ນົກອິນຊີ ເປັນສັດນໍາໂຊກປະຈໍາງານກິລາມະຫາວິທະຍາໄລລາວ ຂະນະທີ່ ງານເປີດມີ 4 ລາຍການສະແດງງານມະຫາກໍາກິລາ ມະຫາວິທະຍາໄລລາວ ຄັ້ງທີ 1 ທີ່ມະຫາວິທະຍາໄລແຫ່ງຊາດ ເປັນເຈົ້າພາບຈັດການແຂ່ງຂັນລະຫວ່າງວັນທີ 5-15 ມີນານີ້ ທີ່ນະຄອນຫຼວງວຽງຈັນ ຈະໃຊ້ ນົກອິນຊີ ເປັນມາສຄອສ (ສັດນໍາໂຊກ) ປະຈໍາການແຂ່ງ ຂະນະທີ່ ງານເປີດຈະມີການສະແດງເຖິງ 4 ລາຍການໃຫຍ່ທີ່ສະແດງເຖິງຊາວໜຸ່ມລາວ ແລະ ຄວາມສາມັກຄີ.

ງານເປີດການແຂ່ງຂັນກິລາ ມະຫາວິທະຍາໄລລາວ ຄັ້ງທີ 1 ຈະເປີດສາກຢ່າງເປັນທາງການ ໃນວັນເສົາທີ 5 ມັງກອນ 2016ນີ້ ທີ່ສະໜາມກິລາກາງມະຫາວິທະຍາໄລແຫ່ງຊາດ ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ໂດຍສັດນໍາໂຊກປະຈໍາການແຂ່ງຂັນແມ່ນ ນົກອິນຊີ ໂຕຜູ້ ແລະ ໂຕແມ່ ໂດຍສັນຍາລັກນີ້ສະແດງເຖິງ ນົກອິນຊີ ປຽບເໝືອນ ຊາວໜຸ່ມລາວ ບໍ່ຫວັ່ນໄຫວຕໍ່ພາຍຸລົມແດງ ດັ່ງຄໍາເວົ້າຂອງ ທ່ານ ໄກສອນ ພົມວິຫານ ຜູ້ນໍາອັນເຄົາລົບຮັບຂອງ ສປປລາວ.

ທ່ານ ຮສ. ດຣ. ອານຸລົມ ວິໄລພອນ ຫົວໜ້າກໍາມະການກອງເລຂາງານມະຫາກໍາກິລາມະຫາວິທະຍາໄລລາວຄັ້ງທີ 1 ໃຫ້ສໍາພາດວ່າ: ງານຄັ້ງນີ້ໄດ້ຕົກລົງເອົາ ນົກອິນຊີ ເປັນສັດນໍາໂຊກປະຈໍາການແຂ່ງຂັນ ເນື່ອງຈາກງານຄັ້ງນີ້ແມ່ນງານແຂ່ງຂັນຂອງຊາວໜຸ່ມຜູ້ມີຄວາມຮູ້, ຄວາມສາມາດ, ເປັນກໍາລັງສໍາຄັນ ແລະ ອານາຄົດຂອງປະເທດຊາດ ເໝືອນດັ່ງຄໍາເວົ້າຂອງ ທ່ານ ໄກສອນ ພົມວິຫານ ຜູ້ນໍາອັນແສນເຂົາລົບຮັກທີ່ເຄີຍກ່າວໄວ້ວ່າ “ຊາວໜຸ່ມປຽບເໝືອນນົກອິນຊີ ທີ່ບໍ່ຫວັ່ນໄຫວຕໍ່ພາຍຸລົມແດງ” ເຊິ່ງຄໍາເວົ້າດັ່ງກ່າວໄດ້ຍົກໃຫ້ເຫັນເຖິງຊາວໜຸ່ມປຽບເໝືອ ນົກອິນຊີ ທີ່ສາມາດມ່ອງກວ້າງເຫັນໄກ ແລະ ບໍ່ຫວັ່ນໄຫວຕໍ່ລົມພາຍຸເຖິງຈະບິນຢູ່ເທິງທ້ອງຟ້າກໍ່ຕາມ.

