຢ່າງກຸ້ງ, ທັງນີ້ ເມື່ອເປີດໃຫ້ບໍລິການຢ່າງເຕັມຮູບແບບ ອາຄານຜູ້ໂດຍສານແຫ່ງໃໝ່ນີ້ ຈະສາມາດຮອງຮັບຜູ້ໂດຍສານຫຼາຍກວ່າ 6 ລ້ານຄົນຕໍ່ປີ ຫຼາຍກວ່າປະຈຸບັນທີ່ຮອງຮັບໄດ້ 2,7 ລ້ານຄົນຕໍ່ປີ, ສຳລັບແຜນການປັບປຸງສະໜາມບິນໃນຄັ້ງນີ້ ຈະສອດຄ່ອງກັບແຜນແມ່ບົດດ້ານການທ່ອງທ່ຽວຂອງມຽນມາ ທີ່ຕັ້ງເປົ້າໝາຍວ່າ ຈະມີຜູ້ເດີນທາງເຂົ້າມາຈຳນວນ 7,5 ລ້ານຄົນໃນປີ 2020.
ນອກຈາກອາຄານສະໜາມບິນຢ່າງກຸ້ງແລ້ວ ມຽນມາຍັງພັດທະນາສະໜາມບິນນານາຊາດແຫ່ງໃໝ່ (ສະໜາມບິນຫັນທາວະດີ) ຢູ່ເມືອງພະໂຄ ດ້ວຍມູນຄ່າການລົງທຶນຫຼາຍກວ່າ 1,4 ຕື້ໂດລາສະຫະລັດ ໂດຍມີແຜນຈະໃຫ້ແລ້ວສຳເລັດໃນປີ 2022 ເພື່ອຮອງຮັບຜູ້ໂດຍສານທີ່ຈະເດີນທາງເຂົ້າມາ 12 ລ້ານຄົນຕໍ່ປີ ຊຶ່ງຈະດຳເນີນການກໍ່ສ້າງໂດຍ 3 ບໍລິສັດ 2 ສັນຊາດຄື: ບໍລິສັດສິງກະໂປ ຍອງນຳ ໂຣລດິງ, ບໍລິສັດ ຊາງງິ ແອພອດ ແພຣນ ເນີສ ແລະ ເອັນຈິິເນຍ ແລະ ເຈແປນ ເຈຈິຊີ ຄໍປໍເຣເຊິນ.