ທາງບ້ານຈຽງເມືອງກາສີຫາ ເມືອງແມດ ເປັນເສັ້ນທາງບຸລິມະສິດອີກເສັ້ນໜຶ່ງທີ່ແຂວງວຽງຈັນ ແລະລັດຖະ ບານສຸມໃສ່ກໍ່ສ້າງເນື່ອງຈາກເປັນເສັ້ນທາງເຂົ້າຫາເມືອງທຸກຍາກສ້າງຂຶ້ນຮັບໃຊ້ການໄປ-ມາຫາສູ່, ການຂົນສົ່ງສິນ ຄ້າແລກປ່ຽນຊື້-ຂາຍ ແລະຮັບໃຊ້ວຽກງານປ້ອງກັນຊາດ-ປ້ອງກັນຄວາມສະຫງົບທັງເປັນການກໍ່ສ້າງພື້ນຖານໂຄງລ່າງທີ່ສຳຄັນໃນການແກ້ໄຂຄວາມທຸກຍາກຂອງປະຊາຊົນຫາກສຳເລັດຈະເປັນການແກ້ໄຂບັນຫາການສັນຈອນທີ່ ຫຍຸ້ງຍາກເປັນເວລາຫຼາຍສິບປີນັ້ນໃຫ້ອະວະສານລົງຢ່າງສິ້ນເຊີງ, ປະຈຸບັນການກໍ່ສ້າງສຳເລັດຫຼາຍກວ່າ 36%, ດ້ານຜູ້ຮັບເໝົາຊີ້ວ່າໝົດແລ້ງນີ້ຈະເຮັດວຽກດິນຕັດ, ລົງດິນອັດແໜ້ນໃຫ້ຮອດເມືອງແມດ.
ທ່ານ ສົມນາມ ດວງພະຈັນ ຫົວໜ້າໂຄງການກໍ່ສ້າງເສັ້ນທາງດັ່ງກ່າວໃຫ້ຮູ້ວ່າ: ທາງບ້ານຈຽງເມືອງກາສີເລີ່ມ ແຕ່ທາງຫຼວງແຫ່ງຊາດ 13 ເໜືອຈາກຈຸດບ້ານຈຽງ-ເຂົ້າຫາເມືອງແມດມີຄວາມຍາວ 60 ກິໂລແມັດ, ໜ້າທາງປູ ຢາງສອງຊັ້ນກວ້າງ 8 ແມັດ, ມີສອງຊ່ອງຈະລາຈອນຊ່ອງລະ 3,5 ແມັດ, ມີບ່າທາງສອງຂ້າງ-ຂ້າງລະ 0,5 ແມັດ, ສ້າງຕາມມາດຕະຖານຂອງກະຊວງໂຍທາທິການ ແລະຂົນສົ່ງເປັນທາງຫຼວງປະເພດ 4 ພູດອຍ, ຈຸດພິເສດຂອງທາງເສັ້ນນີ້ເປັນທາງພູດອຍທີ່ມີຄວາມຄ້ອຍຊັນຊຶ່ງມີບໍລິມາດດິນຕັດ ແລະດິນຖົມເປັນຈຳນວນຫຼວງຫຼາຍເນື່ອງຈາກສ້າງຕາມຮ່ອມພູ, ນອກຈາກມີບໍລິມາດດິນຕັດ ແລະດິນຖົມເປັນຈຳນວນຫຼວງຫຼາຍແລ້ວທາງເສັ້ນນີ້ຍັງຕ້ອງໄດ້ສ້າງຂົວເບຕົງອັດແຮງເຖິງ 4 ແຫ່ງ ກວ້າງ 9,60 ແມັດ, ຊ່ອງຈະລາຈອນ 8 ແມັດ ສ່ວນທີ່ເຫຼືອເປັນທາງຍ່າງ, ຂົວ 4 ແຫ່ງຍາວທັງ ໝົດ 195,44 ແມັດ, ມີທໍ່ດາໂລ່ 55 ຈຸດ, ທໍ່ລອດທາງ 230 ຈຸດ ຈິ່ງເຮັດໃຫ້ມີມູນຄ່າການກໍ່ສ້າງມີເຖິງ 774 ຕື້ໂດຍ ແມ່ນບໍລິສັດພັດທະນາສາມຫຼ່ຽມເສດຖະກິດຄົບວົງຈອນເປັນຜູ້ລົງທຶນກໍ່ສ້າງກ່ອນ100% ແລະລັດຖະບານຊຳລະຄືນພາຍໃນກຳນົດ 10 ປີນັບແຕ່ມື້ສຳເລັດ ເປັນຕົ້ນໄປ.
ການກໍ່ສ້າງມາຮອດທ້າຍເດືອນກຸມພານີ້ສຳເລັດແລ້ວ 36% ທຽບໃສ່ແຜນການແມ່ນຫຼ້າຊ້າພຽງເລັກໜ້ອຍຍ້ອນເປັນເພາະສະພາບອາກາດບໍ່ອຳນວຍມີຝົນຕົກໃນໄລຍະເດືອນຜ່ານມາເຮັດໃຫ້ດິນຊຸມບໍ່ສາມາດດຳເນີນວຽກໄດ້, ໃນຈຳນວນໜ້າວຽກທີ່ສຳເລັດມີ: ວຽກດິນຕັດຮອດກິໂລແມັດທີ 36,8 ກມ, ວຽກດິນຖົມຮອດກິໂລແມັດທີ 30 ກມ, ວຽກທໍ່ ລອດທາງຮອດກິໂລແມັດທີ 32, ວຽກ ທໍ່ດາໂລກຳລັງດຳເນີນການກໍ່ສ້າງຢູ່ 3 ຈຸດ, ໄດ້ລົງມືກໍ່ສ້າງຂົວ 2 ແຫ່ງຄືຂົວນ້ຳປັງສຳເລັດ 49% ແລະຂົວນ້ຳມ້ຽງສຳເລັດ 42%, ທ່ານກ່າວຕໍ່ອີກວ່າ, ສ່ວນແຜນເກົ່າວ່າຈະມີການປູຢາງ 20 ກິໂລແມັດແຕ່ທາງແບ່ງບ້ານຈຽງເຂົ້າໄປນັ້ນທາງບໍລິສັດໄດ້ໂຈະເອົາໄວ້ກ່ອນ ແລະ ປ່ຽນແຜນມາສຸມໃສ່ວຽກດິນຕັດ ແລະ ລົງດິນອັດແໜ້ນໃຫ້ຮອດເມືອງແມດເພື່ອສ້າງຄວາມສະດວກໃນການສັນຈອນ ໄປ-ມາຂອງປະຊາຊົນ.
ທ່ານກ່າວຕໍ່ອີກວ່າການກໍ່ສ້າງທາງປະຈຸບັນນີ້ໄດ້ເຮັດໃຫ້ການສັນຈອນສະດວກຂຶ້ນຫຼາຍຊຶ່ງປະຈຸບັນການເດີນ ທາງແຕ່ທາງແບ່ງບ້ານຈຽງເຂົ້າຫາເມືອງແມດນັ້ນໃຊ້ເວລາພຽງຊົ່ວໂມງກວ່າທຽບໃສ່ເມືອງກ່ອນການກໍ່ສ້າງຕ້ອງໃຊ້ເວລາເຖິງ 4-6 ຊົ່ວໂມງທັງນີ້ກໍຍ້ອນຄວາມເອົາໃຈໃສ່ຂອງຜູ້ຮັບເໝົາອອກເປັນ 12 ທີມຕະລຸມບອນເປັນຈຸດໆໄປ.
ທີ່ມາ: 