ເພື່ອເປັນການສືບຕໍ່ຮ່ວມມືຮອບດ້ານໃນວຽກງານປົກປ້ອງ ແລະ ສະກັດກັ້ນອາຊະຍາກໍາຢາເສບຕິດຂ້າມຊາຍແດນລະຫວ່າງແຂວງຫຼວງພະບາງ ຫົວພັນ ຂອງ ສປປ.ລາວ ແລະ ແຂວງ ເຊິນລາ ແຫ່ງ ສສ. ຫວຽດນາມ ໃຫ້ແໜ້ນແຟ້ນຂຶ້ນກວ່າເກົ່າ ທັງ 3 ແຂວງຈິ່ງໄດ້ພ້ອມກັນຮ່ວມລົງນາມເຊັນບົດບັນທຶກຊ່ອຍຈໍາຂຶ້ນໃນວັນທີ 05 ມີນາ 2016 ທີ່ຜ່ານມາ ໂດຍກອງປະຊຸມໄດ້ເປັນເອກະພາບຍົກເອົາ 9 ບັນຫາທີ່ສໍາຄັນພ້ອມກັນນໍາມາຈັດຕັ້ງປະຕິບັດຮ່ວມກັນໃນສົກປີ 2016-2017 ໃຫ້ປາກົດຜົນເປັນຈິງ ເຊິ່ງໃນວາລະກອງປະຊຸມຍັງໄດ້ຕີລາຄາສູງເຖິງໝາກຜົນຂອງການຈັດຕັ້ງປະຕິບັດວຽກງານການຮ່ວມມືກັນໃນການປະສານສົມທົບປ້ອງກັນ ແລະ ສະກັດກັ້ນອາຊະຍາກໍາ ເປັນຕົ້ນ ແມ່ນອາຊະຍາກໍາຢາເສບຕິດຂວ້າມຊາຍແດນໄລຍະ 2 ປີ (2013-2015) ໄດ້ມີຫຼາຍວຽກງານທີ່ພົ້ນເດັ່ນ ເປັນຕົ້ນແມ່ນໄດ້ເຮັດໃຫ້ບໍລິເວນຊາຍແດນຂອງທັງສາມແຂວງມີສະຖຽນລະພາບທາງດ້ານການເມືອງ ຮັບປະກັນອະທິປະໄຕຜືນແຜນດິນອັນຄົບຖ້ວນຂອງກັນແລະກັນ ສັງຄົມມີຄວາມສະຫງົບ ແລະ ມີການພັດທະນາຮອບດ້ານ.

ພ້ອມກັນນັ້ນ ເຈົ້າໜ້າທີ່ 3 ແຂວງ ສຸມໃສ່ແກ້ໄຂຄະດີຢາເສບຕິດໄດ້ 9 ລາຍ ຜູ້ຖືກຫາ 15 ຄົນ ຍຶດຂອງກາງປະເພດເຮໂຣອິນ 229 ແທ່ງ ຢາຝິ່ນ 10,45 ກິໂລກຣາມ ຢາບ້າ 18.850 ເມັດ ເຄື່ອງຈັກອັດແທ່ງເຮໂລອິນ 1 ເຄື່ອງ ອາວຸດເສິກ ເງິນ ແລະ ອຸປະກອນຕ່າງໆຈໍານວນນຶ່ງ ຈາກຜົນງານດັ່ງກ່າວ ທັງສາມແຂວງກໍຍັງໄດ້ສືບຕໍ່ລົງຕິດຕາມກວດກາ ເກັບກໍາຂໍ້ມູນຂ່າວສານກ່ຽວກັບອາຊະຍາກໍາຢາເສບຕິດຢ່າງເປັນປົກກະຕິແຕ່ຂັ້ນແຂວງລົງໄປຮອດຂັ້ນບ້ານ ເຈົ້າໜ້າທີ່ທີ່ກ່ຽວຂ້ອງໄດ້ຮ່ວມມືກັນຈັດເຝິກອົບຮົມທາງດ້ານວິຊາສະເພາະ ອໍານວຍຄວາມສະດວກໃຫ້ປະຊາຊົນສອງຊາດທີ່ອາໄສຢູ່ລຽບຕາມຊາຍແດນໄປມາຊື້ຂາຍສິນຄ້າ ເສີມຂະຫຽາຍມູນເຊື້ອຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຕັ້ງໜ້າສຶກສາອົບຮົມໂຄສະນາ ຂົນຂວາຍປະຊາຊົນໃຫ້ມີຫຼັກໝັ້ນ ບໍ່ເຊື່ອຟັງການໂຄສະນາຊວນເຊື່ອຂອງກຸ່ມຄົນບໍ່ດີທີ່ຫວັງແບ່ງແຍກຄວາມສາມັກຄີລະຫວ່າງຊົນເຜົ່າຢູ່ເຂດລຽບຕາມຊາຍແດນ ເປັນເຈົ້າການຮ່ວມມືກັບເຈົ້າໜ້າທີ່ກອງຫຼອນ ກໍາລັງປ້ອງກັນ ແລະ ສະກັດກັ້ນຢາເສບຕິດ ແລະ ປະຕິບັດຂໍ້ກໍານົດວ່າດ້ວຍລະບຽບຊາຍແດນຢ່າງເຂັ້ມງວດ.