ຂະນະທີ່ ໃນພິທີເປີດການແຂ່ງຂັນການຢ່າງເປັນທາງການຈະມີການສະແດງ 4 ລາຍການໃຫຍ່ໂດຍ ທ່ານ ນາງ ສະນີນ່າ ສີສົມພູ ກໍາມະການອາສາສະໝັກ ຈາກຄະນະສຶກສາສາດ ສາຂາວິຊາ ພະລະສຶກສາ ໃຫ້ສໍາພາດວ່າ: ການສະແດງໃນພິທີເປີດຈະສະແດງຢູ່ 4 ລາຍການ ໃນນັກສະແດງຂອງມະຫາວິທະຍາໄລ ແລະ ນ້ອງນັກຮຽນມັດທະຍົມອ້ອມຂ້າງເຂົ້າຮ່ວມສະແດງ 1.000 ກວ່າຄົນ ຫຼັງໄດ້ຝຶກຊ້ອມກັນມາຫຼາຍເດືອນ ເຊິ່ງສ່ອງແສງເຖິງຊາວໜຸ່ມລາວທີ່ກໍາລັງສຶກສາ ແລະ ຮຽນຮູ້ ເພື່ອສືບທອດພາລະກິດການປົກປັກຮັກສາ ແລະ ພັດທະນາປະເທດຊາດ ໃຫ້ຈະເລີນຮຸ່ງເຮື່ອງສີວິໄລ ແລະ ພຽບພ້ອມກັບ 5 ຫຼັກມູນການສຶກສາຄື: ຄຸນສົມບັດການສຶກສາ, ສີລະປະສຶກສາ, ແຮງງານສຶກສາ, ປັນຍາສຶກສາ ແລະ ພາລະສຶກສາ.

ສໍາລັບ ນົກອິນຊີ ຈະສັດນໍາໂຊກປະຈໍາການແຂ່ງຂັນກິລາມະຫາວິທະຍາໄລລາວ ຄັ້ງທີ 1 ປະຈໍາປີ 2016 ທີ່ມະຫາວິທະຍາໄລແຫ່ງຊາດ ນະຄອນຫຼວງວຽງຈັນ ສ່ວນລາຍການສະແດງມີ 4 ລາຍສະແດງປະກອບດ້ວຍ: ລາຍການທີ 1 ບົດຟ້ອນ ອະນາຄົດນັກສຶກສາລາວກ້າວໄປ, ລາຍການທີ 2 ກິລາກາຍຍະກໍາໃຈປະສານມິດໄມຕີຈິດມິດຕະພາບ, ລາຍການທີ 3 ບົດຟ້ອນສາມັກຄີຮ່ວມໃຈກັນຕໍ່ສູ້ສູ່ຄວ່າສີວິໄລ ແລະ ລາຍການສຸດທ້າຍ ຍິນດີຕ້ອນຮັບເຂົ້າສູ່ງານມະຫາກໍາກິລາ ມະຫາວິທະຍາໄລລາວ ຄັ້ງທີ 1. ນອກນັ້ນ, ຍັງຈະມີການສະແດງຕ່າງໆເປັນຕົ້ນກໍ່ແມ່ນບົດເພງຈາກສີລະປິນລາວທີ່ມີຊື່ສຽງເຂົ້າຮ່ວມປະກອບສ່ວນໃນງານອີກດ້ວຍ.

ພາກສ່ວນທີ່ເຂົ້າຮ່ວມການແຂ່ງຂັນມີ:

1. ວິທະຍາຄານປ້ອງກັນຄວາມສະຫງົບ
2. ມະຫາວິທະຍາໄລຈຳປາສັກ
3. ສະມາຄົມສຶກສາເອກະຊົນ
4. ມະຫາວິທະຍາໄລວິທະຍາສາດສຸຂະພາບ
5. ກິລາວິທະຍາໄລພາກລັດ
6. ມະຫາວິທະຍາໄລສຸພານຸວົງ
7. ວິທະຍາຄານກອງທັບ
8. ມະຫາວິທະຍາໄລສະຫວັນນະເຂດ
9. ມະຫາວິທະຍາໄລແຫ່ງຊາດ

ລາຍການແຂ່ງຂັນກິລາປະເພດຕ່າງໆຂອງງານມະຫາກຳກິລາມະຫາວິທະຍາໄລລາວ ຄັ້ງທີ I ມີດັ່ງນີ້: