ຫຼັງຈາກທີມງານ ແລະ ອາສາສະໝັກກູ້ໄພໄປເຖິງທີ່ເກີດເຫດ ພົບຜູ້ປະສົບເຫດ 1 ຄົນເປັນຊາຍ ໄດ້ຮັບບາດເຈັບໜັກບໍລິເວນຫົວ ມີຮອຍຊ້ຳຈາກການກະທົບທີ່ຕາຊ້າຍ ຫົວມີຮອຍບາດແຜ ນິ້ວມືມີບາດແຜເລິກສົມຄວນ ແລະ ຕາມຂາມີຮອຍບາດແຜເຫຼີ້ນ

ຈາກການກວດສອບສະຖານທີ່ພົບລົດຈັກ 1 ຄັນລໍ້ໜ້າເສຍຫາຍໜັກ ແລະ ລົດເປ່ເພ່ສົມຄວນ ນອກຈາກນັ້ນຍັງພົບຊິ້ນສ່ວນແວ່ນລົດໃຫຍ່ ຍີ່ຫໍ້ VIGO ແລະ ຕາລົດທີ່ຕົກເຍ່ຍໃນບໍລິເວນດັ່ງກ່າວ.

ຈາກການສອບຖາມຜູ້ເຫັນເຫດການໄດ້ເລົ່າວ່າ ລົດຈັກກຳລັງມາແຕ່ທາງນາທົ່ມມຸ່ງໜ້າໄປທາງຫໍພັກຊີເກມ ເມື່ອຜູ້ກ່ຽວມາເຖິງຈຸດເກີດເຫດ ລົດໃຫຍ່ VIGO ຂັບມາດ້ວຍຄວາມໄວສູງໄດ້ເຈີດມາຕຳເອົາລົດຜູ້ກ່ຽວເຮັດໃຫ້ລົດ ແລະ ຄົນກະເດັນອອກແຄມທາງ

ຈາກນັ້ນລົດວີໂກກໍ່ໄດ້ຮີບຂັບໜີໄປ ແຕ່ເນື່ອງຈາກລໍ້ໜ້າລົດໃຫຍ່ຄັນດັ່ງກ່າວເກີດການຮົ່ວເຮັດໃຫ້ໄປໄດ້ບໍ່ໄວ ພົນລະເມືອງດີທີ່ເຫັນເຫດການເມື່ອເຫັນສະພາບວ່າລົດໃຫຍ່ກຳລັງຈະໜີຄວາມຜິດຈຶ່ງໄດ້ຂັບລົດຈັກໄປຖ່າຍເອົາປ້າຍລົດໄວ້ໄດ້ທັນ ພ້ອມກັບສັງເກດເຫັນຄົນຂັບເປັນໄວລຸ້ນທ່າທາງມຶນເມົາ ແລະ ມີພົນລະເມືອງດີທີ່ຢູ່ໃນເຫດການກໍ່ໂທແຈ້ງເບີສຸກເສີນ 1623 ເພື່ອຂໍຄວາມຊ່ວຍເຫຼືອ

ເປັນອີກຄັ້ງກັບປະກົດການຫຍໍ້ທໍ້ຂອງເຫດການຕຳແລ້ວໜີຄວາມຜິດ ອຸບັດຕິເຫດທີ່ບໍ່ມີໃຜຢາກໃຫ້ເກີດເມື່ອເກີດຂື້ນແລ້ວຕ້ອງຮັບຜິດຊອບ ບໍ່ວ່າຝ່າຍໃດຈະຜິດ ຫຼື ຖືກຄວນມີນ້ຳໃຈລົງມາຊ່ວຍເຫຼືອຄູ່ກໍລະນີ ການທີ່ທ່ານໜີຈາກຄວາມຜິດນັ້ນເຖິງທາງເຈົ້າໜ້າທີ່ບໍ່ສາມາດກວດສອບບໍ່ໄດ້ສາວບໍ່ເຖິງ “ແຕ່ເຊື່ອເຖາະວ່າເຈົ້າຈະໜີກົດແຫງກຳບໍ່ໄດ້”

ຂໍຂອບໃຈພົນລະເມືອງດີທຸກທ່ານທີ່ໃຫ້ການຊ່ວຍເຫຼືອໃນການນຳເອົາຫຼັກຖານຈາກຄູ່ກໍລະນີໄວ້ໄດ້ ແລະ ຖືວ່າເປັນການຕັດສິນໃຈທີ່ຖືກທີ່ພຽງແຕ່ນຳຖ່າຍຮູບໄວ້ຕໍ່ໄປກໍ່ຄົງເປັນໜ້າທີ່ຂອງເຈົ້າໜ້າທີ່ທີ່ຕ້ອງດຳເນີນຄະດີກັບຜູ່ກະທຳຜິດຕາມກົດໝາຍບ້ານເມືອງ.