ໃນວັນທີ 25 ກຸມພາ 2016 ທີ່ຫ້ອງວ່າການນະຄອນຫຼວງວຽງຈັນ ທ່ານ ດຣ. ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງນະຄອນຫຼວງ ໄດ້ເປັນກຽດຕ້ອນຮັບບັນດາຜູ້ສະໝັກເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ VIII ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສ ນວ) ນຳໂດຍທ່ານ ດຣ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ ຮອງປະທານສະພາແຫ່ງຊາດ ຊຸດທີ VII ທັງເປັນຫົວໜ້າຜູ້ຮັບສະໝັກເລືອກຕັ້ງເຂດ I ນະຄອນຫຼວງວຽງຈັນ.
ທ່ານເຈົ້າຄອງນະຄອນຫຼວງວຽງຈັນ ໄດ້ກ່າວຕ້ອນຮັບຢ່າງອົບອຸ່ນຕໍ່ຜູ້ສະໝັກເລືອກຕັ້ງ ສສຊ ແລະ ສສ ນວ ຊຸດທີ VIII ພ້ອມນັ້ນ ໄດ້ເຜີຍແຜ່ມະຕິກອງປະຊຸມໃຫຍ່ ຄັ້ງທີ x ຂອງພັກ ກໍ່ຄືກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ນະຄອນຫຼວງວຽງຈັນ ພ້ອມທັງນະໂຍບາຍ ແລະ ແຜນພັດທະນາ ນະຄອນຫຼວງວຽງຈັນ ໂດຍຫຍໍ້ ໂດຍສະເພາະ 6 ວິໄສທັດພັດທະນານະຄອນຫຼວງ 6 ຍຸດທະສາດ ແລະ 6 ໂຄງການ ບຸກທະລຸ 16 ໂຄງການໃຫຍ່ 8 ຄາດໝາຍ ແລະ 8 ໜ້າທີ່ ເພື່ອໃຫ້ ສສຊ ແລະ ສສ ນວ ຮັບຮູ້ ແລະ ເຂົ້າໃຈເປັນເອກະພາບ ນຳໄປເຜີຍແຜ່ເຊື່ອມຊຶມໃຫ້ປະຊາຊົນໄດ້ຮັບຮູ້ຢ່າງຖືກຕ້ອງ ເພື່ອພ້ອມກັນນຳໄປຈັດຕັ້ງຜັນຂະຫຍາຍໃຫ້ໄດ້ຮັບຜົນສຳເລັດ ແລະ ປາກົດຜົນເປັນຈິງ.
ທ່ານ ດຣ. ໄຊສົມພອນ ພົມວິຫານ ຕາງໜ້າໃຫ້ ສສຊ ແລະ ສສ ນວ ກ່າວຂອບໃຈເປັນຢ່າງຍິ່ງ ທີ່ອຳນາດການປົກຄອງນະຄອນຫຼວງວຽງຈັນ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ອຳນວຍຄວາມສະດວກໃຫ້ຜູ້ສະໝັກ ສສຊ ແລະ ສສ ນວ ລົງໂຄສະນາຫາສຽງຕາມພາລະບົດບາດ ພ້ອມນັ້ນ ກໍ່ໄດ້ໃຫ້ທິດຊີ້ນຳຕໍ່ຄະນະຜູ້ສະໝັກ ສສຊ ແລະ ສສ ນວ ໃຫ້ເຂົ້າໃຈເປັນເອກະພາບຕໍ່ກັບມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ນະຄອນຫຼວງວຽງຈັນ ແລະ ແຜນພັດທະນາເສດຖະກິດສັງຄົມຂອງ ນວ ແລະ ຫວັງຢ່າງຍິ່ງວ່າ ຈະສືບຕໍ່ໄດ້ຮັບການຊີ້ນຳ ແນະນຳເພື່ອປະຕິບັດໜ້າທີ່ຫາສຽງໃຫ້ໄດ້ຕາມລະດັບຄາດໝາຍ ທີ່ຄະນະກຳມະການເລືອກຕັ້ງລະດັບຊາດ ແລະ ຄະນະກຳມະການເລືອກຕັ້ງຂັ້ນນະຄອນຫຼວງ ກໍ່ຄືຄະນະກຳມະການເລືອກຕັ້ງຂັ້ນເມືອງໄດ້ບັນລຸຄາດໝາຍ ຄຽງຄູ່ກັນນັ້ນ ຂໍໃຫ້ຄຳໝັ້ນສັນຍາວ່າຈະພະຍາຍາມ ນຳເອົາເນື້ອໃນຈິດໃຈຂອງມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດສັງຄົມ 5 ປີ ພ້ອມທັງຍຸດທະສາດ ແລະ ວິໄສທັດແຜນພັດທະນາລະດັບຊາດ ກໍ່ຄືມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ ແຜນພັດທະນາເສດຖະກິດສັງຄົມຂອງນະຄອນຫຼວງວຽງຈັນ ແຕ່ນີ້ຫາປີ 2020.
ຂໍ້ມູນຈາກ http://www.vientianemai.net/