ໃນວັນທີ 24 ກຸມພາ 2016, ຄະນະຜູ້ແທນ ສປປ ລາວ ນຳໂດຍ ທ່ານ ສົງການ ຫຼວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງທີ 3 ທີ່ເມືອງສັນຢາ ແຂວງ ໄຫໜານ ສປ ຈີນ, ພາຍໃຕ້ການເປັນປະທານຮ່ວມຂອງ ທ່ານ ຫຼິວ ເຈິນ ໝິງ (Liu Zhenmin), ລັດຖະມົນຕີຊ່ວຍວ່າການກະຊວງການຕ່າງປະເທດ ສປ ຈີນ ແລະທ່ານ ວິທະວັດ ສີວິຫົກ, ຮອງຫົວໜ້າຫ້ອງການກະຊວງການຕ່າງປະເທດໄທມີເຈົ້າໜ້າທີ່ອາວຸໂສ ຈາກກະຊວງການຕ່າງປະເທດຂອງ 6 ປະເທດ: ກຳປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ສສ ຫວຽດນາມ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມແມ່ນເພື່ອກະກຽມຄວາມພ້ອມດ້ານຕ່າງໆໃຫ້ແກ່ກອງປະຊຸມຜູ້ນຳຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງທີ 1, ໃນນັ້ນກອງປະຊຸມໄດ້ປຶກສາຫາລື ແລະປະກອບຄຳເຫັນຕໍ່ຮ່າງຖະແຫຼງການສັນຢາຂອງກອງປະຊຸມຜູ້ນຳຄັ້ງທີ 1 (Sanya Declaration of the 1st Leaders’ Meeting), ຖະແຫຼງການຮ່ວມວ່າດ້ວຍ ການຮ່ວມມືດ້ານການສ້າງຄວາມອາດສາມາດໃນການຜະລິດ (Joint Statement on Production Capacity among Lancang Mekong Countries) ແລະບັນຊີຮ່ວມໂຄງການເຫັນຜົນໄດ້ໄວກອງປະຊຸມໄດ້ເຫັນດີໃນດ້ານຫຼັກການຕໍ່ບັນດາຮ່າງເອກະສານຂອງຂອບການຮ່ວມມືດັ່ງກ່າວ ເພື່ອນຳສະເໜີຕໍ່ກອງປະຊຸມຜູ້ນຳຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງທີ 1 ພິຈາລະນາຮັບຮອງເອົາ.
ໃນໂອກາດດຽວກັນຄະນະຜູ້ແທນກອງປະຊຸມໄດ້ເຂົ້າພົບປະທ່ານ ຫຼິວ ສຶກຸ້ຍ (Liu Cigui) ເຈົ້າແຂວງໆໄຫໜານ ແລະໄດ້ໄປຢ້ຽມຢາມສະຖານທີ່ຈັດກອງປະຊຸມຜູ້ນຳຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງທີ 1 ຊຶ່ງຈະຈັດຂຶ້ນ ໃນວັນທີ 22-23 ມີນາ 2016 ທີ່ ສັນຢາ, ໄຫໜານ, ສປ ຈີນ.
ສປປ ລາວ ເຫັນວ່າຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຊຶ່ງແມ່ນຂອບການຮ່ວມມືທີ່ຫາກໍ່ສ້າງຕັ້ງໃນປີ 2015 ທີ່ຜ່ານມາຈະນຳເອົາຜົນປະໂຫຍດມາສູ່ 6 ປະເທດອະນຸພາກພື້ນແມ່ນ້ຳຂອງໃນການພັດທະນາເສດຖະກິດ-ສັງຄົມ ແລະປະກອບສ່ວນເຂົ້າໃນການເສີມຂະຫຍາຍສັນຕິພາບ ແລະຮັດແໜ້ນການພົວພັນຮ່ວມມືລະຫວ່າງ 6 ປະເທດແມ່ນ້ຳຂອງໃຫ້ຫຼາຍຍິ່ງຂຶ້ນ.
ທີ່ມາ: