ລີເວີພູລ ລະບາຍຄວາມອັດອັ້ນຕັນໃຈເຕັມທີ່ຫຼັງເສຍດ່ວນຈຸດໂທດຕໍ່ ແມນຊີຕີ ໃນນັດຊິງແຄປິຕອລວັນຄັບເມື່ອອາທິດທີ່ຜ່ານມາ ກ່ອນຈະຖອນແຄ້ນເດີນໜ້າຖະຫລົ່ມໄປແບບມຸ່ນອຸ້ຍປຸ້ຍ 3-0 ຫຍັບຂຶ້ນເປັນທີ 8 ຂອງຕາລາງພຣີເມຍລີກ…
ການແຂ່ງຂັນບານເຕະພຣີເມຍລີກ ອັງກິດ ລະດູການ 2015/16 ປະຈໍາວັນທີ 2 ມີນາ ເປັນການແຂ່ງຂັນໃນຄູ່ລະຫວ່າງ ລີເວີພູລ ທີມອັນດັບ 11 ຂອງຕາຕະລາງ ເປີດສະໜາມແອນຟິລຕ້ອນຮັບການມາຢາມຂອງ ແມນຊີຕີ ທີມອັນດັບ 4 ຂອງຕາຕະລາງ.
ເກມນີ້ ເຈົ້າຖິ່ນໝາຍໝັ້ນຖອນແຄ້ນທີມຢາມເຕັມທີ່ຫຼັງເຮັດໃຫ້ພວກເຂົາຕ້ອງພົບກັບຄວາມຜິດຫວັງໃນຮອບຊີງຊະນະເລີດແຄປິຕອລວັນຄັບເມື່ອວັນອາທິດທີ່ຜ່ານມາ ໂດຍ ເຢີເກນຄລອບ ຜູ້ຈັດການຂອງທີມປັບຕົວຫຼິ້ນຈາກເກມຫຼ້າສຸດປ່ຽນມາໃຊ້ ດິວອກ ໂອຣິກີ ເປັນກອງໜ້າຕົວເປົ້າແທນທີ່ຂອງ ດາເນຍ ສເຕີີຣິດ ແລະອະດັມ ລັນລານາ ລົງມາແທນ ຟິລິບເປ ຄູຕິນໂຢ ທີ່ມີສະພາບຄວາມພ້ອມບໍ່ເຕັມຮ້ອຍ ສ່ວນທີມຢາມຂາດ ຢາຢາ ຕູເຣ ກອງກາງຄົນສໍາຄັນທີ່ໄດ້ຮັບບາດເຈັບເຮັດໃຫ້ ແຟຣນັນດິນໂຍ ຕ້ອງຈັບຄູ່ກັບ ເຟີນັນໂດ ກາງສະໜາມແຕ່ຍັງມີ ເຊຄິໂອ ອະເກວໂຣ ດາວຍິງຕົວເກັ່ງເປັນກອງໜ້າຕົວເປົ້າຕາມເຄີຍ.
ເປີດເກມຂຶ້ນມາທັງສອງທີມຍັງຫຼິ້ນກັນແບບຕືງຄຽດກາງສະໜາມໂດຍໂອກາດເຮັດປະຕູຍັງບໍ່ເກີດຂຶ້ນຫຼາຍເທື່ອ ຈົນເກມຜ່ານໄປຮອດນາທີທີ່ 22 ໂອກາດຄັ້ງທໍາອິດຂອງເກມເປັນເຈົ້າຖິ່ນ ໂຣແບໂຕ ເຟີມິໂນ ຍິງດ້ວຍຂວາແຕ່ຍັງເຂົ້າຊອງ ໂຈຮາດ ຮັບບໍ່ຜິດພາດ.
ເຈົ້າຖິ່ນເຮັດໄດ້ດີກວ່າໜ້ອຍໜຶ່ງ ຈົນເກມດໍາເນີນມາຮອດນາທີທີ່ 34 ເຈົ້າຖິ່ນກໍ່ມາໄດ້ປະຕູອອກນໍາໄປກ່ອນ 1-0 ຈາກຈັງຫວະທີ່ ມິລເນີ ໄຫຼບານໃຫ້ກັບ ອະດັມ ລັນລານາ ລ້ຽງຈີ້ມາກ່ອນຍິງຫຼຽດດ້ວຍຂວາສົ່ງບານສຽບເສົາເຂົ້າໄປເລີຍ.
ນາທີທີ່ 41 ເຈົ້າຖິ່ນໄດ້ປະຕູຫ່າງ 2-0 ຈາກຈັງຫວະຕໍ່ບານກັນໄດ້ຢ່າງສຸດຍອດເລີ່ມຕົ້ນທີ່ ລັນລານາ ໄຫຼໃຫ້ ເຟີມິໂນ ກ່ອນຈະແທງບານໃຫ້ກັບ ມິລເນີ ຫຼຸດດຽວກ່ອນຍິງສວນຕົວ ໂຈ ຮາດ ເຂົ້າໄປບໍ່ເຫຼືອ ແລະເປັນການຍິງປະຕູທີມເກົ່າຂອງນັກເຕະລາຍນີ້ນຳ.
ຈົບເຄື່ອງທໍາອິດບໍ່ມີຍິງເພີ່ມ ລິເວີພູລ ອອກນໍາ ແມນຊີຕີ ຢູ່ 2-0
ເຂົ້າສູ່ເຄິ່ງຫຼັງມາຮອດນາທີທີ່ 57 ລີເວີພູລ ໜີຫ່າງ 3-0 ຈາກຈັງຫວະເຮັດບານລັ່ນກາງສະໜາມຂອງ ໂອຕາເມນດີ ກ່ອນຈະຖືກ ມິລເນີ ຍາດໄດ້ກ່ອນຈ່າຍໃຫ້ ລັນລານາ ແທງບານໃຫ້ກັບ ເຟີມິໂນ ຫຼຸດດຽວບໍາລໍ້າໜ້າກ່ອນຊັດເຂົ້າໄປເຕັມໆ.
ອີກ 3 ນາທີຕໍ່ມາ ເຈົ້າຖິ່ນເກືອບໄດ້ລູກທີ່ 4 ເຈມສ ມິລເນີ ອີກແລ້ວບາດນີ້ຊັດໄກ ແຕ່ໂຈຮາດ ຍັງຮັບໄວ້ໄດ້.
ຫຼັງຈາກນັ້ນຕ້ອງບອກວ່າເຈົ້າຖິ່ນເໜືອກວ່າທຸກຢ່າງກ່ອນຈະຄົບ 90 ນາທີ ບໍ່ມີການຍິງເພີ່ມ ຈົບເກມການແຂ່ງຂັນເປັນ ລີເວີພູລ ເປີດບ້ານຖອນແຄ້ນ ແມນຊີຕີ ຂາດລອຍ 3-0 ເກັບ 3 ແຕ້ມເຕັມໄຕ່ຂຶ້ນທີ່ 8 ຂອງຕາລາງແລ້ວ.
ສ່ວນຜົນການແຂ່ງຂັນຄູ່ອື່ນມີດັ່ງນີ້.
ອາເຊນອລ ເສຍ ສວອນຊີ ຊີຕີ້ 1-2
ເວສຕແຮມ ຢູໄນເຕັດ ຊະນະ ທອຕແມນ ຮອດສະປອດ 1-0
ແມນເຊັດເຕີຢູໄນເຕັດ ຊະນະ ວັຕຟອດ 1-0
ສະໂຕ໊ກ ຊີຕີ ຊະນະ ນິວຄາສເຊິລ ຢູໄນເຕັດ 1-0