ກະຊວງພະລັງງານ ແລະ ບໍ່ແຮ່ ຮ່ວມກັບອົງການສາກົນ ດ້ານເຂື່ອນໄຟຟ້ານ້ຳຕົກ (the International Journal on Hydropower Dams) ຈັດກອງປະຊຸມສາກົນ ຄັ້ງທີ VI ກ່ຽວກັບຊັບພະຍາກອນນ້ຳ ແລະ ການພັດທະນາໄຟຟ້າພະລັງງານນ້ຳໃນອາຊີ ໄດ້ໄຂຂຶ້ນຢ່າງເປັນທາງການ ໃນວັນທີ 1 ມີນານີ້ ທີ່ຫໍປະຊຸມແຫ່ງຊາດນະຄອນຫຼວງວຽງຈັນ ໂດຍເປັນປະທານຂອງທ່ານ ດຣ. ຄຳມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະ ບໍ່ແຮ່ ພ້ອມບັນດາຄະນະຜູ້ແທນ ນັກຄົ້ນຄວ້າ ຜູ້ຊ່ຽວຊານພະນັກງານ-ລັດຖະກອນ ນັກທຸລະກິດພາຍໃນ ແລະ ຕ່າງປະເທດຫຼາຍກວ່າ 700 ທ່ານ ຈາກ 45 ປະເທດ ກອງປະຊຸມຄັ້ງນີ້ ສປປ ລາວ ໄດ້ຮັບກຽດເປັນເຈົ້າພາບຈັດເປັນຄັ້ງທຳອິດ ແລະ ຈະດຳເນີນໄປເປັນເວລາ 3 ວັນ ພາຍໃນງານຈະມີການວາງສະແດງຮູບພາບ ຜະລິດຕະພັນຕ່າງໆ ເພື່ອຮັບໃຊ້ໃຫ້ແກ່ການພັດທະນາການກໍ່ສ້າງ ແລະ ດຳເນີນງານເຂື່ອນໄຟຟ້ານ້ຳຕົກ 90 ກວ່າພາກສ່ວນ.
ຈຸດປະສົງກອງປະຊຸມດັ່ງກ່າວ ເພື່ອເຜີຍແຜ່ຜົນການຄົ້ນຄວ້າ-ວິໄຈ ການພັດທະນາການເຄື່ອນໄຫວທຸລະກິດກ່ຽວກັບໄຟຟ້ານ້ຳຕົກ ເນັ້ນໃສ່ໃນເຂດອາຊີ ພ້ອມນີ້ ກໍ່ຈະມີກອງປະຊຸມປິ່ນອ້ອມຫຼາຍກວ່າ 20 ກອງປະຊຸມ ແລະ ມີການນຳສະເໜີຫົວບົດຈາກຊ່ຽວຊານພາຍໃນ ແລະ ຕ່າງປະເທດກວ່າ 100 ຫົວບົດ ກ່ຽວກັບຜົນການຄົ້ນຄວ້າ ການພັດທະນາການເຄື່ອນໄຫວທຸລະກິດ ແລະ ຄຸ້ມຄອງບໍລິຫານຂອງພາກລັດ ແລະ ເອກະຊົນຂອງຂະແໜງພະລັງງານໄຟຟ້າ ນອກນັ້ນ ຄະນະຜູ້ແທນຈະຢ້ຽມຢາມໂຄງການກໍ່ສ້າງເຂື່ອນໄຟຟ້າໄຊຍະບູລີ ທີ່ແຂວງໄຊຍະບູລີ ໂຄງການກໍ່ສ້າງເຂື່ອນໄຟຟ້ານ້ຳງຽບ 1 ທີ່ແຂວງບໍລິຄຳໄຊ ແລະ ໂຄງການເຂື່ອນໄຟຟ້ານ້ຳງື່ມ ຄະນະຜູ້ແທນຈະໄດ້ປຶກສາຫາລືແລກປ່ຽນຄວາມຄິດຄວາມເຫັນ ແລະ ບົດຮຽນຮ່ວມກັນ ກ່ຽວກັບການພັດທະນາດ້ານວິທະຍາສາດ ການຄົ້ນຄວ້າ ການພັດທະນາພະລັງງານໄຟຟ້າ ຊັບພະຍາກອນນ້ຳ ວຽກງານປິ່ນອ້ອມອື່ນໆ ເພື່ອຖອດຖອນບົດຮຽນທີ່ເປັນປະໂຫຍດ ເຊິ່ງຈະເປັນການປະກອບສ່ວນສຳຄັນ ເຂົ້າໃນການພັດທະນາເສດຖະກິດ-ສັງຄົມ ພາຍໃນ ແລະ ຕ່າງປະເທດ ຢ່າງກວ້າງຂວາງ.
ແຫລ່ງຂ່າວ:
