ເຈົ້າໜ້າທີ່ຊຸດປາບປາມຢາເສບຕິດ ເມືອງໄຊເຊດຖາ ນະຄອນຫຼວງວຽງຈັນ ໄດ້ບຸກເຂົ້າທຳລາຍແກ້ງຄ້າຂາຍຢາເສບຕິດລາຍໃຫຍ່ເຂດບ້ານ ໜອງບົວ ທອງ ເມືອງສີໂຄດຕະບອງ ນະຄອນຫຼວງວຽງຈັນ ສາມາດຈັບຕົວຜູ້ຕ້ອງຫາໄດ້ 4 ຄົນ, ຍິງ 1 ຄົນພ້ອມຂອງກາງ ຢາບ້າກວ່າ27 ພັນເມັດ, ຢາໄອ 2 ຖົງ, ເງິນສົດ ແລະອາວຸດປືນ 4 ກະບອກ.
ທ່ານ ພັນໂທ ຄຳເກິ່ງ ຈັນສຸລິມາດ ຫົວໜ້າກອງບັນຊາການ ປກສ ເມືອງໄຊເຊດຖາ ໄດ້ໃຫ້ຮູ້ວ່າ: ໃນໄລຍະເດືອນກຸມພາ ຜ່ານໄດ້ມີພົນລະເມືອງດີເຂົ້າມາລາຍງານມີກຸ່ມແກ້ງຊື້ຂາຍຢາເສບຕິດ (ຢາບ້າ) ຢູ່ເຂດບ້ານໜອງບົວທອງ, ຕົກມາຮອດວັນທີ 2 ມີນາ ເວລາປະມານ 13 ໂມງເຈົ້າໜ້າທີ່, ໄດ້ລົງມ້າງເປົ້າໝາຍຊຶ່ງເປັນເຮືອນຫ້ອງແຖວສອງຊັ້ນ, ການເຂົ້າຈັບກຸມຫ້ອງທີ 1 ພົບຜູ້ຖືກຫາຈຳນວນ 2 ຄົນຄື: ທ້າວ ວັນນະແສງ ຫຼື ຕ້ຳ ອາຍຸ 24 ປີຢູ່ບ້ານໜອງບົວທອງ, ທ້າວ ມະໄລກັນ ຫຼື ກື້ມ ອາຍຸ 22 ປີ, ຊຶ່ິ່ງເຈົ້າໜ້າທີ່ໄດ້ກວດ ຄົ້ນຫ້ອງນອນພົບຂອງກາງຢາບ້າ 964 ເມັດ, ປືນສັ້ນ 1 ກະບອກ, ເງິນ 4 ລ້ານ ກວ່າກີບ, 5.500 ບາດ, ລົດຈັກ 1 ຄັນ, ລົດໃຫຍ່ 1 ຄັນ ແລະຢາໄອ 2 ຖົງນ້ອຍ.
ຈາກນັ້ນ ທາງເຈົ້າໜ້າທີ່ໄດ້ຂະຫຍາຍ ຜົນໄປຫ້ອງທີ 2 ແລ້ວເຂົ້າຈັບກຸມ, ພົບຜູ້ຖືກຫາ 2 ຄົນຄື: ນາງ ບົວສະຫວັນ ອາຍຸ 29 ປີ (ເຈົ້າຂອງຫ້ອງ) ແລະທ້າວ ຄຳ ແຫຼ້ ອາຍຸ 39 ປີ ຢູ່ບ້ານນາແຮ່ ເມືອງສີໂຄດຕະບອງ ນະຄອນຫຼວງວຽງຈັນ, ຜ່ານການກວດຄົ້ນຫ້ອງນອນພົບຂອງ ກາງຢາບ້າ ຢູ່ຕູ້ແຕ່ງໜ້າ ຈຳນວນ 22 ເມັດ, ຢາໄອ 3 ຖົງນ້ອຍ ແລະພົບຢາບ້າຢູ່ຕູ້ເຊັບ ຊຶ່ິ່ງເປັນຂອງ ນາງ ບົວສະຫວັນ ອີກຈຳນວນ 3 ແພັກເຄິ່ງ, ພົບປືນສັ້ນ 1 ກະບອກ ຢູ່ລົດເກງຂອງ ນາງ ບົວສະຫວັນ, ເງິນ 9 ລ້ານກີບ, 31.500 ບາດ, ແລະກວດຄົ້ນຕົວ ທ້າວ ຄຳສອນ ພົບປືນ ສັ້ນ 2 ກະບອກ ແລະເຄື່ອງຕິດຕົວຈຳນວນໜຶ່ງ, ພາຫະນະລົດຈັກ 1 ຄັນ, ຊຶ່ງລວມການຈັບກຸ່ມແກ້ງດັ່ງກ່າວມີຢາບ້າທັງໝົດ 27.786 ເມັດ, ປືນ 4 ກະບອກ, ລົດໃຫຍ່ 2 ຄັນ ແລະ ລົດຈັກອີກ 2 ຄັນ.
ທ່ານ ພັນໂທ ຄຳເກິ່ງ ຈັນສຸລິມາດ ຍັງເປີດເຜີຍວ່າ: ຜ່ານການສືບສວນສອບສວນພວກກ່ຽວໄດ້ຮັບສາລະພາບວ່າ ໄດ້ເຄື່ອນໄຫວຂາຍຢາເສບຕິດມາແຕ່ປີ 2015, ໂດຍຄະດີດັ່ງກ່າວເຈົ້າໜ້າທີ່ໄດ້ສືບຕໍ່ເພື່ອນຳຫາຜູ້ຮ່ວມຂະບວນການມາດຳເນີນຄະດີ.
ທີ່ມາ: