ກອງປະຊຸມໜ່ວຍງານຄະນະເຮັດວຽກ ກະກຽມໃຫ້ຄະນະນຳກະຊວງການເງິນ ແລະ ທະນາຄານກາງອາຊຽນແມ່ນກອງປະຊຸມໜຶ່ງປິ່ນອ້ອມ ກອງປະຊຸມຄະນະວິຊາການດ້ານການເງິນ ແລະ ທະນາຄານກາງອາຊຽນອາຊຽນ+3 ເຊິ່ງໄດ້ຈັດຂຶ້ນ ໃນວັນທີ 25 ກຸມພາ 2016 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ເປັນປະທານຮ່ວມຂອງທ່ານ ບຸນຖົມ ລໍມະນີ ຫົວໜ້າກົມຮ່ວມມືສາກົນກະຊວງການເງິນ ແລະ ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມພົວພັນສາກົນທະນາຄານ ແຫ່ງ ສປປ ລາວ ໂດຍມີພະນັກງານວິຊາການຂະແໜງການເງິນ ແລະ ທະນາຄານກາງອາຊຽນ ເຂົ້າຮ່ວມ.
ກອງປະຊຸມໃນຄັ້ງນີ້ ແມ່ນໄດ້ປຶກສາຫາລືໃສ່ຫຼາຍບັນຫາເປັນຕົ້ນ ແມ່ນແຜນແມ່ບົດຂອງປະຊາຄົມເສດຖະກິດອາຊຽນ ແລະ ໄດ້ເຊື່ອມໂຍງທາງດ້ານການເງິນ ເງິນຕາ ໃນນັ້ນ ກໍ່ໄດ້ພ້ອມກັນປຶກສາຫາລືຮ່ວມກັນ ໃນການພັດທະນາຕະຫຼາດພັນທະບັດ ການປະຕິບັດວິທີການບໍລິການດ້ານການເງິນ ການເປີດເສລີບັນຊີທຶນລະບົບການຊຳລະສະສາງຂອງທະນາຄານກາງອາຊຽນ ແລະ ແຜນການຈັດຕັ້ງປະຕິບັດຍຸດທະສາດປະຊາຄົມເສດຖະກິດອາຊຽນ ຮອດປີ 2025 ການເຊື່ອມໂຍງດ້ານການເງິນອາຊຽນ 2016 ຫາ 2025 ນອກນັ້ນຍັງມີຂະບວນການຕິດຕາມເສດຖະກິດໃນພາກພື້ນຂອງອາຊຽນ ຫຼັງຈາກນັ້ນ ກໍ່ໄດ້ມີການຮ່ວມມືດ້ານການເງິນອາຊຽນ ເຊິ່ງມີກອງທຶນພັດທະນາໂຄງລ່າງພື້ນຖານອາຊຽນ ແລະ ການຮ່ວມມືດ້ານປະກັນໄພອາຊຽນ ການຮ່ວມມືດ້ານວຽກງານພາສີ ການຮ່ວມມືດ້ານການຕ້ານການສະໜອງທຶນໃຫ້ໃນການກໍ່ການຮ້າຍ ແລະ ຮ່ວມມືທາງດ້ານອາກອນ ການເຂົ້າຫາແຫຼ່ງທຶນ ນອກນັ້ນຍັງໄດ້ປຶກສາຫາລືກ່ຽວກັບ ການຈັດກອງປະຊຸມສຳມະນາການລົງທຶນຂອງລັດຖະມົນຕີການເງິນອາຊຽນ ທັງໝົດນີ້ ກໍ່ເພື່ອກະກຽມດ້ານເນື້ອໃນໃຫ້ກອງປະຊຸມລັດຖະມົນຕີຊ່ວຍການເງິນ ແລະ ຮອງຜູ້ວ່າການທະນາຄານກາງອາຊຽນ ອາຊຽນ+3 ແລະ ກອງປະຊຸມລັດຖະມົນຕີການເງິນອາຊຽນ ຄັ້ງທີ 20 ກອງປະຊຸມຜູ້ວ່າການທະນາຄານກາງອາຊຽນ ຄັ້ງທີ 12 ກອງປະຊຸມຮ່ວມລະຫວ່າງລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ ຄັ້ງທີ 2 ທີ່ຈະຈັດຂຶ້ນໃນວັນທີ 1-4 ເມສາ 2016 ທີ່ນະຄອນຫຼວງວຽງຈັນ ພ້ອມທັງປຶກສາຫາລືວຽກທີ່ພົວພັນຂອງຂະແໜງການເງິນ ທີ່ຈະເອົາເຂົ້າໃນແຜນຫຼັງປະຊາຄົມເສດຖະກິດອາຊຽນ ຮອດປີ 2025.
ຜ່ານການຮັບຟັງການປຶກສາຫາລືໃນກອງປະຊຸມຄັ້ງນີ້ ເຫັນວ່າບັນດາປະເທດອາຊຽນແມ່ນມີການຈັດຕັ້ງປະຕິບັດຄືບໜ້າສົມຄວນ ໂດຍສະເພາະການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ ສະແດງອອກເຖິງຄວາມພ້ອມໃນການຈັດກອງປະຊຸມຂະແໜງການເງິນ ແລະ ທະນາຄານກາງອາຊຽນໃນເດືອນເມສານີ້.
ຂໍ້ມູນຈາກ http://www.vientianemai.net/