ວັນທີ 8 ມີນາຜ່ານມາ ໂຮງແຮມແລນມາກແມ່ຂອງລີເວີໄຊ ຮ່ວມກັບອົງການຈັດຕັ້ງແມ່ຍິງລາວໄດ້ຖະແຫຼງຂ່າວເປີດໂຄງການແຟເຊິນ ເພື່ອການກຸສົນຊ່ວຍເຫຼືອສູນພັດທະນາແມ່ຍິງພິການລາວເພື່ອເປັນການສະເຫຼີມສະຫຼອງວັນແມ່ ຍິງສາກົນ ໂດຍມີ ທ່ານ ນາງ ອໍລະໄທ ສັນຕິຄົງຄາ ປະທານໂຮງແຮມ ແລນມາກແມ່ຂອງລີເວີໄຊ ທັງເປັນປະທານຈັດງານຮ່ວມກັບອົງການຈັດຕັ້ງແມ່ຍິງລາວ, ທ່ານ ນາງ ຈັນເພັງ ສີວິລາ ອຳນວຍການສູນພັດທະນາແມ່ຍິງພິການລາວ, ທ່ານ ນາງ ສີອຳພອນ ສີລັດຕະນະກຸນ ຮອງຫົວໜ້າກົມໂຄສະນາ ແລະວັດທະນະທຳ ສູນກາງສະຫະພັນແມ່ຍິງລາວ, ທ່ານປະທານສະມາຄົມນັກທຸລະກິດແມ່ຍິງລາວ ຮອງປະ ທານສະມາຄົມນັກຂ່າວ ແຫ່ງ ສປປ ລາວ ພ້ອມດ້ວຍບັນດາຜູ້ໃຫ້ການສະໜັບສະໜູນ ແລະສື່ມວນຊົນເຂົ້າຮ່ວມ.
ໂຄງການດັ່ງກ່າວແມ່ນໄດ້ຮັບຄວາມສົນໃຈຈາກຜູ້ສະໜັບສະໜູນຢ່າງຫຼວງຫຼາຍເປັນຕົ້ນເຣຟຣອນ, ຮ້ານຕັດຜົມຊິກແຮ, ບໍລິສັດຟີໂອນິກສອີເວັນເອເຊຍລາວ, ແສງດາວີຟິດເນັດ, ວາລະສານ ແລະເວັບໄຊຮ້ອຍແປດອາຊີບ ແລະອື່ນໆອີກ.
ພ້ອມດຽວກັນນັ້ນໂຮງແຮມແລນມາກແມ່ຂອງລີເວີໄຊຍັງໄດ້ຮ່ວມກັບສູນພັດທະນາແມ່ຍິງພິການລາວຈັດງານ ວາງສະແດງສິນຄ້າຫັດຖະກຳທີ່ເປີດກວ້າງໃຫ້ລູກຄ້າໄດ້ຊ່ວຍເຫຼືອບັນດາເອື້ອຍນ້ອງແມ່ຍິງພິການລາວໂດຍການ ສະໜັບສະໜູນຊື້ສິນຄ້າຂອງພວກເຂົາ, ຮຽນຮູ້ວິທີການຜະລິດງານສີມືພ້ອມຍັງເປັນໂອກາດທີ່ເຮົາຈະໄດ້ເຂົ້າໃຈເຖິງຄວາມລຳບາກຂອງພວກເຂົາຜ່ານການສະແດງວີດີທັດ, ສາທິດການຕ່ຳຫູກຝຶກວິຊາຊີບແມ່ຍິງຫ້ວຍຫົງ ພ້ອມທັງການວາງສະແດງຊຸດຈາກນັກອອກແບບທີ່ ເຂົ້າຮ່ວມໂຄງການ.
ຊຶ່ງງານວາງສະແດງຈະມີຕັ້ງແຕ່ ວັນ ທີ 8-31 ມີນາ 2016 ທີ່ໂຮມແຮມແລນມາກ, ນອກນັ້ນໂຮງແຮມ ແລນມາກ ຮ່ວມກັບເຣຟຣອນ ແລະຮ້ານຕັດ ຜົມຊິກແຮ ຈະປິດທ້າຍໂຄງການລະດົມ ທຶນຈາກງານແຟເຊິນເພື່ອການກຸສົນໂດຍການປະມູນຊຸດທີ່ໄດ້ຮັບການຊ່ວຍເຫຼືອຈາກບັນດານັກອອກແບບທັງລາວ ແລະຕ່າງປະເທດພ້ອມທັງການເຂົ້າຮ່ວມການສະແດງຊຸດປະຈຳຊາດຂອງບັນດາສະຖານທູດອີກດ້ວຍຊຶ່ງງານດັ່ງກ່າວຈະຈັດຂຶ້ນໃນວັນທີ 31 ມີນາ 2016 ທີ່ໂຮງແຮມແລນມາກເຊັ່ນດຽວກັນ.
ທີ່ມາ: