ເພື່ອເປັນການຮອງຮັບໃຫ້ແກ່ບັນດາເຂື່ອນໄຟຟ້າທີ່ກຳລັງສ້າງຂຶ້ນຢູ່ພາຍໃນແຂວງຫຼວງພະບາງກໍຄືສະຖານີໄຟຟ້າທາງລັດວິສາຫະກິດໄຟຟ້າລາວໂດຍສະເພາະແມ່ນສາຂາແຂວງຫຼວງ ພະບາງຈະສ້າງສະຖານີໄຟຟ້າ 500 ກິໂລໂວນ (KV) ຢູ່ເມືອງນານເພີ່ມອີກໜຶ່ງແຫ່ງຊຶ່ງຄາດຈະສ້າງໃນປີ 2017-2018 ສຳລັບແຫ່ງນີ້ຈະເປັນສະຖານີຈຳໜ່າຍກະແສໄຟຟ້າຂາຍອອກໃຫ້ປະເທດເພື່ອນບ້ານໂດຍສະເພາະ.
ທ່ານ ຟອງປະສິດ ເພັດສີສຸກ ຫົວໜ້າບໍລິສັດລັດວິສາຫະກິດໄຟຟ້າລາວສາຂາແຂວງຫຼວງພະບາງໄດ້ໃຫ້ສຳພາດຕໍ່ທີມຂ່າວພວກເຮົາຫວ່າງບໍ່ດົນມານີ້ວ່າ: ເພື່ອເປັນການຮອງຮັບກະແສໄຟຟ້າຈາກເຂື່ອນທີ່ກຳລັງກໍ່ສ້າງໃກ້ຈະສຳເລັດໃນມໍ່ໆນີ້ລັດວິສາຫະກິດໄຟຟ້າລາວ ຫຼື ຟຟລ ກໍຄືສາຂາແຂວງຫຼວງພະບາງຈະໄດ້ຈົກງົບກ້ອນໃຫຍ່ສ້າງສະຖານີໄຟຟ້າ 500 KV ຢູ່ເມືອງນານ ແຂວງ ຫຼວງພະບາງ ຊຶ່ງຄາດຈະສ້າງໃນປີ 2017-2018 ສຳລັບສະຖານີແຫ່ງນີ້ຈະເປັນສະຖານີເກັບໄຟ ແລະຈຳໜ່າຍກະແສໄຟຟ້າຂາຍອອກໃຫ້ ປະເທດເພື່ອນບ້ານໂດຍສະເພາະ.
ປະຈຸບັນແມ່ນກຳລັງຢູ່ໃນຂັ້ນຕອນສຳຫຼວດ ອອກແບບພື້ນທີ່ຈຸດເຂດການກໍ່ສ້າງຂອງສະຖານີທັງນີ້ກໍເພື່ອເຮັດສະຖານີໄຟຟ້າທີ່ຈະສ້າງຂຶ້ນໃໝ່ນີ້ໄດ້ຮັບມາດຕະຖານ ແລະໄດ້ຮັບຜົນກະທົບໜ້ອຍທີ່ສຸດຕໍ່ສິ່ງແວດລ້ອມອ້ອມຂ້າງ ໂດຍທ່ານຫົວໜ້າສາຂາຍັງໄດ້ຍືນຍັນຕື່ມວ່າ ເມື່ອສ້າງສະຖານີໄຟ ຟ້າແຮງສູງມີກຳລັງຕິດຕັ້ງ 115/22 KV ເປັນລະບົບຈ່າຍອອກຢູ່ເມືອງຈອມເພັດ ເພື່ອຮອງຮັບການຈ່າຍໄຟຟ້າໃຫ້ເມືອງທີ່ກຳລັງຈະສ້າງໃໝ່ແລະຂະຫຍາຍສູ່ເມືອງຈອມເພັດ ໃຫ້ໄດ້ມີໄຟຟ້າຊົມໃຊ້ທົ່ວເຖິງກັນ, ແນໃສ່ເຮັດໃຫ້ການຊົມໃຊ້ ໄຟຟ້າເຂົ້າໃນການດຳເນີນທຸລະກິດຕ່າງໆຂອງປະຊາຊົນລວມເຖິງຊີວິດການເປັນຢູ່ສະດວກສະ ບາຍຂຶ້ນຫາກສະຖານີໄຟຟ້າແຮງສູງສຳເລັດ ແລ້ວກໍຈະສືບຕໍ່ລົງມືກໍ່ສ້າງສະຖານີ 500 KV ຢູ່ ເມືອງນານ ກໍຄືອີກສອງປີຂ້າງໜ້ານີ້.
ແຂວງຫຼວງພະບາງເປັນແຂວງໜຶ່ຶ່ງທີ່ມີແມ່ນ້ຳຫຼາຍສາຍເປັນຕົ້ນແມ່ນ: ສາຍນ້ຳຄານ, ນ້ຳອູ, ນ້ຳບາກ,ນ້ຳດົງ, ນ້ຳແຊງ ແລະຍັງມີອີກຫຼາຍສາຍໄດ້ໃຫ້ຄວາມສະດວກແກ່ການສ້າງເຂື່ອນໄຟຟ້າຕາມສາຍນ້ຳຕ່າງໆຈິ່ງເປັນທີ່ໝາຍຕາຂອງນັກລົງທຶນດ້ານພະລັງງານໄຟຟ້າເຂົ້າມາລົງທຶນສ້າງເຂື່ອນເພີ່ມຂຶ້ນໃນແຕ່ລະປີຈົນເຮັດໃຫ້ແຂວງ ຫຼວງພະບາງມີໄຟຟ້າເຫຼືອໃຊ້ ແລະກຽມສ້າງສະຖານີໄຟຟ້າຮອງຮັບການສົ່ງອອກຂາຍໃຫ້ກັບປະເທດເພື່ອນບ້ານ ກາຍເປັນແຂວງໜຶ່ງທີ່ມໝໍ້ໄຟໃຫຍ່ຫຼາຍໜ່ວຍທີ່ສາມາດຊ່ວຍໃຫ້ແສງສະຫວ່າງແກ່ສັງຄົມໄດ້ຢ່າງທົ່ວເຖິງກັນ.
ທີ່ມາ: