ທ່ານ ວິຊຽນ ນະວິກຸນ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານເສດຖະກິດ ກ່າວເປີດກອງປະຊຸມສຳມະນາປັບປຸງຫົວໜ່ວຍທຸລະກິດທົ່ວແຂວງໃນອາທິດຜ່ານມານີ້ວ່າ: ການປັບປຸງຫົວໜ່ວຍທຸລະກິດຄວນເລັ່ງເຫັນປະຊາຊົນເປັນຫຼັກ ໂດຍສະເພາະຂະແໜງການທີ່ກ່ຽວຂ້ອງ ຫຼື ຜູ້ປະກອບການ-ຫົວໜ່ວຍທຸລະກິດຕ່າງໆທີ່ສ້າງທຸລະກິດເຊື່ອມໂຍງກັບພໍ່ແມ່ປະຊາຊົນໂດຍກົງເນັ້ນໃຫ້ປະຊາຊົນມີສ່ວນຮ່ວມ, ມີລາຍຮັບສາມາດສ້າງເສດຖະກິດກຸ້ມຢູ່ກຸ້ມກິນ ແລະ ຜະລິດຈົນກາຍເປັນສິນຄ້າເພື່ອສົ່ງອອກເປັນເປົ້າໝາຍການແຈກຢາຍ, ການຈໍລະຈອນສີນຄ້າໃຫ້ທົ່ວເຖິງ ແລະກວ້າງຂວາງເຖິງປະຊາຊົນທ້ອງຖິ່ນແຕ່ລະເຂດອີກດ້ວຍ ເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ, ທັງນີ້ ປະຊາຊົນກໍສາມາດຄ້າຂາຍ, ແລກປ່ຽນສິນຄ້າໄດ້ຢ່າງພຽງພໍສ້າງລາຍຮັບເສດຖະກິດ ໃຫ້ຫຼາຍພາກສ່ວນເຊັ່ນກັນ, ເຊື່ອມໂຍງໄປເຖິງການຍາດແຍ່ງແຫຼ່ງທຶນຕ່າງໆຈາກຜູ້ລົງທຶນທັງພາຍໃນ ແລະຕ່າງປະເທດເພີ່ມຂຶ້ນ ຊຶ່ງອາດເຮັດໃຫ້ເສດຖະກິດໄດ້ມີການຂະຫຍາຍຕົວຢ່າງບໍ່ຢຸດຢັ້ງ.
ພ້ອມນັ້ນ ກໍໄດ້ເນັ້ນໃຫ້ພາກສ່ວນທີ່ກ່ຽວຂ້ອງເລັງໃສ່ໃນການສ້າງສີມືແຮງງານ ແລະພັດທະນາໃນຫຼາຍດ້ານເຊັ່ນ: ການບໍລິການ, ເຕັກນິກຕ່າງໆ ແລະບົດຮຽນທີ່ສາມາດຖອດຖອນນຳແນວຄິດປະດິດສ້າງຂອງປະຊາຊົນອອກມາເປັນຮູບປະທຳຫຼາຍຂຶ້ນບວກກັບບົດຮຽນອັນໃໝ່ ແລະຄຳແນະນຳຈາກວິຊາການຂອງຂະແໜງການຕ່າງໆທີ່ກ່ຽວຂ້ອງລົງເລີກ ແລະໃກ້ຊິດຕິດແທດເຮັດໃຫ້ສາມາດແຂ່ງຂັນຕະຫຼາດທັງພາຍໃນ ແລະຕ່າງປະເທດອີກດ້ວຍ ຊຶ່ງສິ່ງໃດທີ່ສາມາດບັນລຸເປົ້າໝາຍແລ້ວຄວນປຸງຕື່ມເປັນຕົ້ນ: ເສີມສ້າງ, ສົ່ງເສີມດ້ານການລົງທຶນ, ການບໍລິການ ແລະການຜະລິດຂອງຊາວກະສິກອນ, ປັບປຸງສິ່ງໃດບໍ່ທັນສອດຄ່ອງຕາມກົນໄກ, ຍຸດທະສາດຕ່າງໆຄວນປັບຕື່ມ, ເພີ່ມຕື່ມນຳເອົາບົດຮຽນຫຼາຍດ້ານມາຖອດຖອນ.
