ອົງການ​ກວດ​ສອບ​ແຫ່ງ​ລັດ ​ສປປ ລາວ ໄດ້​ເປັນ​ເຈົ້າພາບ​ຈັດກອງ​ປະຊຸມ​ແລກປ່ຽນ​ຄວາມ​ຮູ້ ກ່ຽວ​ກັບ​ການ​ກວດ​ສອບ​ການ​ເກັບ​ລາຍ​ຮັບ​ຂອງ​ລັດ ໄດ້​ຈັດ​ຂຶ້ນ​ລະຫວ່າງ​ວັນ​ທີ 2-4 ມີນາ 2016 ທີ່ໂຮງແຮມ​ດອນ​ຈັນ​ພາ​ເລດ ນະຄອນ​ຫຼວງ​ວຽງ​ຈັນ ເປັນ​ປະທານຂອງ​ທ່ານ ​ດຣ. ປະດັບ​ເພັດ ໄຊຍະ​ໂຄດ ຮອງ​ປະທານ​ອົງການກວດ​ສອບ​ແຫ່ງ​ລັດ ມີ​ທ່ານ ພໍ​ໄຊ ຊິນ​ງີ (Paul Chai Sinngee) ຮອງ​ຫົວໜ້າ​ກົມ​ສະ​ຖາ​ບັນ​ກວດສອບ​ມາ​ເລ​ເຊຍ ແລະ ຊ່ຽວຊານຈາກ​ມາ​ເລ​ເຊຍ ພ້ອມ​ດ້ວຍ​ຜູ້​ຕາງໜ້າ​ຈາກ​ສະ​ຖາ​ບັນ​ກວດ​ສອບ​ສູງສຸດ​ ຂອງ​ປະເທດ​ອາ​ຊຽນ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ແລກປ່ຽນ​ຄວາມຮູ້​ທາງ​ດ້ານ​ວິຊາ​ການ​ຄັ້ງ​ນີ້ ​ເປັນກິດຈະກຳ​ໜຶ່ງ​ທີ່​ນອນ​ໃນ​ແຜນຂອງ​ຄະນະ​ກຳມະການ​ແລກປ່ຽນຄວາມ​ຮູ້​ ຂອງ​ສະ​ຖາ​ບັນ​ກວດສອບ​ສູງ​ສຸດ​ອາ​ຊຽນ ​ເພື່ອ​ຍົກ​ລະດັບ​ຄວາມ​ຮູ້​ຄວາມ​ສາມາດ ທັງເປັນ​ການ​ແລກປ່ຽນ​ບົດຮຽນ​ທັກສະ​ ໃນ​ການ​ກວດ​ສອບ​ການ​ເກັບລາຍ​ຮັບ​ຂອງ​ພາກ​ລັດ.