ໃນໂອກາດໂອ້ລົມ ຕໍ່ກອງປະຊຸມວຽກງານປ້ອງກັນເຄື່ອນທີ່ ປະຈຳປີ 2015 ຂອງທ່ານລັດຖະມົນຕີວ່າການ ກະຊວງປ້ອງກັນຄວາມສະຫງົບ ພົນຕີ ສົມແກ້ວ ສີລາວົງ ເມື່ອບໍ່ດົນມານີ້, ທ່ານໄດ້ເນັ້ນໃຫ້ກຳລັງດັ່ງກ່າວໃນທົ່ວປະເທດ ເພີ່ມທະວີການສະກັດກັ້ນ ໜໍ່ແໜງກໍ່ຄວາມບໍ່ສະຫງົບ ແລະ ບໍ່ເປັນລະບຽບຮຽບຮ້ອຍໃນສັງຄົມ ໃຫ້ຫລຸດໜ້ອຍລົງຢ່າງຈະແຈ້ງ, ພາຍຫລັງເຫັນວ່າ ບັນດາປາກົດການຫຍໍ້ທໍ້ໃນສັງຄົມ ຍັງຈະສືບຕໍ່ເກີດຂຶ້ນຢ່າງຮຸນແຮງ ແລະ ສ້າງຄວາມຢ້ານກົວໃຫ້ແກ່ສັງຄົມ ເປັນຕົ້ນ: ກຸ່ມແກ໊ງແຂ່ງລົດກວນເມືອງ, ການນຳໃຊ້ພາຫະນະບໍ່ຖືກຕ້ອງ, ດັດແປງສະພາບເຕັກນິກ, ການປຸ້ນຈີ້-ຊິງຊັບ ແລະ ບັນຫາຢາເສບຕິດຕ່າງໆ ເພື່ອຮັບປະກັນໃຫ້ມີສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍປອດໄພທາງສັງຄົມ.
ທ່ານຮອງຫົວໜ້າກໍາລັງປ້ອງກັນເຄື່ອນທີ່ ໃຫ້ຮູ້ວ່າ: ໃນປີ 2015 ຜ່ານມາ, ກຳລັງຂອງຕົນໄດ້ເອົາໃຈໃສ່ສະກັດກັ້ນ ແລະ ແກ້ໄຂໜໍ່ແໜງກຸ່ມຄົນບໍ່ດີ ທີ່ເຄື່ອນໄຫວກໍ່ຄວາມບໍ່ສະຫງົບໄດ້ຫລາຍກໍລະນີຄື: ສາມາດກັກຕົວຜູ້ຕ້ອງຫາ ໄດ້ທັງໝົດ 417 ຄົນ, ຍິງ 18 ຄົນ, ຍຶດຂອງກາງປະເພດຢາບ້າ ໄດ້ຫລາຍກວ່າ 4 ພັນເມັດ, ຢາໄອ, ເຮໂຣອິນ ແລະ ອາວຸດປືນຈໍານວນໜຶ່ງ. ນອກນີ້ ຍັງໄດ້ອອກກວດກາລາດຕະເວນ ຕາມຕົວເມືອງຢ່າງເປັນປົກກະຕິ, ປ້ອງກັນກອງປະຊຸມລະດັບສາກົນ, ລະດັບຊາດ, ງານບຸນປະເພນີ, ການແຂ່ງຂັນກິລາ ແລະ ອື່ນໆມີຄວາມຮັບປະກັນ ແລະ ສົມທົບກັບກົມກອງວິຊາສະເພາະກວດກາ ແລະ ຈັບກຸມເປົ້າໝາຍກໍ່ຄວາມບໍ່ສະຫງົບໄດ້ເປັນຈໍານວນຫລາຍ.
ແຫລ່ງຂ່າວ:
