ໂຄງການກໍ່ສ້າງ ເສັ້ນທາງຫຼວງແຫ່ງຊາດ ເລກທີ 18A ແຕ່ແຍກທາງເລກທີ 13 ໃຕ້ ບ້ານທາງແບ່ງຫຼັກ 48 ເມືອງປະທຸມພອນ ແຂວງຈຳປາສັກ ຫາສາມແຍກເມືອງສາມັກຄີໄຊ ແຂວງອັດຕະປື, ປະ ຈຸບັນການກໍ່ສ້າງມີຄວາມຄືບໜ້າ ແລະ ປະຕິບັດໄດ້ປະມານ 12% ຂອງໜ້າວຽກທັງໝົດ, ຄາດວ່າຈະໃຫ້ສຳເລັດໃນທ້າຍປີ 2017.
ທ່ານ ບາສີ ພອນແກ້ວ ຫົວໜ້າຮັບຜິດຊອບ ໂຄງການກໍ່ສ້າງທາງຫຼວງແຫ່ງຊາດ 18A ອັດຕະປື-ປະທຸມພອນ ໄດ້ເປີດເຜີຍໃຫ້ຮູ້ວ່າ: ການກໍ່ສ້າງທາງປູຢາງ ແຕ່ເມືອງສາມັກຄີໄຊ ແຂວງອັດຕະປື-ແຍກທາງ 13 ໃຕ້ ບ້ານທາງແບ່ງຫຼັກ 48 ເມືອງປະທຸມພອນ ແຂວງຈຳປາສັກ ແມ່ນໄດ້ເລີ່ມຈັດຕັ້ງປະຕິບັດ ມາແຕ່ເດືອນມັງກອນປີ 2013 ມີຄວາມຍາວທັງໝົດ 106 ກວ່າກິໂລແມັດ, ອອກແບບເປັນທາງຊັ້ນ 3, ໜ້າທາງປູຢາງຂົ້ວ, ຄວາມກວ້າງໜ້າທາງທັງໝົດ 9 ແມັດ ແລະ ຮັບນ້ຳໜັກໄດ້ 11 ໂຕນ, ການກໍ່ສ້າງແບ່ງອອກເປັນ 3 ໄລຍະ, ໄລຍະທີ 1 ແຕ່ທາງແຍກ 13 ໃຕ້ ບ້ານທາງແບ່ງຫຼັກ 48 ເມືອງປະທຸມພອນ ແຂວງຈຳປາສັກ ຫາ ເຊຄຳພໍ ຍາວ 30 ກວ່າກິໂລແມັດ; ໄລຍະທີ 2 ແຕ່ເຊຄຳພໍຫາບ້ານໃໝ່ເຊປຽນ ຍາວ 33 ກິໂລແມັດ, ໄລຍະທີ 3 ແຕ່ບ້ານໃໝ່ເຊປຽນຫາສາມແຍກເມືອງສາມັກຄີໄຊ ແຂວງອັດຕະປືຍາວ 42,9 ກິໂລແມັດ, ເສັ້ນທາງດັ່ງກ່າວ ມີຂົວ 30 ແຫ່ງ ແລະ ທໍ່ 163 ຈຸດ ໂດຍແມ່ນບໍລິສັດອີຕາລຽນໄທ ມະຫາຊົນຈຳກັດ ເປັນຜູ້ຮັບເໝົາການກໍ່ສ້າງໃນ ມູນຄ່າທັງໝົດຕາມສັນຍາ 76 ລ້ານກວ່າ ໂດລາສະຫະລັດ ຊຶ່ງແມ່ນການລົງທຶນຂອງ ບໍລິສັດຊີໂນລາວອາລູມີນຽມ ຄໍປໍເລເຊິນ ຈຳກັດ ໂດຍແມ່ນລັດຖະບານ ແຫ່ງ ສປປ ລາວ ໃນນາມເຈົ້າຂອງໂຄງການ ກໍຄືກະຊວງໂຍທາທິການ ແລະ ຂົນສົ່ງເປັນຜູ້ຄຸ້ມຄອງ ແລະ ຊີ້ນຳການກໍ່ສ້າງ, ຄາດວ່າການກໍ່ສ້າງຈະໃຫ້ສຳເລັດໃນທ້າຍປີ 2017.
ທ່ານ ບາສີ ພອນແກ້ວ ໄດ້ໃຫ້ຮູ້ຕື່ມວ່າ: ພາຍຫຼັງການກໍ່ສ້າງເສັ້ນທາງ 18A ນີ້ ສຳ ເລັດກໍຈະເຮັດໃຫ້ປະຊາຊົນ ສອງແຂວງອັດຕະປື-ຈຳປາສັກ ມີຄວາມສະດວກສະບາຍ ໃນການໄປມາຫາສູ່ຊື້-ຂາຍ ແລະ ແລກປ່ຽນສິນຄ້ານຳກັນ, ຈາກນັ້ນ ທາງເສັ້ນນີ້ຍັງເປັນຈຸດເຊື່ອມຕໍ່ລະຫວ່າງ ເສັ້ນທາງຫຼວງແຫ່ງຊາດເລກທີ 13 ໃຕ້ ແຂວງຈຳປາສັກ ຫາແຂວງອັດຕະປື ອອກໄປສູ່ ສສ ຫວຽດນາມ.
ແຫລ່ງຂ່າວ:
