ທີ່ຫ້ອງປະຊຸມພະແນກສຶກສາທິການ ແລະກີລາແຂວງຊຽງຂວາງໂດຍການໃຫ້ກຽດເຂົ້າຮ່ວມຂອງທ່ານ ດຣ. ຄຳປາວ ມົວ ຄະນະປະຈຳພັກແຂວງຮອງເຈົ້າແຂວງໆ ຊຽງຂວາງ, ມີທ່ານ ບົວລີ ພັນນາວົງ ກຳມະການພັກແຂວງຫົວໜ້າພະແນກສຶກສາທິການ ແລະກີລາແຂວງ, ມີຫົວໜ້າ, ຮອງຫົວໜ້າຫ້ອງການສຶກສາທິການ ແລະກີລາເມືອງ, ພະນັກງານທັງໝົດພາຍໃນຫ້ອງການພະແນກສຶກສາທິການ ແລະກີລາແຂວງ, ແຂກທີ່ຖືກເຊີນ, ຜູ້ອຳນວຍການໂຮງຮຽນທັງ 25 ແຫ່ງ ແລະນ້ອງນັກຮຽນເຂົ້າຮ່ວມ ໜຶ່ງຮ້ອຍກວ່າຄົນ.

ໃນພິທີ ທ່ານ ບົວລຽນ ເທບພະວົງ ຮອງຂະແໜງພະລະສິລະປະພະແນກສຶກສາທິການ ແລະກີລາແຂວງຊຽງຂວາງໄດ້ກ່າວລາຍງານຜົນສຳເລັດການຈັດຕັ້ງປະຕິບັດການສ້າງໂຮງຮຽນໃຫ້ເປັນໂຮງຮຽນປອດຢາເສບຕິດ 3 ປີຊ້ອນຕິດຕໍ່ກັນ ຊຶ່ງພະແນກສຶກສາທິການ ແລະກີລາແຂວງຊຽງ ຂວາງພວກເຮົາໄດ້ເລີ່ມຈັດຕັ້ງປະຕິບັດມາແຕ່ສົກຮຽນ 2012–2013, ຈຸດປະສົງກໍເພື່ອເປັນການ ແກ້ໄຂບັນຫາການແຜ່ລາມຢາເສບຕິດຢູ່ໃນໂຮງຮຽນເພື່ອໃຫ້ຄົນຮຸ່ນໜຸ່ມຫຼຸດພົ້ນອອກຈາກສິ່ງເສບຕິດ, ຕ້ານ ແລະສະກັດກັ້ນປາກົດການຫຍໍ້ທໍ້ຕ່າງໆທີ່ສ້າງຄວາມຫຍຸ້ງຍາກ ແລະກົດໜ່ວງຖ່ວງດຶງການພັດທະນາຊາດພັດທະນາເສດຖະກິດ-ສັງ ຄົມ  ແລະການພັດທະນາຊັບພະຍາກອນມະນຸດ, ໂດຍສົມທົບກັບຫຼາຍພາກສ່ວນເຂົ້າມາມີສ່ວນຮ່ວມ ເພື່ອຫາວິທີແກ້ໄຂໂດຍອີງໃສ 10 ເງື່ອນໄຂ ແລະ 6 ຂັ້ນຕອນຂອງການສ້າງເປັນໂຮງຮຽນປອດຢາເສບຕິດທີ່ທາງກະຊວງສຶກສາທິການ ແລະກີລາວາງອອກ.

