ພາຍຫຼັງທີ່ທາງ ບໍລິສັດ ລາວເວີນ ໄດ້ເປີດໃຫ້ບໍລິການສວນນ້ຳ ທະເລຈຳລອງ (Ocean Park) ເຊິ່ງເປັນສວນນ້ຳທີ່ມີຄວາມທັນສະໄໝທີ່ສຸດໃນປະເທດລາວ ກໍໄດ້ຮັບຄວາມນິຍົມຈາກປະຊາຊົນ ໂດຍສະເພາະແມ່ນເດັກນ້ອຍໃນນະຄອນຫຼວງວຽງຈັນເປັນຢ່າງດີ ສອດຮັບກັບລະດູຮ້ອນກຳລັງຢ່າງເຂົ້າມາ. ນັ້ນຖືເປັນບາດກ້າວຂະຫຍາຍຕົວຂອງທຸລະກິດບໍລິການໃນປະເທດລາວ, ເປັນຄວາມຈະເລີນກ້າວໜ້າຂອງປະເທດລາວ ແລະກໍເປັນໜ້າຕາຂອງຄົນລາວ ໄດ້ມີຄວາມພາກພູມໃຈ.
ແນວໃດກໍຕາມ, ທ່າມກາງຄວາມພາກພູມໃຈ ແລະສຽງຍ້ອງຍໍຊົມເຊີຍ ກໍຍັງປາສະຈາກຫາງສຽງຈົ່ມວ່າຈາກພໍ່ແມ່ປະຊາຊົນບໍ່ໄດ້ ໂດຍສະເພາະແມ່ນການເກັບຄ່າບໍລິການທີ່ແພງເກີນຄ່າສະເລ່ຍລາຍຮັບຂອງລັດຖະກອນ ຫຼືເວົ້າຢ່າງໜຶ່ງວ່າ ລູກຫຼານຂອງພະນັກງານ-ລັດຖະກອນທີ່ອາໄສເງິນເດືອນເປັນລາຍຮັບຫຼັກນັ້ນ ບໍ່ສາມາດເຂົ້າໃຊ້ບໍລິການໃນສວນນ້ຳດັ່ງກ່າວໄດ້.
ຜູ້ໃຊ້ບໍລິການທ່ານໜຶ່ງ ທີ່ເຂົ້າໃຊ້ບໍລິການ ໄດ້ກ່າວວ່າ ຕົນເອງຮູ້ສຶກພາກພູມໃຈທີ່ປະເທດຊາດຂອງເຮົາ ມີຄວາມທັນສະໄໝຫຼາຍດ້ານ ບໍ່ວ່າຈະເປັນສວນທາທາລະນະຫຼາຍແຫ່ງໃນນະຄອນຫຼວງວຽງຈັນ ແລະຖານບໍລິການຂອງພາກເອກະຊົນຈຳນວນຫຼາຍ ໜຶ່ງໃນນັ້ນແມ່ນສວນນ້ຳໄອເຕັກ ເຊິ່ງມີຄວາມທັນສະໄໝ ສວຍງາມ ສ່ວນລາຄາກໍຖືວ່າເໝາະສົມກັບຄວາມສວຍງາມທັນສະໄໝແລະການລົງທຶນອັນມະຫາສານ ແຕ່ກໍໜ້າເສຍດາຍທີ່ຄ່າບໍລິການດັ່ງກ່າວຖ້າທຽບກັບຄ່າສະເລ່ຍຂອງເງິນເດືອນຂອງພະນັກງານລັດຖະກອນ ພັດຍັງຖືວ່າແພງເກີນກຳລັງຊັບຂອງພະນັກງານລັດຖະກອນ ທີ່ອາໄສເງິນເດືອນເປັນລາຍຮັບຕົ້ນຕໍ, ຄອບຄົວຂອງເຂົາເຈົ້າອາດຈະບໍ່ມີໂອກາດໄດ້ເຂົ້າມາໃຊ້ບໍລິການໃນສະຖານທີ່ດັ່ງກ່າວ.
ຜູ້ໃຊ້ບໍລິການທ່ານດັ່ງກ່າວໄດ້ບອກວ່າ ຖ້າຈະເຂົ້າໄປໃຊ້ບໍລິການໃນສວນນ້ຳດັ່ງກ່າວ ຖ້າຄອບຄົວໃດ ມີພໍ່,ແມ່ ແລະລູກ 1 ຄົນ ຕ້ອງມີເງິນຢ່າງໜ້ອຍ 500,000 ກີບ ຫຼືປະມານ 61 ໂດລາສະຫະລັດ ຈຶ່ງສາມາດເຂົ້າຊົມໃຊ້ໄດ້ ເພາະຄ່າບໍລິການມີດັ່ງນີ້:
1. ຄ່າຜ່ານປະຕູສຳລັບເດັກນ້ອຍ 1 ຄົນ 50,000 ກີບ
2. ຄ່າຜ່ານປະຕູສຳລັບຜູ້ເປັນພໍ່ 100,000 ກີບ
3. ຄ່າຜ່ານປະຕູສຳລັບຜູ້ເປັນແມ່ 100,000 ກີບ
4. ຄ່າເຊົ່າຕູບ 100,000 ກີບ
5. ແລະຄ່າອາຫານຢ່າງໜ້ອຍ 150,000 ກີບ (ເພາະບັດຜ່ານປະຕູບໍ່ສາມາດແລກອາຫານໄດ້)
ລວມກັນເປັນ 500,000 ກີບ (ນີ້ເປັນຄ່າບໍລິການສຳລັບຄອບຄົວທີ່ມີລູກຄົນດຽວ).
ແນວໃດກໍຕາມ, ຜູ້ຊົມໃຊ້ທ່ານດັ່ງກ່າວໄດ້ຝາກຄວາມຫວັງວ່າ ທາງເຈົ້າຂອງສວນດັ່ງກ່າວຈະພິຈາລະນາປັບລາຄາລົງຕື່ມ ເພື່ອໃຫ້ເດັກນ້ອຍໃນຄອບຄົວທີ່ຖານະບໍ່ຄ່ອຍດີໄດ້ມີໂອກາດໄດ້ເຂົ້າຊົມໃຊ້.
