ທ່ານ ໂທຣຸ ຮາເຊກາວາ ຮອງປະທານນິສສັນ ມໍເຕີ ອາຊີ-ປາຊິຟິກ ແລະ ຄອບປໍເຣທ ວີພີ ນິສສັນ ມໍເຕີ ເປີດເຜີຍວ່າ ນິສສັນກຽມເປີດໂຮງງານປະກອບລົດຢູ່ມຽນມາ ແລະ ຈະມີກຳລັງການຜະລິດຢູ່ທີ່ 10 ພັນຄັນ.
ນິສສັນເປີດເຜີຍວ່າ ກຽມເປີດໂຮງງານປະກອບລົດຢູ່ມຽນມາ ເປັນໂຮງງານທີ່ຮ່ວມກັບພັນທະມິດ ຍ່າງຕັນຈົງ ມໍເຕີກຣຸບ ຕັ້ງຢູ່ທາງພາກຕາເວັນອອກສຽງໃຕ້ຂອງມຽນມາ ໂຮງງານແຫ່ງໃໝ່ນີ້ຈະຈ້າງແຮງງານປະມານ 300 ຄົນ ແລະ ມີກຳລັງການຜະລິດ 10 ພັນຄັນ ນອກຈາກນີ້ ຍັງສົ່ງພະນັກງານຈຳນວນ 200 ຄົນໄປຝຶກອົບຮົມຢູ່ທີ່ໂຮງງານຕັນຈົງໃນມາເລເຊຍ ເພື່ອໃຫ້ໄດ້ຮັບຄວາມຮູ້ມາປະກອບກັບການເຮັດວຽກໃນໂຮງງານແຫ່ງໃໝ່.
ໂດຍພັນທະມິດນິສສັນ ແລະ ຕັນຈົງຈະຍັງເພີ່ມປະສິດທິພາບໃນການຂະຫຍາຍເຄືອຂ່າຍທຸລະກິດຢູ່ມຽນມາ ທີ່ມີສຳນັກງານໃຫຍ່ ແລະ ຕົວແທນຈຳໜ່າຍໃນເມືອງຢ່າງກຸ້ງ ແລະ ເປັນການເປີດຕະຫຼາດໃໝ່ໃຫ້ກັບປະເທດທີ່ກຳລັງພັດທະນາ, ໂຮງງານແຫ່ງໃໝ່ນີ້ຈະເລີ່ມຜະລິດລົດຮຸ່ນໃໝ່ພາຍໃຕ້ຍີ່ຫໍ້ນິສສັນ ຮຸ່ນທຳອິດມີຄວາມເປັນໄປໄດ້ວ່າ ຈະຜະລິດນິສສັນ ອັລເມຣ່າ(ຊັນນີ), ລົດອີໂຄຄາ ຊີດານ ໄດ້ຮັບຄວາມນິຍົມຈາກຫຼາຍປະເທດ ທີ່ເຂົ້າຈຳໜ່າຍ ແລະ ຈະມີຮຸ່ນອື່ນໆຕາມມາໃນອະນາຄົດ ບໍ່ວ່າຈະເປັນລົດອະເນກປະສົງ, ລົດມິນິບັສ ແລະ ລົດກະບະ.
ຂໍ້ມູນຈາກ http://www.sedthakid.la/