ຜົນກະທົບມາຈາກສະພາບອາກາດໜາວເຢັນ 0-1 ອົງສາ ໃນພາກເໜືອ ແລະ ປະມານ 10-12 ອົງສາ ໃນພາກກາງ ແລະ ພາກໃຕ້ ໃນທ້າຍເດືອນມັງກອນປີນີ້ ອັນໄດ້ສົ່ງຜົນກະທົບຕໍ່ສັດລ້ຽງ ແລະ ພືດຜັກຢູ່ໃນຫຼາຍທ້ອງຖິ່ນ ໂດຍສະເພາະ ຢູ່ເມືອງຈຳພອນ ແຂວງສະຫວັນນະເຂດ ການຜະລິດເຂົ້ານາແຊງ ໄດ້ຮັບຜົນກະທົບຮ່ຽວຕາຍໃນຫຼາຍພື້ນທີ່ເກືອບ 50% ຂອງເນື້ອທີ່ນາທັງໝົດຂອງປີ 2016 ຫຼື ປະມານ 6.000 ເຮັກຕາ ຂອງເນື້ອທີ່ 12.000 ເຮັກຕາທົ່ວເມືອງ.
ທ່ານ ເພັດສະໝອນ ມາໄລທອງ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຈຳພອນ ແຂວງສະຫວັນນະເຂດ ເປີດເຜີຍຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 24 ກຸມພານີ້ວ່າ: ສະພາບອາກາດໜາວເຢັນດັ່ງກ່າວ ໄດ້ແກ່ຍາວກວ່າສອງອາທິດ ທັງໜາວເຢັນ ແລະ ມີລົມພັດແຮງ ອັນໄດ້ສົ່ງຜົນກະທົບຕໍ່ຕົ້ນເຂົ້າທີ່ຫາກໍ່ປັກດຳແລ້ວ ເຮັດໃຫ້ຕົ້ນເຂົ້າຮ່ຽວຕາຍ ໂດຍທາງກະສິກຳເມືອງໄດ້ລົງຕິດຕາມກວດກາຕົວຈິງ ເຊິ່ງເຫັນວ່າ ປະມານ 50% ເນື້ອທີ່ນາຂອງຊາວກະສິກອນແມ່ນໄດ້ຮັບຜົນກະທົບ ສະນັ້ນ ຈຶ່ງໄດ້ສົ່ງວິຊາການ ລົງແນະນຳໃຫ້ໃສ່ປຸຍເລັ່ງ ເພີ່ມໄຮໂດເຈນ ແກ່ຕົ້ນເຂົ້າໃຫ້ປົ່ງໜໍ່ລູກຂຶ້ນມາໃໝ່ ເຊິ່ງວິທີການດັ່ງກ່າວ ຈະຊ່ວຍໃຫ້ໄດ້ຮັບຜົນທາງສະມັດຖະພາບ 70-80% ຢ່າງໃດກໍ່ຕາມ ມາຮອດໄລຍະນີ້ ຜັດໄດ້ຮັບການແຈ້ງເຕືອນຈາກກົມອຸຕຸນິຍົມ ແລະ ອຸທົກກະສາດວ່າ ອາກາດຈະໜາວເຢັນອີກຮອບໜຶ່ງ ໃນລະດັບ 3-5 ອົງສາ ແລະ ຈະມີຝົນຕົກ ມີລົມ-ຟ້າເຫຼື້ອມ ຟ້າຮ້ອງ ເຊິ່ງສະພາບດັ່ງກ່າວຫາກແກ່ຍາວ ແນ່ນອນຈະຕ້ອງສົ່ງຜົນກະທົບຊ້ຳອີກຮອບສອງ ເຮັດໃຫ້ຊາວນາມີຄວາມກັງວົນຕື່ມອີກ.
ຫົວໜ້າຫ້ອງການກະສິກຳ ແລະ ປ່າໄມ້ ເມືອງຈຳພອນໃຫ້ຮູ້ອີກວ່າ: ການຜະລິດເຂົ້ານາແຊງຂອງຊາວກະສິກອນ ເມືອງຈຳພອນ ປີ 2015 ຜ່ານມາ ມີຈຳນວນທັງໝົດ 12.000 ເຮັກຕາ ເຫັນວ່າມີປະສິດທິພາບສູງສົມຄວນ ສາມາດບັນລຸສະມັດຖະພາບ 4,2 ໂຕນຕໍ່ເຮັກຕາ ຫຼື ເກືອບ 500.000 ໂຕນ ສ່ວນການຜະລິດໃນປີນີ້ ແມ່ນໄດ້ຮັບຜົນກະທົບເຄິ່ງໜຶ່ງດ້ານສະມັດຖະພາບ ອາດຫຼຸດລົງກວ່າປີຜ່ານມາຫຼາຍສົມຄວນ ສິ່ງທີ່ເປັນຫ່ວງຢ່າງໜຶ່ງ ຫາກສະພາບອາກາດແບບນີ້ແກ່ຍາວຫຼາຍວັນ ກໍ່ຈະເປັນການຊ້ຳເຕີມຕົ້ນເຂົ້າທີ່ໄດ້ຮັບຜົນກະທົບຜ່ານມາ ບໍ່ສາມາດຟື້ນຟູຄືນໄດ້ ກໍ່ຈະສ້າງຄວາມເສຍຫາຍຢ່າງໜັກໜ່ວງສົມຄວນ ແຕ່ເຊື່ອວ່າອາດຈະບໍ່ຮ້າຍແຮງຄືຊຸດທີ່ຜ່ານມາ.
ຂໍ້ມູນຈາກ http://www.vientianemai.net/