ຈຸດແຕກຕ່າງປະຈຸບັນແມ່ນ: ການເຂົ້າເປັນສະມາຊິກປະຊາຄົມເສດຖະກິດອາຊຽນ (AEC) ໃນທ້າຍປີ 2015 ນີ້ ແມ່ນເຮັດໃຫ້ມີການແລກປ່ຽນສິນຄ້າ, ການບໍລິການ, ການລົງທຶນ, ສີມືແຮງງານຢ່າງເສລີ, ມີການຫຼຸດຜ່ອນກຳແພງພາສີສິນຄ້າລະຫວ່າງກັນ ແລະກັນ, ກາຍເປັນຕະຫຼາດໜຶ່ງດຽວ, ມີການຄ້າຂາຍຮ່ວມກັນເປັນຕະຫຼາດສິນຄ້າເສລີທີ່ໃຫຍ່ທີ່ສຸດການຈໍລະຈອນສີນຄ້າຂອງປະຊາຊົນກໍມີເພີ່ມຂຶ້ນ ແລະມີການແຈກຢາຍໄປຢ່າງທົ່ວເຖິງໃນຂອບເຂດທົ່ວແຂວງສາລະວັນ ກໍຄືປະເທດຊາດ.
ທັງນີ້, ທ່ານຮອງເຈົ້າແຂວງ ກໍໄດ້ເນັ້ນທຸກພາກສ່ວນທັງພາກລັດ ແລະເອ ກະຊົນຕະຫຼອດຮອດຜູ້ປະກອບການ, ຫົວໜ່ວຍທຸລະກິດທົ່ວແຂວງຕ້ອງມີການຍົກລະດັບຄວາມຮູ້ຄວາມສາມາດພັດທະນາສີມືແຮງງານປັບປຸງແຫຼ່ງທ່ອງທ່ຽວ ແລະການບໍລິການໃຫ້ໄດ້ມາດຕະຖານ, ປັບປຸງໂຄງລ່າງພື້ນຖານດ້ານເສດຖະກິດ ເພື່ອສ້າງຄວາມເຊື່ອໜັ້ນໃຫ້ແກ່ນັກລົງທຶນພາຍໃນ ແລະຕ່າງປະເທດເຂົ້າມາ ພັດທະນາແຂວງສາລະວັນໃນຫຼາຍດ້ານ ໂດຍໃຫ້ປະຊາຊົນມີສ່ວນຮ່ວມນຳ, ເຮັດໃຫ້ເສດຖະກິດຄອບຄົວມີຄວາມເຂັ້ມແຂງແລະສ້າງຄວາມກະຕືລືລົ້ນການຂົນຂວາຍດ້ານຄວາມຮູ້ຄວາມສາມາດເຂົ້າໃນການຜະລິດ, ການບໍລິການຕະຫຼອດຮອດການລົງທຶນໄດ້ຢ່າງກົມກຽວ ແລະຕ້ອງ ເຮັດໃຫ້ປະຊາຊົນມີສ່ວນຮ່ວມຫຼາຍຂຶ້ນ ເພື່ອເຮັດໃຫ້ປະຊາຊົນພາຍໃນແຂວງຫຼຸດພົ້ນອອກຈາກຄວາມທຸກຍາກຢ່າງສິ້ນ ເຊີງ ແລະປະຊາຊົນມີລາຍຮັບ ກໍເປັນລາຍຮັບຂອງຫົວໜ່ວຍທຸລະກິດເຊັ່ນກັນ.
ທີ່ມາ: