ເຈົ້າໜ້າທີ່ກົມຕຳຫຼວດຈະລາຈອນກະຊວງປ້ອງກັນຄວາມສະຫງົບໃຫ້ຮູ້ວ່າ: ໃນເດືອນກຸມພາ 2016 ທົ່ວປະເທດ ມີອຸບັດເຫດເກີດຂຶ້ນ 486 ຄັ້ງ, ສົ່ງຜົນເຮັດໃຫ້ມີຜູ້ເສຍຊີວິດ 103 ຄົນ, ທຽບໃສ່ເດືອນມັງກອນຂອງປີດຽວກັນມີອຸບັດເຫດເພີ່ມຂຶ້ນເກືອບ 50 ຄັ້ງ ໃນນີ້ ນະຄອນຫຼວງວຽງຈັນ ເກີດຂຶ້ນ ຫຼາຍທີ່ສຸດຈຳນວນ 137 ຄັ້ງ, ມີຜູ້ເສຍຊີວິດ 27 ຄົນ, ຮອງລົງມາແມ່ນແຂວງສະຫວັນນະເຂດ 64 ຄັ້ງ, ເສຍຊີວິດ 9 ຄົນ, ແຂວງ ຈຳປາສັກ 62 ຄັ້ງ, ເສຍຊີວິດ 10 ຄົນ ແລະແຂວງອຸດົມໄຊ 48 ຄັ້ງ ມີຜູ້ເສຍຊີວິດ 5 ຄົນ ສະເລ່ຍມູນຄ່າເສຍຫາຍກວ່າ 10 ຕື້ກວ່າກີບ.
ເຈົ້າໜ້າທີ່ກົມຕຳຫຼວດຈະລາຈອນຍັງໃຫ້ຮູ້ວ່າ: ອຸບັດເຫດໃນເດືອນດັ່ງກ່າວ ແມ່ນມີຕົວເລກທີ່ສູງ, ສາເຫດສ່ວນໃຫຍ່ເກີດຈາກການບໍ່ປະຕິບັດກົດລະບຽບຈະລາຈອນ, ຂັບຂີ່ລົດໄວ, ດື່ມສິ່ງມຶນເມົາ, ແຊງບໍ່ຮັບປະກັນ ແລະອື່ນໆ ຊຶ່ງກໍໃຫ້ເກີດອຸບັດເຫດ, ດັ່ງວັນທີ 21 ກຸມພານີ້, ໄດ້ເກີດອຸບັດເຫດຢ່າງຮ້າຍແຮງມີລົດໂດຍສານໝາຍເລກທະບຽນ ບກ 6551 ກຳແພງນະຄອນ ແລ່ນມາແຕ່ຫຼວງພະບາງ ເພື່ອມຸ່ງໜ້າມານະຄອນຫຼວງວຽຈັນ ແຕ່ພໍມາຮອດເຂດບ້ານທົ່ງເມືອດ ເມືອງກາສີ ໃນເສັ້ນທາງຕັດໃໝ່ເມືອງນານ-ກາສີ, ຊຶ່ງເປັນທາງຄົດໂຄ້ງບວກໃສ່ກັບສະພາບເຕັກນິກຂອງລົດບໍ່ພ້ອມ ຈິ່ງເຮັດ ໃຫ້ເສຍຫຼັກພຸ້ງໄປຕຳເອົາລົດຕູ້ໝາຍ ເລກທະບຽນ 5536 ຫຼວງພະບາງ ທີ່ແລ່ນສວນທາງມາຢ່າງແຮງເຮັດໃຫ້ຄົນຂັບ ແລະຜູ້ໂດຍສານໃນລົດຕູ້ເສຍຊີວິດ 5 ຄົນ, ນອກຈາກນີ້ ຍັງມີຜູ້ໂດຍສານໃນລົດເມໄດ້ຮັບບາດເຈັບສາຫັດ 9 ຄົນ, ສົມຄວນ 6 ຄົນ ແລະ ບາດເຈັບເລັກນ້ອຍ 9 ຄົນ.
ທີ່ມາ: