ສຳນັກງານສະຖິຕິຂອງເຢຍລະມັນລະບຸວ່າ ອາເມລິກາແຊງໜ້າຝຣັ່ງຂຶ້ນເປັນຄູ່ຄ້າອັນດັບໜຶ່ງຂອງເຢຍລະມັນໃນປີກ່ອນ ນັບເປັນເທື່ອທຳອິດນັບຕັ້ງແຕ່ປີ 1970.
ຕາມຂ່າວຕ່າງປະເທດລາຍງານວ່າ: ສຳນັກງານສະຖິຕິຖະແຫຼງວ່າ ປີທີ່ຜ່ານມາເຢຍລະມັນ ແລະອາເມລິກາມີມູນຄ່າການຄ້າທັງໝົດ 173,2 ຕື້ເອີໂຣ ຮອງລົງມາຄືການຄ້າກັບຝຣັ່ງ 170,1 ຕື້ເອີໂຣ ແລະ ໂຮນລັງ 167,6 ຕື້ເອີໂຣ ຖ້າຫາກເບິ່ງສະເພາະສິນຄ້າສົ່ງອອກຂອງເຢຍລະມັນ ອາເມລິກາກໍນຳໜ້າຝຣັ່ງຂຶ້ນເປັນຕະຫຼາດສົ່ງອອກອັນດັບໜຶ່ງຂອງເຢຍລະມັນໃນປີກ່ອນດ້ວຍມູນຄ່າ 113,9 ຕື້ເອີໂຣ.
ຝຣັ່ງເປັນຕະຫຼາດສົ່ງອອກອັນດັບ 1 ຂອງເຢຍລະມັນມາຕັ້ງແຕ່ປີ 1961 ແລະ ເປັນຄູ່ຄ້າອັນດັບໜຶ່ງມາໂດຍຕະຫຼອດ ແຕ່ຄ່າເງິນເອີໂຣທີ່ອ່ອນຄ່າລົງເມື່ອທຽບກັບໂດລາສະຫະລັດປະກອບກັບເສດຖະກິດອາເມລິກາຟື້ນຕົວ ເຮັດໃຫ້ການຄ້າເຢຍລະມັນກັບອາເມລິກາເຂັ້ມແຂງຂຶ້ນ ສ່ວນໃນດ້ານສິນຄ້ານຳເຂົ້າໃນປີທີ່ຜ່ານມາເຢຍລະມັນນຳເຂົ້າຈາກສປ ຈີນຫຼາຍທີ່ສຸດລວມ 91,5 ຕື້ເອີໂຣ, ຮອງລົງມາແມ່ນໂຮນລັງ ແລະ ຝຣັ່ງ.
ຂໍ້ມູນຈາກ http://www.sedthakid.la/