ທ່ານ ບົວລຽນ ເທບພະວົງ ຮອງຂະແໜງພະລະ, ສິລະປະພະແນກສຶກສາທິການ ແລະກີລາແຂວງຊຽງຂວາງຍັງລາຍງານໃຫ້ຮູ້ອີກວ່າ: ຫຼັງຈາກກຳນົດໄດ້ ກຸ່ມເປົ້າໝາຍໂຮງຮຽນທີ່ຈະສ້າງໃຫ້ເປັນໂຮງຮຽນປອດຢາເສບຕິດແລ້ວໄດ້ນຳເອົາແຜນການດັ່ງກ່າວ ເຂົ້າໃນແຜນງານໃຫຍ່ຂອງໂຮງຮຽນຈາກນັ້ນໄດ້ຈັດຕັ້ງໃຫ້ມີຄະນະຮັບຜິດຊອບຂັ້ນແຂວງຂັ້ນເມືອງ, ຂັ້ນໂຮງຮຽນ ແລະພາກສ່ວນສຶກສາ, ສາທາ, ປກສ, ຫ້ອງການຕ້ານຢາເສບຕິດ ແລະອຳນາດການປົກຄອງທ້ອງຖິ່ນເຂົ້າມາມີສ່ວນຮ່ວມ ໃນການເຄື່ອນໄຫວຕາມ 8 ຫົວ ຂໍ້ກິດຈະກຳຄື: ເກັບກຳຂໍ້ມູນ, ກຳນົດເປົ້າໝາຍກຸ່ມເສບ, ກຸ່ມສ່ຽງຕາມ ແບບຟອມທີ່ແລ້ວວິເຄາະວິໄຈ, ເຮັດກິດຈະກຳໂຄສະນາເຜີຍແຜປູກຈິດ ສຳນຶກກ່ຽວກັບຄວາມອັນຕະລາຍ ຂອງຢາເສບຕິດ,ກວດນ້ຳປັດສະວະ, ເຮັດກິດຈະກຳເພື່ອນສອນເພື່ອນ ແລະຕິດຕາມຂະບວນກຸ່ມເສບ, ກຸ່ມສ່ຽງ, ລົງປະເມີນຜົນໃນໂຮງຮຽນ, ສ້າງນິຕິກຳໃນການແກ້ໄຂບັນຫາ ຕ້ານຢາເສບຕິດໃນໂຮງຮຽນ, ສຶກສາກຸ່ມເສບ, ກຸ່ມສ່ຽງ ແລະພົວພັນກັບຜູ້ປົກຄອງເດັກ, ຈັດກິດຈະກຳຕ້ານສິ່ງເສບຕິດໃນໂຮງຮຽນດ້ວຍ ການແຂ່ງຂັນກີລາສິລະປະ,ສະແດງລະຄອນ, ແຕ້ມຮູບ, ແຕ່ງເລື່ອງ ແລະອື່ນໆຜ່ານການຈັດຕັ້ງປະຕິບັດ ໃນ 3 ສົກຮຽນຕິດຕໍ່ກັນເຫັນວ່າໂຮງ ຮຽນກຸ່ມເປົ້າໝາຍ 25 ແຫ່ງທົ່ວ ແຂວງຊຽງຂວາງສາມາດຮັບຮອງ ໄດ້ເປັນໂຮງຮຽນປອດຢາເສບຕິດ 3 ປີຊ້ອນຕິດຕໍ່ກັນ, ໃນນັ້ນມີໂຮງຮຽນ ມຕ 17 ແຫ່ງຄື: ມຕ (ວຽງທອງ, ສາຍລົມ, ສຳພັນໄຊ, ບຸນຖິ່ນ, ນາແປນ, ສຸມ ແມນ, ຖ້ຳທ້າວ, ບໍກໍ, ປ່າຈ້າໃຕ້, ແກ່ວບອນ, ໂພສີພູກູດ, ພູໂຊ້, ນ້ຳຈັດ, ລັ້ງຈອງ, ບ້ານທາງ), ສ່ວນໂຮງຮຽນ ມສ ມີທັງໝົດ 8 ແຫ່ງຄື: ມສ(ລາດງ່ອນ, ລາດຮ້ວງ, ເຜິ້ງຊາມ, ພັກແຄະ, ພຽງຮົ່ມລ້ອງຊັນ, ນາຄ່ອນ, ໜອງຕັ່ງບັນດາໂຮງຮຽນດັ່ງກ່າວທີ່ໄດ້ຮັບຮອງຈະໄດ້ສືບຕໍ່ວາງແຜນເຄື່ອນໄຫວ ໃນຕໍ່ໜ້າຕື່ມອີກເພື່ອແນໃສ່ປູກຈິດສຳນຶກໃຫ້ກຸ່ມເດັກນັກຮຽນ ເຂົ້າໃຈຢ່າງເລິກເຊີ່ງຕໍ່ກັບຜົນຮ້າຍຂອງຢາເສບຕິດໃນແຕ່ລະປີ ໂດຍການມີສ່ວນຮ່ວມຂອງອົງການຈັດຕັ້ງຕ່າງໆທີ່ກ່ຽວຂ້ອງກໍຄືຊຸມຊົນ ແລະຜູ້ປົກ ຄອງເດັກ,  ພ້ອມນັ້ນບັນດາໂຮງ ຮຽນທີ່ຖືກຮັບຮອງຍັງມີແຜ່ນປ້າຍຕິດໃສ່ໂຮງຮຽນເພື່ອບົ່ງບອກເຖິງໂຮງຮຽນດັ່ງກ່າວເປັນ ໂຮງຮຽນປອດຢາເສບຕິດ 3 ປີຕິດຕໍ່ກັນພ້ອມທັງຍັງໄດ້ຮັບຫຼຽນໄຊແຮງງານຊັ້ນ III ຈາກລັດຖະບານຕື່ມອີກ.

ໂອກາດດຽວກັນ ທ່ານ ດຣ. ຄຳປາວ ມົວ ຄະນະປະຈຳພັກ ແຂວງຮອງເຈົ້າແຂວງຊຽງຂວາງ ໄດ້ໃຫ້ກຽດຂຶ້ນໂອ້ລົມປະກອບຄຳຄິດຄຳເຫັນກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍມາຍັງຄະນະຮັບຜິດຊອບທຸກຂັ້ນທີ່ ໄດ້ພ້ອມກັນປະກອບສ່ວນສ້າງໃຫ້ ໂຮງຮຽນມັດທະຍົມສຶກສາທັງ 25 ແຫ່ງທົ່ວແຂວງຊຽງຂວາງ ເປັນໂຮງຮຽນປອດຢາເສບຕິດທັງໄດ້ຮັບການຍ້ອງຍໍຈາກລັດຖະ ບານຕື່ມອີກ, ທ່ານຍັງໄດ້ຍົກໃຫ້ ເຫັນປາກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ໃນສັງຄົມປະຈຸບັນທີ່ສົ່ງຜົນກະທົບຕໍ່ປະເທດຊາດ, ຕໍ່ສັງຄົມ ແລະຊາວໜຸ່ມນັກສຶກສາຕົ້ນເຫດສ່ວນໃຫຍ່ແມ່ນມາຈາກສິ່ງເສບຕິດ, ສະນັ້ນຖ້າພວກເຮົາບໍ່ມີ ສະຕິ, ບໍ່ມີຫຼັກໝັ້ນ ແລະບໍ່ຮ່ວມ ມືກັນສະກັດກັ້ນກໍຈະຕົກເປັນທາດຂອງສີ່ງເສບຕິດ ແລະເດີນໜ້າຕໍ່ໄປໄດ້ຍາກ, ທ່ານຍັງໄດ້ຮຽນ ຮ້ອງໃຫ້ພໍ່ແມ່ຜູ້ປົກຄອງນັກຮຽນ ກໍຄືອຳນາດການປົກຄອງບ້ານຈົ່ງຊ່ວຍກັນໃນການສຶກສາອົບຮົມແນວຄິດເປັນຫຼັກໃນການກໍ່ສ້າງ ໄວໜຸ່ມນັກຮຽນ, ຄະນະຮັບຜິດຊອບຂັ້ນແຂວງ, ຂັ້ນເມືອງ ແລະທຸກພາກສ່ວນທີ່ກ່ຽວຂ້ອງຕ້ອງຫັນມາໃຫ້ການຊ່ວຍເຫຼືອຢ່າງໃກ້ສິດ ແລະເອົາຈິງເອົາຈັງເພື່ອເຮັດ ແນວໃດໃຫ້ບັນຫາສິ່ງເສບຕິດໝົດໄປ.