ໂຄງການທົດລອງເພື່ອຟື້ນຟູເຂດຕົວເມືອງປະຫວັດສາດ (ວຽງຈັນທົດລອງ 2016) ໄດ້ຈັດຂຶ້ນວັນທີ 26 ກຸມພາ 2016 ຢູ່ວັດອົງຕື້ ມີທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ທ່ານ ດຣ. ສັນຕິສຸກ ສິມມາລາວົງ ຫົວໜ້າຫ້ອງການກະຊວງໂຍທາທິການ ແລະ ຂົນສົ່ງ ທ່ານ ຣຽວຕາໂຣະ ຊູຊຸກິ ຫົວໜ້າກົງສູນຍີ່ປຸ່ນ ປະຈຳລາວ ທ່ານ ຢູຊຸເກະ ມູຣາຄາມິ ຫົວໜ້າອົງການໄຈກາ ປະຈຳລາວ ພ້ອມດ້ວຍບັນດາຜູ້ໃຫ້ການອຸປະຖຳ ແລະ ແຂກຖືກເຊີນເຂົ້າຮ່ວມ.
ທ່ານ ແກ້ວພິລາວັນ ອາໄພລາດ ໄດ້ກ່າວວ່າ: ວຽງຈັນທົດລອງ 2016 ຈັດຂຶ້ນປີນີ້ເປັນປີທີ 2 ພາຍຫຼັງໄດ້ຮັບຜົນສຳເລັດ ແລະ ສຽງຕອບຮັບທີ່ດີຈາກຫຼາຍຝ່າຍ ໃນການຈັດງານ ຄັ້ງທີ 1 ໃນປີ 2015 ການຈັດງານຄັ້ງນີ້ ຈະຊ່ວຍສົ່ງເສີມ ແລະ ສ້າງຈິດສຳນຶກຂອງປະຊາຊົນ ນະຄອນຫຼວງວຽງຈັນ ກໍ່ຄືບັນດາເຈົ້າຂອງຮ້ານ ຜູ້ປະກອບການ ນັກທຸລະກິດ ແລະ ປະຊາຊົນທີ່ອາໄສຢູ່ເຂດອະນຸຮັກປະຫວັດສາດ ໄດ້ຮັບຮູ້ ເຊື່ອມຊຶມ ແລະ ເຂົ້າໃຈການປົກປັກຮັກສາເຂດດັ່ງກ່າວ ໃຫ້ມີຄວາມເປັນເອກະລັກ ແລະ ວັດທະນະທຳອັນເກົ່າແກ່ ໄປພ້ອມໆກັບການປັບປຸງ ສົ່ງເສີມ ແລະ ສ້າງຄວາມດຶງດູດດ້ານການທ່ອງທ່ຽວ.
ທ່ານ ຮສ.ດຣ. ສຸກັນ ຈິດປັນຍາ ຫົວໜ້າພາກວິຊາສະພາບແວດລ້ອມຜັງເມືອງ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ຄະນະຊີ້ນຳການຈັດງານວຽງຈັນທົດລອງ 2016 ກໍ່ໄດ້ກ່າວວ່າ: ການຈັດງານວຽງຈັນທົດລອງ 2016 ເຫັນວ່າມີບັນຍາກາດຄຶກຄື້ນ ແລະ ໄດ້ຮັບການຕອບຮັບເປັນຢ່າງດີກວ່າຄັ້ງຜ່ານມາ ແລະ ງານຄັ້ງນີ້ ຈັດຂຶ້ນໃນວັນທີ 26 27 ແລະ 28 ກຸມພາ 2016 ເຫັນວ່ານັກທ່ອງທ່ຽວທັງພາຍໃນ ແລະ ຕ່າງປະເທດໄດ້ເຂົ້າມາທ່ຽວຊົມເພີ່ມຂຶ້ນເປັນຈຳນວນຫຼວງຫຼາຍ ນອກຈາກກິດຈະກຳຫຼັກ ເປັນຕົ້ນ ການສະແດງສິລະປະພື້ນເມືອງສາທິດ ການເຮັດເຄື່ອງຫັດຖະກຳແສງສະຫວ່າງໃນຍາມກາງຄືນ ວາງສະແດງສິນຄ້າ ຮູບຖ່າຍ-ຮູບແຕ້ມ ນຳທ່ຽວຊົມຕົວເມືອງປະຫວັດສາດ ແລະ ກິດຈະກຳອື່ນໆທີ່ໜ້າສົນໃຈອື່ນໆແລ້ວ ປີນີ້ ຍັງມີກອງລະຄອນລຳ ກອງລະຄອນຕຸກກະຕາສູນກາງມາຮ່ວມສະແດງ ມີການວາງສະແດງແຜນທີ່ຮູບປະຫວັດສາດຂອງຕົວເມືອງ ສອນແຕ້ມຮູບ ແລະ ກິດຈະກຳອື່ນໆ ນອກນີ້ ປະຊາຊົນທ້ອງຖິ່ນ ບັນດາຮ້ານຕ່າງໆກໍ່ໄດ້ໃຫ້ການຮ່ວມມື ແລະ ອຳນວຍຄວາມສະດວກເປັນຢ່າງດີ ພ້ອມທັງສະເໜີໃຫ້ພວກເຮົາຈັດງານລັກສະນະແບບນີ້ໃຫ້ຖີ່ຂຶ້ນ ກວ່າເກົ່າ.
ແຫລ່ງຂ່າວ:
