ໂຮງໝໍມິດຕະພາບ ໄດ້ຮັບການຊ່ອຍເຫຼືອເປັນເຄື່ອງນອນຈາກຫຼາຍພາກສ່ວນ ຮວມມູນຄ່າ 35 ລ້ານກີບ
ສູນກາງແນວລາວສ້າງຊາດ ຮ່ວມກັບ ໜ່ວຍງານຫ້ອງການສັງຄົມສົງເຄາະ ສູນກາງອົງການພຸດທະສາສະໜາສໍາພັນລາວ ມູນນິທິຊ່ອຍເຫຼືອຄົນທຸກຍາກແຫ່ງ ສປປ.ລາວ ສາຂານະຄອນຫຼວງວຽງຈັນ ຮ້ານຊຽງນ້ອຍການໄຟຟ້າ ແລະ ບັນດາບໍລິສັດ ຫົວໜ່ວຍທຸລະກິດ ນິຕິບຸກຄົນຕ່າງໆ ໄດ້ນໍາເອົາຜ້າຫົ່ມ ຜ້າປູຕຽງນອນ ໝອນ ແລະ ຊົບໝອນ ຈໍານວນ 150 ຊຸດ ຮວມມູນຄ່າ 35 ລ້ານກີບ ມອບໃຫ້ໂຮງໝໍມິດຕະພາບ ເພື່ອເປັນການປະກອບສ່ວນຊ່ອຍເຫຼືອ ແລະ ອໍານວຍຄວາມສະດວກໃນການບໍລິການຄົນເຈັບໃຫ້ໄດ້ດີຍິ່ງຂຶ້ນ.
ພິທີມອບ-ຮັບເຄື່ອງຊ່ອຍເຫຼືອດັ່ງກ່າວ ໄດ້ຈັດຂຶ້ນໃນຕອນບ່າຍວັນທີ 24 ກຸມພາ 2016 ທີ່ໂຮງໝໍມິດຕະພາບ (150 ຕຽງ) ເມືອງຈັນທະບູລີ ນະຄອນຫຼວງວຽງຈັນ ໂດຍການກ່າວມອບຂອງພະອາຈານ ພົງສະຫວັນ ອານຸສິນ ປະທານມູນນິທີຊ່ອຍເຫຼືອຄົນທຸກຍາກ ແຫ່ງ ສປປ.ລາວ ສາຂານະຄອນຫຼວງວຽງຈັນ ທັງເປັນຫົວໜ້າໜ່ວຍງານສັງຄົມສົງເຄາະ ສູນກາງອົງການພຸດທະສາສະໜາສໍາພັນລາວ ແລະ ກ່າວຮັບໂດຍທ່ານ ດຣ.ສະໜອງ ທອງຊະນະ ຜູ້ອໍານວຍການໃຫຽ່ໂຮງໝໍມິດຕະພາບ ໂດຍການເຂົ້າຮ່ວມຂອງພະອາຈານ ຄໍາມາ ປັນຍາວິຈິດ ຫົວໜ້າຫ້ອງການສູນກາງອົງການພຸດທະສາສະໜາສໍາພັນລາວ ມີຄະນະອໍານວຍການໂຮງໝໍມິດຕະພາບ ບັນດາພະນັກງານແພດ ໝໍ ແລະ ຜູ້ຕາງໜ້າບໍລິສັດ ຫ້າງຮ້ານ ນິຕິບຸກຄົນ ທີ່ໃຫ້ການສະໜັບສະໜູນ ແລະ ອຸປະຖໍາເຂົ້າຮ່ວມ.
ຂໍ້ມູນຈາກ http://www.vtetoday.la/